Damascus Langah Thusuak
17
1 Damascus tawh kasai thusuak:"En un, Damascus sawtvei khuapi hi nawn lo dinga,
a kisia lompi suak ding hi.
2 Aroer khuapite kinusia dinga,
ganhon giah nadingin kinusia in,
tuate kuamah in a phawng kei ding hi.
3 Ephraim kulh muanhuaite mangthang dinga,
Damascus a kumpi vangliatnate bei-in
Aram a, a baanglaite
Israel-te minthanna a bang ding uh hi,"
Thahatpen TOPA in cikhia hi.
4 "Tua ni ciangin Jacob minthanna bei dinga,
a pumpi thauna a gawngtaam ding hi.
5 An lapa in ankung dinglai a lak khit tawh kibang dinga,
Rephaim Kuam sunga
ansang khop bangin -
a khutin an a la ding hi.
6 Tua hinapi,
olive kung a kisat ciangin
a hiang paipi dawnah olive nih le thum a kihawi bangin
a gahpha ansang vui li vui nga a om lai ding hi,"
TOPA, Israel-te Pasian in cikhia hi.
7 Tua ni ciangin mite in amaute a Bawlpa en ding uh a,
Israel-te Siangtho Pa lamah a mit uh a hei ding uh hi.
8 Amaute in khuta bawlsa
biakna-tau lamen loin
amau khutmete bawlsa gimnamtui taute le
Asherah khuamte aa a thusim kei ding uh hi.
9 Tua ni ciangin Israel-te hanga kinusia a khuapi muanhuaite uh, a kinusia sephih sawlbawk lak a bang ding hi. A vekin a kilawi khin ding hi.
10 Na Honpa Pasian na mangngilh khin hi;
na kulh muanhuai Suangpi na phawkkha kei hi.
Tua ahi ciangin singno a hoih pen suanin
gamdang lenggui na suan zongin,
11 na suan ni mahin posak pahin,
na suan ni zingsang mah in na paksak pah zongin
natna le damsak theih loh a na thuak ni-in
bangmah na kaikhawm tuan kei ding hi.
12 Oh, minam tampite ototna aw -
amaute tuipi ging bangin a awngawg uh hi!
Oh, mite awng zuahzuah uh a -
tuipi lianpi hawk bangin a hawk uh hi!
13 Tui kilok hawkte bangin mite a hawk uh zongin
amah in a tai ciangin gamlapi ah taimang uh a,
mualtunga huihlet ansi leng bangin kihawlkhia a,
huihpi mut lopa leeng a bang uh hi.
14 Nitakin hong lausak uh!
Zingsang ma-in amaute mang veh!
Hih in eite hong buluhte tanh
ei aa hong sutte vankhol ahi hi.