Lenggui Lo La
5
1 Ka itpa adinga lenggui lo phuahna la khat ka sa ding hi:
Mualpang lei hoihna khatah ka itpa in
lenggui lo khat a nei hi.
2 Amah in tua lei tang kal a, suangteng paikhia-in
lenggui hoih pente a suan hi.
A lo sungah buktau khat dawh a,
lengtui sukna khuk khat a to hi.
Tua ciangin lenggah hoih gah dingin lamen a,
ahi hangin lenggah hoih lo gah mawk hi.
3 Tu-in no Jerusalem a tengte le Judah mite aw,
kei le ka lenggui lo kikalah thu khen dih un.
4 Ka lenggui lo adingin ka hihsate longal,
adang bang hih lai ding ka hi hiam?
Lenggah hoih gah dinga ka lamet hi napi
bang dingin a hoihlo bek gah mawk hiam?
5 Tu-in ka lenggui lo ka hih ding zia
kong gen ding hi.
A dai ka phelkhia dinga,
a kisia ding hi;
a kulh ka sukham dinga,
a kituancil ding hi.
6 Lotul ka suaksak dinga kipuah loin kikho lo dinga,
tua lai-ah lingkungte le
thangling kungte a po ding hi.
A tungah guah a zuk loh nadingin
meiite thu ka pia ding hi," a ci hi.
7 Thahatpen TOPA’ lenggui lo pen
Israel innkuan hi-a,
a lungtunna huan lah
Judah mite ahi hi.
Amah in a thutang dingin lamen napi sisan luanna a mu hi;
thumaanna a lamet hangin lungdonga kahna a za hi.
Gimnate le Thukhennate
8 Mun khat beek awng lo zahin
inn khat le inn khat zoma
lo khat le lo khat a zom leitang tunga
no guak a tengte tungah gimna tung ta hen.
9 Thahatpen TOPA in ka zak tektekin:
"Inn lianpite a hawmin kinusia dinga,
inndei lianpipite ah a teng a om kei ding hi.
10 Lenggui lo acre aa sawm ah lenggah-zu bath bb khat piangin,
anci homer cc khat ah anhum ephah dd khat bek a suak ding hi.
11 Zingsangin tho baih a,
a zu dawn ding delhin
zu in a satsak pilpial dong zan sawt dong
a tutkhote tungah gimna tungta hen.
12 Amaute in pawi sungah harp-te le lyre-te,
khuangtate le tamngaite le lenggah-zu nei uh a,
ahi hangin TOPA nasepna thudon loin
ama khutma a zahtak kei uh hi.
13 Tua ahi ciangin ka mite,
theihtelna a neih loh manun sal a suak ding uh hi;
a mi zaliante uh gilkialin si ding uh a,
a mihonte uh dangtakin a keu ding uh hi.
14 Tua ahi ciangin hankhuk ee in a ankam limsak a,
ciangtan om loin a kam ka a;
tua sungah a uliante uh le a mipite uh
kitawng zuazua sa-in nuamsa-in a tumsuk uh hi.
15 Tua hi a, mite kikhiasukin
mihing a kiniamkhiat ding hi;
a kiphasakte mit a niam hah ding uh hi.
16 Ahi hangin Thahatpen TOPA a thutangna hangin kitawisang dinga,
a siangtho Pasian in a thumaanna tawh a siangtho a hihna hong lak ding hi.
17 Tua ciangin tuute in amau lonona-a gamta bangin lopa ne ding uh a,
mihaute’ mun kisiate ah tuunote a gamta ff ding uh hi.
18 Zuauna khauzen-in mawhna kai a,
leng khauhualpi-in gitlohna kai-in
19 "Pasian nasep i muh theih nadingin
amah kinawhsakin manlangsak ni;
i theihtheih nadingin
kinaihsakin
Israel Siangtho Pa ngimna tangtungsak pak ni,"
a cite tungah gimna tung ta hen.
20 Gitlohna hoih ci a,
migitna hoih lo ci-in
khuavak tangin khuamial koih a,
khuamial tangin khuavak koih in,
a khum tangin a kha koih in,
a kha tangin a khum a koihte tungah gimna tung ta hen.
21 Amau mita pil a kisate le
amau muhna-a tei a kisate tungah gimna tung ta hen.
22 Zu dawna pasal tangte le
zuhel dawn a siampente
23 a mawhte golhsum-in khah a,
mawhpengte’ thutanna a nialte tungah gimna tung ta hen.
24 Tua ahi ciangin meikuang in buhtu a liahtum bangin,
meikuang lai-ah lopa keu khulsuk bangin
amaute zungte muat dinga,
a pakte uh leivui bangin a leengmang ding hi;
ahang in, amaute in Thahatpen TOPA thukham nial uh a,
Israel Siangtho Pa kammal a simmawh uh hi.
25 Tua ahi ciangin TOPA hehna a mite langkhatah kuangin
a khut vikto-a amaute a sattuk hi.
Mual liante kiling a,
misi luangte kongzinga nin lompi bang hi.
Hizahta khit nangawnin a hehna dam nai lo lai-a,
a khut a vikto lailai hi.
26 Amah in gamlapi a om minamte adingin dialkhai lek a,
leimonga omte adingin phit a mut hi.
Hih munah amaute manlangtakin
a pai pah uh hi!
27 Amaute khat beek gim loin kimuktu lo uh a,
kuamah lusu loin a ihmu kei uh hi;
a kawnggak uh zong kol lo a,
a khedap kaih khau uh zong a kitat kei hi.
28 Amau thaltangte hiam a,
a thalte khempeuh uh keksa ahi hi;
a sakol khecinte uh meisuang bangin
a sakollengpeite uh pingpei a bang hi.
29 Amaute humpinelkai bangin hawk uh a,
humpinelkai khanglaite bangin a hawk uh hi.
Amaute humhamin a sa nek ding uh man uh a,
a hu ding kuamah om loin a puakhia uh hi.
30 Tua ni ciangin amaute in
tuipi hawk bangin a hawksan ding uh hi.
Mi khatpeuh in gamsung a et ciangin
khuamial le lungdonna bek a mu ding hi;
khuavak nangawn meii in liah dinga a mial ding hi.