8
1 Nang ka tang laizom, tunnu anglainunkhum luaihpih hi lecin maw!
Kongzing lai-ah hong mu-in
kong tawptawp zong’
singta’n nuihsiam in
hong lel lo ding hi e.
2 Siambang sinsak tunnu saunuam ah
hong pi nuam ing e.
Ningzu khum le ka mangkawlsing niing
na nian’ dongin hong tulh nuam ve’ng e.
3 Veilam banzal tangkhamin sambang zal ing,
ziatlam banzal tawh
mawngbang hong kawi hi e.
4 Jerusalem lianute aw hong ngen ing e:
Anbang itna a nian’ masiah
phawngin thelbang thosak kha na cia.
Sengualte
5 A gam vangla keugaw gam pan
a sannem tunga kingam
maciang hong suan kua ta lia
vontawino hiam ci’ng e.
Ngaihno
Na tunnu’n naubang hong paiina,
apple tulsing lim nuai a
mimbang na pianna mun zawlah
tanglo bang hong phong hi’ng e
6 Na sinlung sung’h nunbang in hong belh inla,
na banzal ah mangmawh ding
hong zun ve aw;
anbang itna hiambang hatte
kha pham zahin, a aamna zong
zalna kulsin zil hi e.
Kam meikuang bangin kang ven,
kammeipi kuang bang alh e.
7 Anbang itna siktui tampi’n
buak mit zolo a,
khawkhang guntui’n tai siang thei lo e.
Itna lei na’ng gou le gamh
i pholh zongin,
gualin nuihsiamin hong leel lel ding hi e.
Sengualte
8 I tuai lianu moi lua lai e
ang nunkhum gel mom lo lai hi e.
Singta’n it tongdam hong kha leh
i tuai lianu koi bang i lelsak diam aw?.
9 I tuai lianu kawmpal hi leh,
ngun tausangpi a tung giabang zun ni e.
I tuai lianu dawngkot hi leh,
cedar tamtak gil tawh zun ni e.
Ngaihno
10 Kei pawh kawmpal kiciang hi’ng e
ka nunkhum gel tausang bang hi e.
Tanggual maimit ka duang baang ve’n
ka ngaih kibaanna zong ka hi e,
11 Solomon in Baal Hamon ah
gam lenggui huan zun hi e.
Lenggah hambang a huai ni ciang
ngun shekel tulkhat ciat a kai e.
12 Ka lenghuan bel kei thu hi e,
a ngun shekel tulkhat bel
nang huai ding hi e,
Solomon aw, nguntang zanih
singgah khawmte thaman ding hi e.
Sannem
13 Khanghuan a tengte aw e
huan cing sengual ngaihteng tawh,
tongdam mal zinbang
hong khak dih lai ve aw!
Ngaihno
14 Sensan ka sannem laitual hong leeng inla,
tumtai namcin a pona’ tang ii tungah,
khisano le zuksialno bang
ka siang hong tualbual ve aw.