22
1 Hauh mahmah sangin min hoih deihhuai zaw a;ngun le kham sangin mite sangmuhna hoihzaw hi.
2 A zawng le a hau in neihkhawm nei uh hi;
amaute khempeuh a Bawlpa, TOPA ahi hi.
3 A kidawm thei mi in lauhuaina mu-in bu a,
mimawl in ahileh phusuakin a thuak hi.
4 Kiniamkhiatna le TOPA kihtakna in
hauhna, pahtawina le nuntakna a tun hi.
5 A gilote lampi ah lingte le thangte om a,
a nuntakna a kem mi in ahileh tuate gamlapi-ah a pel hi.
6 Naupang khat a pai nading lampi ah pantah ba lecin,
a tek dongin a pial nawn kei ding hi.
7 A haupa in a zawngpa uk a,
a leitawipa in a leitawinapa nasem a suak hi.
8 Gitlohna a vawhte in lungkhamna at a,
ama hehna ciangduai kisuksiatsak ding hi.
9 A hawmsem mi in mizawngte a an hawm ahi manin
amah thupha kipia a suak hi.
10 Misimmawhte hawlkhia lecin,
kiselna om loin, kitotna le ki-engkona bei ding hi.
11 Lungsim siang a itte le a kamsiamte in
kumpipa lawmin a nei ding hi.
12 TOPA mit in theihna vil gige a,
mi muanhuai lote kammalte ahileh a lawhsamsak hi.
13 Zongzawte in, "A pualam ah humpi om!"
ahikeh "Kongzing ah hong kithat kha inteh!" ci uh hi.
14 Angkawmnu kam in gum thukpi hi-a;
TOPA thangpaihna nuai-a om mi tua sungah a kia ding hi.
15 Naupang lungsim ah haina a lomin om a,
sekna ciangduai in tuate ama tung pan nawhkhiamang ding hi.
16 Hauh beh nadingin mizawngte a nengniamte le
mihaute letsong piate - a nih in a zawng ding hi.
Mipilte’ Thugente
17 Mipilte thugente thusim inla ngai in;
kong hilhte na lungsim ah kivawh in.
18 Na lungsim ah vom lecin na lungkim dinga,
na kama na zatpah ding ahi hi.
19 TOPA na muan theih nadingin
tuni-in nang mahmah kong hilh hi.
20 Keimah in nang adingin
thu kuppihna le theihna kamvui sawm thum cb,
21 nang hong sawlpa tungah
hoihtaka na dawn theih nadingin
tumaan le a muantak hong hilh in gelh khin hilo ka hi hiam?
22 Zawng tah ci-in mizawngte zawhthawhbawl kei inla,
thukhen zum ah a tasamte nopneh kei in.
23 Amaute tangin TOPA dinga,
amau van a sutte ama’n a sut ding hi.
24 Mi lungtomte lawmin nei kei inla,
a heh baihte tawh kikhawl kei in;
25 a gamtat zuikha-in
nangmah thang kisiah na suak ding hi.
26 Kiciamna-in na khut beng kei inla,
leiba lohsak dingin kiciam kei in;
27 a dit nading nei kei lecin na zat kimlai
na lupna kidokkhia ding hi.
28 Na pute phuhsa
tanglai kigisuangte khin kei in.
29 Nasep a siam mi na mu hiam?
Kumpipa na sem dinga;
mi mawkmawk na a sem kei ding hi.