20
1 Zu in mi simmawhsak a, zucil in mi kilaisak hi;tuate lamkhialhsak peuhmah a pil lo ahi hi.
2 Kumpipa thangpaihna, humpinelkai hawk tawh kibang a;
amah a hehsakte in a nuntakna tanlawh hi.
3 Kisel ding a kidaam mi, mite in pahtawi a,
a hai peuhmah lah a kitawng pahpah hi.
4 Mi zongzaw in lokhawh hunin kho lo a;
anlak hunin a lak ding bangmah a om kei pah hi.
5 Mihing lungtupte tui thukpi hi-a,
a theitel mi in ahileh tuate a dimkhia hi.
6 Mi a tamzaw in itnakip nei-in kigen ciat uh a,
ahi zongin mi muanhuai kua in mu zo ding hiam?
7 A thumaan mi, kawkbang loin nungta a;
ama nunga a tate in thupha ngahlawh uh hi.
8 Thukhen dingin kumpipa a tokhom ah a tut ciangin
gitlohna khempeuh a mit in haihkhia hi.
9 Kua in, "Ka lungsim a siangtho-in ka kem a;
mawh nei loin ka siang hi," ci thei ahi hiam?
10 Tawisuang kikim lo le tehna kikim lo -
a nihin TOPA in kihkhawm hi.
11 Naupang nangawn a gamtatzia panin
a sianthona le a thumaanna kithei hi.
12 Khuazakna bilte le khuamuhna mitte -
tuate gel TOPA bawl ahi hi.
13 Ihmut nuamsa kei in na zawng ding hi;
hak gega in na khamval ding hi.
14 A leite in, "Hoih kei, hoih kei," ci uh a,
a paikhiat ciangin lah a vanlei kisialhpih hi.
15 Kham omin ruby tampi om hi;
theihna tawh a pau muk ahileh suang manpha takpi ahi hi.
16 Khualmi khat tangin mawhlawh tawi nadinga a piak puansilh la inla,
uklah numei tawh a kiciamna ahileh a kiciamna man dingin koih in.
17 Zuauna tawh ngah an khum a,
a nung ciangin kam sungah suangtang dim hi.
18 Hong ngaihsutpih thei ding zongin geel inla;
makai na neih ciang bekin galsim pan in.
19 Mi gensiatna in muanna beisak ahi manin
a kamtam luate peel in.
20 Mi khat in a nu hiam, a pa hiam a hamsiat leh
kawhawm mial sungah a meivak kisumit ding hi.
21 Acila gouluahna ngahpah,
a tawpna ah thupha hi lo hi.
22 "Na khialhna hong thuk na ve’ng," ci kei in.
TOPA ngak in, ama’n hong hu ding hi.
23 TOPA in tawisuang kikim lo kih a,
tehna maan lo in amah lungkimsak lo hi.
24 Mi khat kalsuannate TOPA uk ahi hi;
kua in ama lampi theitel thei ding ahi hiam?
25 Na khatpeuh mawk-appak a,
a kiciamna nung ngaihsut mihing adingin thang suak hi.
26 A pil kumpi in migilote haihkhia a,
an cilna lengpei a hualsak hi.
27 TOPA meivak in mihing kha aa zonga,
a sungtawng dong zongkhia hi.
28 Itna le muanhuaina in kumpipa humbit a;
itna tungtawnin a tokhom kip hi.
29 Khangnote minthanna in a thahatna uh hi-a,
putekte thupina in a samkang uh ahi hi.
30 Vuakna le liamma in gitlohna siangsak a,
satna in a sungtawng dong khuahsiang hi.