16
1 Lungsima geelna mihing aa hi-a,leii a dawnna ahileh TOPA tung pana pai ahi hi.
2 Mihing in a lampite khempeuh ah mawhpeng kisa a,
TOPA in ahileh lungsima sawmnate a khingkhai hi.
3 Na sep peuhmah TOPA tungah ap in
tua hileh na geelna na zo ding hi.
4 TOPA in na khempeuh a tawpna ding bawl a -
migilote nangawn siatna ni adingin a bawl hi.
5 Lungsim kiphasak khempeuh TOPA in kih hi.
Hih thu tel in: Dan tuak loin a om kei ding hi.
6 Itna le muanhuaina tawnin mawhna maisiang a,
TOPA kihtakna tawnin mihing in gitlohna a peel hi.
7 Mihing khat lampite in TOPA a lungkimsak ciangin
a galte nangawn amah tawh kilemin tengkhawmsak hi.
8 Thutang lo a tampitak ngah sangin,
thumaan-a tawmno ngah hoihzaw hi.
9 Mihing in a maban ding geelkhol a,
ahi zongin TOPA in a kalsuanna uk hi.
10 Kumpipa mukte in thusuak bangbang genkhia a,
a kam in thutang a lehhek kei hi.
11 Amaan tawikhaina le tehnate TOPA pan hi-a,
ip sunga tawisuang khempeuh ama bawlsa ahi hi.
12 Thumaanna tawnin kumpi tokhom
kikipsak ahi manin kumpite in amaan lo gamtatna a kih uh hi.
13 A thumaan mukte ah kumpite lungtai uh a,
thutak a gente manpha sa uh hi.
14 Kumpipa thangpaihna in sih nading thupuakpa hi-a,
mipil in ahileh a thangpaihna daisak hi.
15 Kumpi khat a maitai ciangin kinuntak lawh a;
ama angvanna in guah a paii tukmeii tawh kibang hi.
16 Kham sangin pilna ngah ding hoihzaw tham a,
ngun sangin theihtelna teel ding hoihzaw tham si!
17 A thutangte’ lam lianpi in gitlohna peel a;
ama lampi a kem mi in, a nuntakna kem ahi hi.
18 Kisiatna ma-in kiphatsakna masa a,
pukna ma-in kihihsakna lungsim masa hi.
19 A kiphasakte tawh vansuh hawm sangin lungsim niamkhiat a,
kinengniamte lak a om hoihzaw hi.
20 Lamlahna a thusimte a daupai a,
TOPA a muang mite thupha ngah ahi hi.
21 Lungsim pilte thu khaikak thei kici a,
kamkhum in lamlahna ba behlap hi.
22 Theihtelna a nei mi adingin nuntakna tuikhuk hi-a,
haina in ahileh a haite dan tuaksak hi.
23 Mipilpa a lungsim in a kampau makaih a,
a muk in lamlahna a behlap cb hi.
24 Kamkhum in khuaizu pheng hi-a,
hinna adingin khumin guhte damna ahi hi.
25 Mi khat adingin amaan dinga kilawm lampi khat om a,
ahi hangin tua in a tawpna ah sihna tun hi.
26 Nasempa ankam-limna in ama ading na semsak a,
a gilkialna in nasemin sawlsawl hi.
27 Migilo in gitloh sawma,
ama kampau, a hultum thei meikuang bang hi.
28 Lungsim kawite in kitotna piangsak a,
gensiatna in lawmta khen hi.
29 Mi ngongtat in a vengpa zolin
a hoih lo lam totpih hi.
30 A mit phoisakte thu kawi bawlnuam hi-a;
a muktukte gitloh sawm ahi hi.
31 Samkang in thupina lukhu hi-a,
thumaana nuntakna hanga kingah ahi hi.
32 Galhang khat sangin lungduai khat hoihzaw a,
khuapi khat a zopa sangin a lungsim a uk zopa hoihzaw hi.
33 Angkawmah ai a kisan hangin
a khentatna peuhmah TOPA aa ahi hi.