11
1 TOPA in tawisuang maan lo kihatehna maan lian ahileh a lungkim hi.
2 Kisaktheihna in hong maimawlsak a,
kiniamkhiatna ahileh pilna ahi hi.
3 A citakte a cihtakna un makaih a,
a muanhuai lote ahileh a zuautatna un susia hi.
4 Thangpaih hunin hauhna in man nei lo a,
thumaanna in ahileh sihna panin a hu hi.
5 Kawkbaanna om lo thumaanna in a mau adingin lamtang sialsak a,
migilote ahileh amau gitlohna in a puksak hi.
6 A thutangte’ thumaanna in a maute hu-a,
a muanhuai lote ahileh amau lunggulhna hoih lo ah a awk uh hi.
7 Migilo khat a sih ciangin ama lametna mangthang a,
a vangliatna pana ki-ummawh teng a guaksuak hi.
8 Thumaan mipa lungkhamna pan kihu a,
ama tangin migilopa tungah tung hi.
9 Pasian nei lopa kam in a vengpa susia a,
theihna tungtawnin a thumaanpa suakta hi.
10 Thumaan mipa a daupai ciangin khuapi lungnuam a;
migilo a manthan ciangin lungdam a kikona a om hi.
11 Thutang mi khat’ thupha tungtawnin khuapi kitawisang a,
migilo kam hangin khuapi kisia hi.
12 Thu khencian thei lopa in a vengpa nuihsan a,
thu theitelpa ahileh a ki-ip thei hi.
13 Mi kamtamte in thusim tehkha teitei a,
a muantak mi in ahileh thu im hi.
14 A kimakaih lo minam puk a,
mi tampi thudot in gualzawhna kician a tun hi.
15 Mel theih loh mi mawhna a puaksakpa in thuak pelmawh dinga,
kiciamna-a khut beng nuam lopa a suakta ding hi.
16 A dik numei kizahtak a,
a hiamgamh pasal in ahileh hauhna bek a ngah hi.
17 A migipa amahmah phattuamna hi-a,
a kheltatpa ahileh amahmah siatna kitun ahi hi.
18 Migilopa thalawh thaman in khemna hi-a,
thumaanna a vawhpa in ahileh pahtakman at teitei hi.
19 A thumaan taktak mi in nuntakna ngah a,
gitlohna a delhpa in a sihlawh hi.
20 TOPA in mihing lungsim lehtatte kih a,
kawkbaang lo-a nungtate a pakta hi.
21 Hih thu telcian in: Migilote in dan tuak loin a om kei ding hi;
a thumaan mite ahileh a suakta ding uh hi.
22 A kidawm thei lo numei melhoih,
vok naka kham nakbah bat tawh kibang hi.
23 A thumaante lunggulhna a hoih bekbek suak a,
migilote lametna ahileh thangpaihna bek ahi hi.
24 Mi khat in pia ziahziah napi, a tamzaw ngah a,
adang khat cil tentan napi zawng semsem zaw hi.
25 A cingh mipa a daupai dinga,
midang a thamalhsakte amau kithamalhsak ahi hi.
26 Antang kholkhol te kihamsiat a,
a zuak nuamte thupha kikhusak hi.
27 A hoih zongte in deihsakna mu uh a,
gitlohna a zongte tungah gitlohna mah a tung ding hi.
28 A hauhna a muang peuhmah puk dinga,
thumaanna ahileh singteh pha hing tawh kibang ding hi.
29 A innkuan tungah lunghimawhna a tun mi kihawmkhai dinga,
mihaite, mipilte nasem a suak ding hi.
30 Thumaanna gah in nuntakna singkung hi-a,
mihing lungsim zo mi mipil ahi hi.
31 Thumaante in leitung ah thaman sang uh ahileh
a pasian-milote le mawhneite in tam sanzaw ngel ve!