Solomon’ Paunakte
10
1 Solomon’ paunakte:Tapa pil in a pa lungnuamsak a,
tapa hai in ahileh a nu dahsak hi.
2 Amaan lo-a ngah goute in man nei lo a,
thumaanna in ahileh sihna panin hukhia hi.
3 TOPA in a thumaante gilkialsak lo a,
migilote deihluatna a khaktansak hi.
4 A thadah khut in, mi zawngsak a,
a thanuam khut in ahileh hauhna a tun hi.
5 Nipi lai-a an khawmpa tapa pil hi-a,
anlak huna lumpa ahileh a zahlak tapa ahi hi.
6 A thumaante in thupha khu uh a,
migilote ba kam in ngongtatna bekbek a gen hi.
7 A thumaante phawkna thupha hi dinga,
migilote min ahileh a muat ding hi.
8 Lungpil mi in thupiak sang thei a,
mihai kamtam in ahileh siatna a thuak hi.
9 A citak mi pai hiathiat a,
thukawi bawl mi ahileh a kiphawkkhia ding hi.
10 Mi mitsiik-atpa in lungkhamna tuak a,
mihai kamtam in siatna tuak hi.
11 Thumaan mite kam nuntakna tuikhuk hi-a,
migilote kam ahileh ngongtatna in a tuam hi.
12 Muhdahna in kitotna piangsak a,
itna in ahileh khialhna khempeuh khuhcip hi.
13 Thu theikakte muk ah pilna kimu a,
thukhentel lo pa nungzang in ciangduai a thuak hi.
14 Mipil in theihna khol a,
mihai kam in ahileh siatna a sam hi.
15 Mihaute hauhna in amau kulh nei khuapi hi-a,
mizawngte siatna ahileh zawnna ahi hi.
16 A thumaante thaman nuntakna hi a,
migilote sumtum ahileh dantuahna ahi hi.
17 Sektatna a thusim mi nuntakna lampi tawn hi-a,
kipuahphat ding a awlmawh lo mi in ahileh midangte lam khialsak hi.
18 A muhdahna a imte mi zuauphuak hi-a,
mi gensiat hat peuhmah mihai ahi hi.
19 Thu tampi genna ah mawhna kihel teitei a,
a kam ip theite a pil ahi hi.
20 A thumaan mite leii ngun hoih pen hi-a,
migilote lungsim ahileh man nei lo hi.
21 A thumaan mi muk in tampi vak a,
mihaite ahi uh leh thukhenna a theih loh manun si uh hi.
22 TOPA thupha in hauhna tun a,
lunghimawhna a behlap kei hi.
23 Mihai in tatsiat nuamsa a,
theihtelna nei mi in ahileh pilna a pakta hi.
24 Migilo in a kihtak pen tuak dinga,
a thumaante a deihdeih uh kipia ding hi.
25 Huihpi in a nawk ciangin migilote mangthang a,
a thumaante ahileh kiptakin ding den hi.
26 Ha adingin lenggahtui thuk le mit adingin
meikhu bangin a sawlpa adingin thadahte tua bang ahi hi.
27 TOPA kihtakna in nuntakna sotsak a,
migilote nuntak kum a khiapsak hi.
28 A thumaante mailam hun lungnopna hi-a,
migilote lametna ahileh a guaksuak hi.
29 TOPA lampi in thumaan mi belh hi-a,
a tatsiate adingin ahileh kisiatna ahi hi.
30 A thumaante kibulkalh ngei lo dinga,
migilote in ahileh ten nading mun a ngah zo kei ding uh hi
31 A thumaan mi kam panin pilna suakkhia a,
kamsia pauna leii a ki-attan ding hi.
32 A thumaan mi muk in a kilawm thei a,
migilo kam in ahileh thukawi bek thei hi.