Pilna mah Thupipen
4
1 Ka tapate aw, pate lamlahna ngai unla,thusimin theihtelna ngah un.
2 Sinna picing kong pia hi;
kong hilhna nawlkhin kei un.
3 Ka nu ta neihsunin ka pa inn ah
naupang moi-a ka om lai-in
4 amah in, "Na lungsim neih zahin ka thute lenkip inla,
ka thupiakte zui lecin na nungta ding hi.
5 Pilna ngahin theihtelna ngah in;
ka thugente mangngilh kei inla, pialkhiatsan kei in.
6 Pilna pialsan kei lecin ama’n hong dal dinga,
amah it lecin ama’n nang hong cing ding hi.
7 Pilna thupipen ahi manin pilna zong in.
Na neih khempeuh ba na bei lawh zongin theihtelna zong in.
8 Pilna thupisak in, nang hong tawisang ding hi;
amah pom in, nang hong pahtawi ding hi.
9 Na lutang ah kilawmna pakkhi hong khimsak dinga,
a thupi kumpi lukhu hong khusak ding hi," hong ci hi.
10 Ka tapa aw, ngai-in ka thugen sang in;
na khan sawt ding hi.
11 Na pil nading lammaan ah kong pi a,
lamtang kong zuisak hi.
12 Na pai ciangin na kalsuanna hong dal om lo ding hi.
na tai ciangin na kimuktu kei ding hi.
13 Lamlahna lenkip inla khahsuah kei in;
na nuntak nading ahi manin limtakin cing in.
14 Migilote’ lampi tawn kei inla,
mikheltatte’ lampi zui kei in.
15 Tua lampi pel inla, tawn kei in;
tua pan kiheikhia inla, nang lampi ah pai in.
16 Migilote a sia khat a bawl mateng ihmu thei lo uh a,
mi khatpeuh a puksak matengun a ihsip kei uh hi.
17 Amaute in gitlohna annekin nei uh a,
ngongtatna zudawnin a nei uh hi.
18 Thumaan mite’ lampi ahileh ni suak tung nizang banga,
sun nitang a bat dong a tangpha semsem hi.
19 Ahi hangin migilote’ lampi khuamial thukpi banga;
amau in a muktusak a thei kei uh hi.
20 Ka tapa aw, ka thugen thusim inla,
ka kammalte limtakin ngai in.
21 Mitkhah loin en gige inla
na lung sungah kem in;
22 a mute adingin tuate nuntakna hi-a,
mihing khat pumpi bup adingin damna ahi hi.
23 Lungtang in nuntakna nak ahi manin
na khempeuh sangin lim kep zaw in.
24 Na kam panin thukawi paukhia kei inla;
na muk panin kam hoih lo pau kei in.
25 Na mailam tangtakin en inla
na mailam mah mitsuan gige in.
26 Na zuih lampi maihtam ab inla,
a kipte bek tawn in.
27 Taklam le veilam ah pial kei inla,
gitlohna lampi tawn kei in.