Pilna hanga Phattuam Thuahnate
3
1 Ka tapa aw, kong hilhna mangngilh kei inla,ka thupiakte na lungsim ah kem in.
2 tuate in na khan kum tampi sotin
na dau paisak ding hi.
3 Itna le muanhuaina khahsuah kei in;
na ngawng kimkotah vial inla;
na lungtang pek tungah gelh in.
4 Tua hileh Pasian le mihing muhna ah
angvanna le minpha na ngah ding hi.
5 Na lungsim khempeuhin TOPA muang inla,
nang theihtelna tungah kinga kei in;
6 na gamtatna khempeuh ah amah phawk in,
tua hileh na lampi tangsak ba ding hi.
7 Nang kimuhna ah pil kisa kei in;
TOPA kihta inla, gitlohna peel in.
8 Hih in na pumpi adingin thamalhna hi dinga,
na guhte adingin malhna hi ding hi.
9 Na hauhna le na ankung khempeuh-a
gahmasa-in TOPA pahtawi in;
10 tua hileh na saal dimlet dinga,
na lenggah sukna beel ah zuthak a dimlet ding hi.
11 Ka tapa aw, TOPA hong sekna thusim lo kei inla,
ama hong taihilhna hehsan kei in,
12 bang hang hiam cih leh pa in a pahtak tapa a sek bangin
TOPA in a itte sek ab hi.
13 Pilna mu a, theihtelna a ngahpa
thupha ngah ahi hi;
14 tua in ngun sangin met theizaw a,
kham sangin a gahsuahzaw hi.
15 Ruby sangin manphazaw a;
nang deihtheih khatpeuh tawh kiteh thei lo hi.
16 A taklam khut ah khansauna om a;
a veilam khut ah hauhna le pahtawina a om hi.
17 Ama lampi nuam a,
a lampi khempeuh kilemna ahi hi.
18 Amah a pom mi adingin nuntakna singkung hi-a,
amah a lenden mi in thupha a ngah ding hi.
19 TOPA in pilna tawh leitung bulpi phut a,
ama theihtelna tawh a mun takah vantungte a koih hi.
20 Ama theihna-in tuithukte kikhen a,
meiite in daitui a kiasak hi.
21 Ka tapa aw, akip thukhenna le theihkakna len inla,
tuate en gige in;
22 tuate nang adingin nuntakna hi dinga,
na ngawng a kilawmsak kizepna hi ding hi.
23 Tua hileh lungmuangin na nungta dinga,
na muktu kei ding hi;
24 na lup ciangin na lau kei dinga;
na ihmut a nuam ding hi.
25 Bingtuahsiatna kihta kei inla migilote tunga
tung tuahsiatna zong kihta kei in,
26 ahang in nang khamuanna TOPA hi dinga,
thanga awk lo dingin na khe a kem ding hi.
27 Nang hih zawh ding ahileh
huh tuakte huh ding lungsit kei in.
28 Tu-a na neih gige pi mah -
na vengpa kiangah,
"Hong pai kik in; zing ciang hong pia ning," ci kei in.
29 Nang hong muanga na kianga teng
na vengpa nat nadingin sawmsim kei in.
30 Nang hong nasak lo mipa tungah
a thu om lopi-in mawhsak kei in.
31 A ngongtat mi eng kei inla
a gamtatzia zong teel kei in;
32 ahang in, a lehtat mi TOPA in kih a,
a thutang mi a muang hi.
33 TOPA in migilote’ inn hamsiat-a,
a thumaante innsung thupha a pia hi.
34 Amah in a kiphasak mi simmawhte simmawh a,
a kiniamkhiatte a hehpih hi.
35 Mipilte in pahtawina luah uh a,
mihaite ahileh kimaizumsak hi.