118
1 TOPA hoih ahi manin ama tungah lungdam ko un;ama itna kip tawntung hi.
2 Israel in:
"Ama itna kip tawntung hi," ci uh hen.
3 Aaron innkuante in:
"Ama itna kip tawntung hi," ci uh hen.
4 TOPA a kihtate in:
"Ama itna kip tawntung hi," ci uh hen.
5 Ka lunggim hunin TOPA ka sam a,
ama’n hong dawngin kei hong khahkhia hi.
6 TOPA in kei hong ompih hi; ka lau kei ding hi.
Mi in kei bang hong cih thei ding ahi hiam?
7 TOPA in kei hong ompih hi; amah kei hong huhpa ahi hi.
Ka galte tungah gualzo-in ka en ding hi.
8 Mihing i muan sangin
TOPA belh hoihzaw hi.
9 Gam-ukte i muan sangin
TOPA belh hoihzaw hi.
10 Minamte khempeuh in kei hong umcih uh hangin
TOPA minin amaute ka khaktan hi.
11 Amaute in ka kim ka pam ah hong umcih uh hangin
TOPA minin amaute ka khaktan hi.
12 Amaute in khuaipi hon bangin kei hong pumtuam uh hangin
linglak kang bangin manlangin a simang uh hi;
TOPA minin amaute ka khaktan hi.
13 Kei hong kithalsawnin ka puk dek hangin
TOPA in kei hong huh hi.
14 TOPA ka thahatna le ka zaila hi a;
keima hotkhiatna a suak zo hi.
15 Gualzawhna le lungdama kikona in
a thumaante puanbuk sung thawn a:
"TOPA khut taklam in a thahat nate sem khin ta!
16 TOPA khut taklam a sangin kilamto a;
TOPA khut taklam in a thahat nate sem hi!" ci hi.
17 Kei si loin ka nungta dinga,
TOPA sepsa ka tangko ding hi.
18 TOPA in nasiatakin hong taihilh hangin
sihna hong thuaksak zen lo hi.
19 Thumaanna kongpite kei hong hon in,
lutin TOPA tungah lungdam kong ko ding hi.
20 Hih in TOPA kongpi hi-a,
thumaan mite lut theih nading ahi hi.
21 Kei hong dawng na hi manin lungdam kong ko ding hi.
Keima hotkhiatna na hi ta hi.
22 Inn lamte nolh suangin
innkhum nang suang suak zo hi.
23 TOPA in hih sem khin a,
eite mitmuh in a piandang hi.
24 Tu-ni TOPA bawlsa ahi hi;
eite’n nuamsa in kipak ni.
25 TOPA aw, kote hong honkhia in;
TOPA aw, kote zawhna hong pia in.
26 TOPA mina hong paipa thupha ngah ahi hi.
TOPA inn panin nang aa thupha kong pia uh hi.
27 TOPA in Pasian hi-a,
ama khuavak eite tungah hong tangsak hi.
Khut ah singhiang tawisa in,
biakna-tau’ kite dongin bb pawi bawlin hong kizomsak hi.
28 Nang ka Pasian na hi hi, lungdam kong ko ding hi;
nang ka Pasian na hi hi, nang kong tawisang ding hi.
29 TOPA hoih ahi manin ama tungah lungdam ko un;
ama itna kip tawntung hi.