La khat. David phuah phatna-la khat
108
1 Pasian aw, ka lungsim kip hi;ka hinna khempeuhin la sa-in ka gingsak ding hi.
2 Harp le lyre khanglo dih un!
Zingsang phalvak ka phong ding hi.
3 TOPA aw, minamte lakah nang kong phat dinga;
mite lakah nang, la-in kong sa ding hi.
4 Ahang in, na itna lianin, vante sangin sangzaw a;
na muanhuaina in huih khuate a ban hi.
5 Pasian aw, vante tunglam ah hong kitawisang henla,
na minthanna leitung teng dim hen.
6 Na itte a kihutkhiat theih nadingin
na khut taklamin kote hong hon inla hong huh in.
7 Pasian in ama munsiangtho panin:
"Gualzo-in Shechem ka phelkham dinga,
Succoh Kuam ka tehkhia ding hi.
8 Gilead kei aa hi-a, Manasseh kei aa ahi hi;
Ephraim ka siklukhu hi a,
Judah ka ciangkhut ahi hi.
9 Moab ka kisilna tuikuangpi hi-a,
Edom tungah ka khedap kaih ka sing a;
Philistia tungah gualzo in ka kiko hi," ci-in gen khin hi.
10 Kua in kulh nei khuapi ah kei hong puak ding ahi hiam?
Kua in Edom hong tunpih ding hiam?
11 Pasian aw, kote hong nolh a,
ka galkapte uh a kuanpih nawn lo, nang hi lo na hi hiam?
12 Mihing huhna man nei lo ahi manin
kote galdona ah hong huh in.
13 Pasian tawh eite i gualzo dinga,
amah in i galte a tuancil ding hi.