105
1 TOPA tungah lungdam ko-in a min lo unla;ama sepsate, minamte lakah kitheisak un.
2 Amah la sak un, amah phatna la sak un;
ama nasep lamdang teng genkhia un.
3 A min siangtho thangta hen;
TOPA a zongte lungsim nuam ta hen.
4 TOPA le ama hatna enin;
ama maitang zong den un.
5 Ama sepsa a lamdangte,
ama nalamdang bawlte le a genkhiat a thukhennate,
6 no a nasempa Abraham suante aw,
no ama teelsa Jacob’ tapate aw, phawk gige un.
7 Amah eite Pasian, TOPA hi-a;
a thukhennate leitung khempeuh ah a om hi.
8 Amah in a thukhunsa phawk tawntung a,
a thupiaksa kammal khang tulkhat dong a phawk hi,
9 tua in Abraham tawh a bawl thukhun
Isaac tungah tomlo-a a thuciam ahi hi.
10 Amah in Jacob tungah thukho-in kipsakin,
Israel tungah tawntung thukhunin kipsak a:
11 "Nang tungah tanga na luah dingin
Canaan gam kong pia ding hi," ci hi.
12 Amaute tawmkha bek pha uh a,
tawm takpi-in tua lai-ah mikhual suak uh a,
13 gamkhat pan gam khat,
kumpi-gam khat pan adang khatah a pai kawikawi uh hi.
14 Amah in amaute kuama nuainet ding phal loin;
amaute a khual kumpite tai a:
15 "Ka sathau nilhte lawngkha kei unla;
ka kamsangte nasak kei un," ci hi.
16 Amah in leitang tungah kialpi samsuk a,
amaute an ngahna khempeuh suksiatsakin;
17 amaute mai-ah mi khat sawla -
sila bangin Joseph a kizuak hi.
18 Amaute in kol bulhin a khete kolhsak uh a,
a ngawng ah sikkualte tawh khihin,
19 ama magensate a tunkim mateng,
TOPA’ kammalin amaan a hina a lah matengin a tua cih uh hi.
20 Kumpipa in amah khah dingin mi sawl a,
mite ukpa in amah suaktasak hi.
21 Amah in a innkuan sung ukpa-in koih a,
a neihsa khempeuh uksakin
22 ama lungkimna bangin a kumpitapate lamlaksak a,
a upate pilna a hilhsak hi.
23 Tua ciangin Egypt ah Israel lut a;
Ham gam ah Jacob, pemta-in a teng hi.
24 TOPA in ama mite pungsak mahmah hi;
a galte adingin a tam lua zahin bawla,
25 ama mite mudah dingin amaute lungsim heisaka,
ama nasemte a sawmsimsak hi.
26 Amah in ama teelsa Aaron le
a nasempa Moses a sawl hi.
27 Amaute gel in amaute lakah ama lim lamdangte bawl uh a,
a nalamdangte Ham gamah a bawl uh hi.
28 Amah in khuamial sawlin tua gam a mialsakna -
amaute in ama thute a lehdo man uh hi lo hiam?
29 Amah in a tuite uh sisan suaksak a,
a ngasate uh a sisak hi.
30 A gam uh uiphuk dimsak a,
amau gam-ukte lupna inndei sungah a kahto hi.
31 Amah kam pau a, thopi le cippi honpi
a gam sungteng uh a tung hi.
32 Amah in guahtui gialtang suaksakin
amau gam sung tengah khua phiasak hi;
33 a lengguite uh le a theikungte uh denggawpsakin
amau gam sunga singkungte a dengpalhsak hi.
34 Amah kam pau a, kaukhup
le kauphe sim zawhloh a tung hi;
35 tuate in gam sunga singkung le lohing teng gaitum a,
a lei hoih panun a piang teng gaikhin hi.
36 Tua ciangin amaute gam sunga ta masa khempeuh,
pisal pana gahmasa khempeuh a vatlum hi.
37 Amah in ngun le kham tawh Israel paikhiatpih a,
amau behte lakah a gina lo khat beek a om kei hi.
38 Israel kihtakhuaina amau tungah tung ahi manin
amaute a paikhiat uh ciangin Egypt-te a nuam uh hi.
39 Amaute tuam dingin meiipi kaisak a,
zana a khuavak dingun mei a pia hi.
40 Amaute in ngen uh a, vamin pia-in
amaute vantung anlumin a taisak hi.
41 Aman suangpi khangkhamsak a, tui kikhawhkhia-in,
sehnel-gam ah gun bangin a luang hi.
42 Ahang in, amah in a nasempa
Abraham tunga a kamciamna siangtho a phawk gige hi.
43 Amah in a mite lungnuamtakin paikhiatpih a,
ama teelsate nuama kikona tawh paikhia uh a;
44 amaute tungah minamte’ gamte pia-in
midangte thalawhsa gamh luah uh a -
45 tua pen amaute in a thusehte le a thukhamte
a zuih theih nading uh ahi hi.
TOPA phat un. aa