Tumtheih makaipa ading. Jeduthun ading. Asaph phuah. Phatna-la khat.
77
1 Pasian tungah huhna ngenin ka kikokhia hi;Pasian hong zak dingin ka kikokhia hi.
2 Ka lungdon ciangin Pasian ka sam hi;
zanin ka khut gimsak loin ka zakkhia a,
ka hinna a kihehnem thei kei hi.
3 Pasian aw, nang hong phawkin ka mau hi;
ka lungsim ka geelgeel a ka kha a bah ta hi.
4 Ka mit na mitsisak kei a,
lungkham lua-in ka pau kei hi.
5 A beisa nite le kum sawtpi laite
ka ngaihsun hi;
6 zana ka la sakte ka phawk hi.
Ka lungsim in geelgeelin ka kha in dong a:
7 "Topa in eite hong nial den tam maw?
Ama angvanna hong lak kik nawn kei ve maw?
8 Ama itna kip mangsuakta hi ve maw?
Ama thuciam kipeel den ta ve maw?
9 Pasian in a lainat ding mangngilh ahi tam?
Amah hehin ama khuatuahna dok kik ta ahi tam?" ci hi.
10 Tua ciangin hih thu: "Sang Penpa taklam khut seplai kumte,
ngen lai ning," ci-in ka ngaihsun hi.
11 TOPA’ sepsate ka phawk ding hi;
hihi, tanglai-a na bawl nalamdangte ka phawk ding hi.
12 Na nasepte khempeuh ka lungngaingai dinga,
a thahat na nasepte khempeuh ka ngaihsunsun ding hi.
13 Pasian aw, na lampite a siangtho hi.
Eite Pasian zah a lian bang pasian om ahi hiam?
14 Nalamdangte a bawl Pasian nang na hi-a;
mite lakah na vangliatna na lakkhia hi.
15 Na khut thahatin nangma mi,
Jacob le Joseph’ suante na tankhia hi.
16 Pasian aw, tuite in nang hong mu uh a,
tuite in nang hong mu-in a kivei uh hi;
tui thuk mahmahte a kilok damdam uh hi.
17 Meiite in tui buasuk a,
vanging in huihkhuate a thawn hi;
na thaltangte a suktaan a totaan hi.
18 Pingpei lakah na vanging kiza a,
na khuaphia in leitung buppi taanin,
leitung lingin a kising hi.
19 Na khelam tuipi tungah pai a,
na lamlianpi tuihatte tungah pai napi,
na khekhapte a kimu kei hi.
20 Nang mah in na mite tuuhon bangin
Moses le Aaron’ khutin na makaih hi.