Tumtheih makaipa ading. "Susia kei in" aw a sak ding. Asaph phuah phatna-la khat. La khat.
75
1 Pasian aw, nang tungah lungdam kong ko uh hi,na Min hong nai ahi manin lungdam kong ko uh hi;
mite in na bawl nalamdangte gen uh hi.
2 Nang, "A kiseh hun ka teel a;
thutanga thukhenpa kei ka hi hi.
3 Leitung le a mite a kilin ciangin
a khuampite a lenkip keimah ka hi hi.
4 A kihisakte tungah, ‘Kiphasak nawn kei un,’ ka ci a,
a gilote tungah, ‘Na kite vik nawn kei in.
5 Vantung langah na kite likto ke’n la;
ngawng paksa in pau kei in,’ ka ci hi," na ci hi.
6 Nisuahna ahi-a nitumna ahi-a,
sehnel-gam pan ahi zongin mi a tawisang thei khat beek a om kei hi.
7 Ahi hangin thu a khen Pasian hi a:
Amah in khat niamkhiatin adang khat a tawisang hi.
8 TOPA’ khut sungah hai khat om a,
a namtuite tawh a kihel zu phuan seuhseuh a dim hi;
amah’n sungkhia a, leitunga migilote in
a bei siang dongin a dawnsuk uh hi.
9 Ke’n ka hileh hih ka pulak tawntung ding hi;
Jacob’ Pasian tungah phatna la ka sa ding hi.
10 Migilote’ kite khempeuh ka attan dinga,
a thumaante’ kite ahileh a kisangsak ding hi.