Solomon phuah
72
1 Pasian aw, kumpipa tungah na thutang pia in,kumpipa’ tapa tungah na thumaanna pia in.
2 Amah in na mite tungah thumaanin thu khen dinga aa,
a hingimte tungah thutangin thu a khen ding hi.
3 Na mite tungah mualliante in daupaina tun ding uh a,
mualneute in thumaanna gah a tun ding uh hi.
4 Amah in mite lakah a hingimte gum in
a tasamte’ tate hon dinga;
mi nengniamte a suzan ding hi.
5 Amah in ni a om laiteng,
kha a om laiteng khang tawntungin hong thuak keikai bb ding hi.
6 Amah lopa vatsa lo tunga guah zu leh
lei buakkawt guah a bang ding hi.
7 A thumaante ama nuntak sungteng thamalh dinga;
khapi a om nawn loh dong a daupai ding hi.
8 Amah in tuipi panin tuipi dong uk dinga,
Gunpi cc panin leimongte dd dong a uk ding hi.
9 Sehnel-gama behte a mai-ah kun ding uh a,
a galte in leivui a liak ding uh hi.
10 Tharshish kumpite le gamlapi-a tuipi gei-ate in
amah siah puak ding uh a;
Sheba le Seba kumpite in
letsongte pia ding uh hi.
11 Kumpite khempeuh ama mai-ah kun ding uh a,
minam khempeuh in a na sem ding uh hi.
12 Ahang in tasama amah a kote hu dinga,
a huh ding khat beek a nei lo a hingimte a hu ding hi.
13 A zawngkhalte le a tasamte hehpih dinga,
a tasamte sihna pan a hon ding hi.
14 Ama muhna ah amaute sisan manpha sa ahi manin
netniamna le ngongtatna panin amaute a hu ding hi.
15 Amah khansawt hen!
Sheba panin amah kham kipia hen.
Mite in ama adingin thu ngen uh henla,
sun nilohin thupha piapia uh hen.
16 Gamsung khempeuh ah an tampi piang henla
mualneute tungah kiling metmet hen.
Lebanon bangin gahpha henla
gam sunga lopa bangin khanpha uh hen.
17 Ama min kip tawntung henla;
ni a om laitengin kizomsuak ta hen.
Ama tungtawnin minam khempeuh thupha kipia dinga,
amaute in amah thupha ngah ci ding uh hi.
18 Israel Pasian amah bek a piandang na a sempa,
TOPA Pasian kiphat ta hen.
19 A minthang ama min kiphat tawntung henla,
leitung buppi ama minthanna dim hen.
Amen, Amen.
20 Jesse’ tapa David thungetna a khupna ahi hi.