Tumtheih makaipa ading. Unokte’ aw a sak. David phuah
69
1 Pasian aw, tuite in ka ngawng ciang tuum ahi maninkei hong honkhia in.
2 Siksan ding omlohna,
buannawng thukpi ah ka tum hi;
tui thukpite sung ka tunga;
a tuikhang in hong valhtum ta hi.
3 Huh ding ka ngetngetna-in ka tawlgawp a,
ka gawl a keu hi.
Ka Pasian ka zonzonna-in
ka mit a maang hi.
4 A thu om lo a kei hong mudah mi,
ka lu-a ka samzangte sangin tamzaw a;
a thu om lopi-a kei siatsak hong sawm
ka galte a tam hi.
Ka guk lohpi a dinkik dingin
hong kisawl tentan hi.
5 Pasian aw, ka hai lam na thei hi;
ka khialhnate nang panin kisel lo hi.
6 Topa, Thahatpen TOPA aw,
nang hong lamente
kei hangin maimawl kei uh hen;
Israel’ Pasian aw,
nang hong zongte
kei hangin maizum kei uh hen.
7 Ahang in nangma hangin simmawhna ka thuak a,
maizumna in ka mai tuam hi.
8 Ka sanggampa adingin mikhual ka suak a,
keima’ nu’ tapate adingin pemta ka suak hi;
9 na inn ading ka aamna in kei hong netum a,
nang hong engkote’ engkona kei tung hong tu hi.
10 Kap a an ka tan ciangin
zahkona ka thuak ding mah hi-a,
11 puanhampi ka silh ciangin
mite khel gentehna ka suak hi.
12 Kongpi-a tute in hong zahko uh a,
zukhamte’ la ka suak hi.
13 Ahi hangin TOPA aw,
na angvan hunin thu kong ngen hi;
Pasian aw, nangma itna lianpi tawh,
na hotkhiatna takpi-in kei hong dawng in.
14 Buannawi lak panin kei hong hu-inla,
hong tumsak kei in;
hong mudahte pan le tuithukte panin
kei hong hukhia in.
15 Tuikhangte kei hong tuumsak loin
tui thukte kei hong valhsak kei inla,
gum in a kam hong cihkhum kei hen.
16 TOPA aw, na itna a hoihna hangin hong dawng in;
na lainatna lianpi hangin kei lam hong nga in.
17 Na nasempa na mai hong selsan loin
hong dawng meng in ka lungkham ta hi.
18 Hong naih inla kei hong hu in;
ka galte hangin kei hong tankhia in.
19 Kei hong kizahpih a, maimawlin ka maizum zia nong thei hi;
ka galte khempeuh na mai-ah om uh hi.
20 Zahpihna in ka lungtang kitamsaka
huh ding nei loin hong nusia hi.
Hong khasiat ding mi ka zonga khatbeek om lo hi;
hong hehnem ding ka zonga khatbeek ka mu kei hi.
21 Ka an lakah sinkha hel uh a,
ka dangtak a phat nadingin lenggahzu thuk hong pia uh hi.
22 Amaute mai-a kilui sabuai thangzak suak henla,
thukna le aa pial suak ta hen.
23 Khua a muh theihloh nadingun a mitte uh mial henla,
a nung uh kul den ta hen.
24 Amaute tungah na thangpaihna sung inla,
na hehluatna in amaute phadong hen.
25 Amaute mun kilawi henla;
amau puanbukte ah a teng ding kuamah om kei hen.
26 Ahang in, amaute in na liamsakte bawlsia uh a,
na natsak mite natna a gengen uh hi.
27 Amau mawh khukna tungah mawhkhusak beh inla,
na hotkhiatna tangsak kei in.
28 Nuntakna laibu sung panin amaute kiphiatkhia henla
a thumaante tawh kiciamteh khawm kei hen.
29 Na sa-in ka lung dong hi;
Pasian aw, na hotkhiatna in kei hong dal hen.
30 Pasian’ min la-in ka phat dinga,
lungdamkohna tawh amah ka minthangsak ding hi.
31 Hih in bawngtal khat sang,
kite le khecinte a nei bawngtal khat sangin TOPA a lungkimsakzaw ding hi.
32 A zawngte in mu ding uh a, kipak ding uh hi -
no Pasian a zongte aw, na lungsimte uh thadim hen!
33 TOPA in a tasamte aw za a;
ama koltangte a simmawh kei hi.
34 Leitung le vantung,
tuipite le a sunga gamtang khempeuh in amah phat uh hen;
35 ahang in, Pasian in Zion honkhia dinga,
Judah khuapite a lam kik ding hi.
Tua ciangin tua lai-ah mite tengin a nei ding uh hi;
36 a nasemte’ tate in tua mun luah ding uh a,
ama min a itte tua lai ah teng ding uh hi.