Job
23
1 Tua ciangin Job in dawng a:2 "Tuni nangawnin ka phunna a kha veva hi;
tautau taleng a khut aa gik veve bb hi.
3 Amah ka muh nading thei tapeuh leng;
ama omna ah pai thei hoh leng!
4 A mai-ah ka thu ka tun dinga,
ka kam dimdimin ka gen ding hi.
5 Ama gen ding thu ngaihsunin
hong dawn nading ka theikhia ding hi.
6 Amah in a vanglianpi tawh kei hong langdo tam?
Hi kei, kei hong langbawlin thu hong bawl lo ding hi.
7 Tua lai-ah mi thuman khat in a thu a tun thei ding hi;
tuateh ka thukhenpa kiang panin hong kihukhia den ding hi.
8 "Ahi zongin nisuahna-lam pai taleng tua lai-ah amah na om lo hi;
nitumna-lam pai taleng lah amah ka mu tuan kei hi.
9 Leilu lamah na a sep lai-in amah ka mu kei hi.
leitaw lamah a kihei ciangin amel amang ka thei tuan kei hi.
10 Ahi hangin amah in ka kalsuannna thei a;
kei hong zia-et khit ciangin kham ka bang ding hi.
11 Ama khekhap ka zui cinten a,
pialkhia loin a lampi ka tawn hi.
12 A kama hong thupiakte ka zuikhial kei a;
ka nisim an sangin a kam pana kammalte ka kemcingzaw hi.
13 "Ahi hangin amah bek ding hi, kua in nial zo ding hiam?
Amah in a lungkim peuhpeuh sem hi.
14 Amah in kei langah thukip tungsak a,
tua bang ngimna tampi a khol lai hi.
15 Tuate hangin ama mai-ah ka lau hi;
hihte khempeuh ka ngaihsut ciangin amah ka kihta hi.
16 Pasian in ka lungsim zawmsak a;
Thahatpenpa in kei hong lauthawngsak hi.
17 Ahi zongin khuamialna,
ka maitang a tuam a sah khuamialna in kei hong daisak tuan kei hi.