Esther Kumpinu Suak
2
1 Tua khit Kumpipa Xerxes a hehna a daih ciangin Vashti gamtatnasa le ama tunga a thupiaksate a phawk kik hi. 2 Tua ciangin kumpipa cingte in, "Kumpipa ading nungak bit melhoih zongsak in. 3 Kumpipa in amaute gam ciatah a teel ding mi sehsakin tua a teel uh nungak melhoihte khempeuh kumpipa tenna Susa ah kipuaksak in. Tuate, kumpipa cilgehpa, numeite ukpa kemsak in; amaute a mel hoih nadingun kizemsak in. 4 Tua ciangin kumpipa lungkimna penpen Vashti tangin kumpinu suaksak in," ci-in ngaihsutna a gen uh hi. Hih ngaihsutna kumpipa tungah gen uh a amah in a zui hi.5 Tua hun laitakin kumpipa khua Susa ah Benjamin beh Kish tapa, Shimei tapa, Jair tapa Mordecai kici Jew mi khat a om hi, 6 amah pen Babylon kumpipa Nebuchadnezzar in Jerusalem pan sal-a a kaih, Judah kumpi Jehoiachin aa a matna-a a matkhawm ahi hi. 7 Mordecai in Hadassah kici sanggam khat a nei hi. Tuanu in nu le pa nei lo a amah’n kemin a khansuahsa ahi hi. Hih nu Esther zong kici a, a duang hoih in a ngaihbaang hi; a nu le a pa a sih ciangin Mordecai in a tanu banga a kep ahi hi.
8 Kumpipa thupiakna le thukhauh a kitangko khit ciangin kumpi khua Susa ah numei tampi kipuak-a Hegai kikemsak hi. Esther zong kumpi inn ah kipuak-a, numeite omna inn ukpa Hegai a kikemsak hi. 9 Numeino in amah lungkimsak a amah’n a angvan hi. A mel hoih nadingin mel hoihna za pia-in an lim nono in a vakpah hi. Kumpi inn sungah a kiteeltuam numei sagih sehkhia a, amah le a nasemte omna mun hoih penah a omsak hi.
10 Esther in ama minam le a pianna beh le phung thu a laakhia kei hi; bang hang hiam cih leh Mordecai in tuate a pulak ding a kham hi. 11 Amah numeite omna innhuang nai-ah Esther bangci a, ama tungah bang piang cih a thei dingin nisimin a kileh kawikawi hi.
12 Kumpipa Xerxes kiangah a kilah dong ama hun a tun ma-in a kipuah ding hun kha sawm le nih hi-a, myrrh thau-in kha guk sung kizutin paknamtui le gimnamtui-in kha guk sung kipuah ding uh hi. 13 Tua hi a hih bangin kumpipa kiangah a va kilak hi. Numei kepna inn panin kumpipa inn ah a kem dingin ama deih peuhpeuh a kipia hi. 14 Nitak ciangin tua lai-ah kipaisaka a zingsang ciangin numei kepna-a kumpipa zinote a uk cilgehpa Shaashgaz cinna numei kepna inn ah a kiciahsak hi. Kumpipa a lungkima a minin a sap kei ngal leh a kiangah a kipaisak nawn kei hi.
15 Kumpipa kiangah Esther (Mordecai in a pano Abihail’ tanu a kep) a pai ding hun a tun ciangin numei kepna a cing kumpipa cilgehpa Hegai hihsak zah val bangmah a ngen thuah kei hi. Tua hi a Esther a mu peuhpeuh in a angvan uh hi. 16 Kumpi Xerxes in a uk a kum sagihna a kha sawmna Tebeth kha in amah kumpi inn ah kipaipih hi.
17 Tu-in kumpipa in numei dangte sangin Esther iplahzaw a, ama angvanna ngahin nungak dangte sangin a lungtungzaw tham hi. Tua ciangin kumpi lukhu khusak a, Vashti tangin kumpinu a suaksak hi. 18 Tuateh kumpipa in pawi lianpi khat Esther pawi, a uliante le a zum nasem uliante tawh a bawl hi. Kumpi gamneu khempeuh ah zum khak nading thu thangsak a, kumpipa tawh kituak letsong a hawmkhia hi.
Kisawmsimna Mordecai in Genkhia
19 Nungakbitte a nihveina a kikaikhop hunin kumpipa kongpi ah Mordecai a tu hi. 20 Ahi hangin Esther in Mordecai hilhkholhsa bangin a nualamte thu le a minam a im khinkhian hi; ahang in amah a kikhansuah lai-a Mordecai lahsa bangin a zui suaksuak lai hi.
21 Kumpipa kongpi gei-ah Mordecai a tuttut lai-in kongkhak cing kumpi nasem zalian nih Bigthana bb le Teresh heh uh a, Kumpipa Xerxes thah a sawm uh hi. 22 Ahi hangin Mordecai in tua sawmsimna thei a, Esther tungah ko-in amah in Mordecai genin gena kumpipa a ko sawn hi. 23 Tua thu kikana, a taktak ahilam a kitheih ciangin zum nasem uliante gel khuampi cc dawnah kikhai hi. Hihte khempeuh hih kumpipa omin gam tangthu ciamtehna bu sungah a kiciamteh hi.