Judah Kumpi Manasseh
33
1 Manasseh kumpi a suahin kum sawm le nih pha-a, Jerusalem ah kum sawmnga le nga sung a uk hi. 2 TOPA in Israel-te mai pana a nawhkhiat minamte’ kihhuai gamtatnate amah in zui-a, TOPA muhna-ah a sia-in a gamta hi. 3 A pa Hezekiah in a phiatmangsa munsangte lam kik a; Baal biakna-taute zong dawhin Asherah khuamte a bawl hi. Aksi honte khempeuh tungah kunin tuate a bia hi. 4 TOPA in, "Jerusalem ah ka Min a omden ding hi," a cihna TOPA biakinnpi sungah biakna-taute a dawh hi. 5 TOPA biakinnpi tualte gel ah aksi honte khempeuh biak nading biakna-tau a dawh hi. 6 Amah in Ben Hinnom Kuam sungah biakna-in a tapate mei sungah aa halin khongkhai-in. ai san a, ai tawi-in, sikhate le vankahte thu a dong hi. Amah in TOPA muhna ah a sia tampitak sem-a a heh nadingin a phin hi.7 Amah in a kikhuaksa milimte la-in Pasian biakinnpi sungah koih hi; tua mun pen Pasian in David le a tapa Solomon tungah, "Hih biakinnpi sung le Jerusalem sung pen Israel behte khempeuh pana ka teelkhiat hi-a ka Min ka koih tawntung nading ahi hi. 8 Moses tungtawna ka thupiakte, thukhamte, thukipte, le thukhote - amaute tawh a kisai na pate un limtaka a zuih uh leh amaute ka piaksa leitang, Israel-te khe ka lawisak ngei kei ding hi," a cihsa ahi hi. 9 Tuaci-in Manasseh in Judah le Jerusalem a mite lam khialsak a, amaute in Israel mai-a TOPA in a siatsak minamte sangin a siazaw in a gamta hi.
10 TOPA in Manasseh le a mite hopih napi amaute in a thudon kei uh hi. 11 Tua ciangin TOPA in amaute langah Assyria kumpipa galkap mangte puaka, tuate in thong sungah Manasseh khumin, a nak ah sikawi thuah uh a sumngo kolte bulhsakin Babylon ah a paipih uh hi. 12 Amah lungdong lua-in TOPA a Pasian angvanna zong a, a pate Pasian mai-ah a kiniamkhiat mahmah hi. 13 Tuateh amah in ama tungah thu ngen a, tua ciangin ama maibiakna in TOPA kiheisakin a thumna a ngaihsak hi; tua ahi ciangin a kumpi-gam Jerusalem ah a puak kik hi. Tua ciangin TOPA in Pasian ahilam Manasseh in a thei hi.
14 Tua khit ciangin amah in Gihon tuinak nitumna lam Ngasa Kongpi lutna dong David Khuapi kulh puanung pen ciang kik a, Aphel mual umcihsak in; a sangzaw thamin a bawl hi. Amah in kulha ki-um Judah khuapite khempeuh ah galkap mangte a omsak kim hi.
15 Amah in gamdang pasiante hemkhia-a, TOPA biakinnpi pan a kikhuak milimte lakhia in biakinnpi mualno tunga ama dawhsa biakna-tau khempeuh le Jerusalem sunga kidawh biakna-taute khempeuh phelkhiamang in; khuapi pualam ah a paikhia khawm hi. 16 Tua ciangin TOPA biakna-tau a ngeina bangin dawh kik-a a tungah kilawmtakna biaknate bb le lungdamkohna biaknate pia-in, Judah in TOPA Israel Pasian na a sep nadingun a gen hi. 17 Ahi ta zongin mite in munsangte ah biakna pia kawmkawm uh a, ahi hangin TOPA amaute Pasian tung bek ahi hi.
18 Manasseh in a uk sung a sep dangte Pasian tungah a thungetna le TOPA Israel Pasian mina thumute genna kammalte Israel cc kumpite khangthute sungah kigelh hi. 19 Ama thungetna, a lutna hangin Pasian in a lungsim a khekna le a mawhnate khempeuh le a muanhuai lohna le amah a kiniamkhiat ma-in munsang bawla Asherah khuamte le milimte a koihna phual thute khempeuh thumute dd ciamtehna sungah kigelh hi. 20 A pate tawh Manasseh tawlnga khawm a, a kumpi inn ah kivui hi. Tuateh a tapa Amon in a kumpi za luah a kumpi a suak hi.
Judah Kumpi Amon
21 Amon kumpi a suahin kum sawmnih le nih pha a, Jerusalem ah kum nih sung a uk hi. 22 A pa Manasseh sepsa bangin TOPA muhna ah a sia in a gamta hi. Amon in Manasseh bawlsa milim khempeuh bia in tuate tungah biakna a pia hi. 23 Ahi hangin a pa bangin TOPA mai-ah kiniamkhiat lo a, Amon in a khialhna a khangsak hi.