Senacherib in Jerusalem Linglawngsak
32
1 Hezekiah in muanhuaitakin a sep khempeuh a zawh khit ciangin Assyria kumpipa Sennacherib kuanin Judah a luh hi. Amahmah in zawh sawmin kulh a ki-um khuapite a umcih hi. 2 Sennacherib kuanin Jerusalem sim a sawm lam Hezekiah in a muh ciangin, 3 khuapi pua-a luang tuinakte panin tui khaktan ding thu a uliante le a galkap uliante kikuppih a, amaute in amah a huh uh hi. 4 Mi thahat tampi khawm uh a gam sunga a luangkhia tuinakte le luite khempeuh a khaktan uh hi. Amaute in, "Bang hangin Assyria kumpite ba hong pai-in tui tampi mu ding uh ahi hiam?" a ci uh hi. 5 Tua ciangin kulh kitapna munte khempeuh le a tunga tausangte bawlin na nakpi-in a sem uh hi. Amah in a omsa pen pua-ah kulh khat cianbeh a, David Khuapi dinkipna leicialte cb a cianbeh lai hi. Galhiamte le lumte zong tampitak a bawl beh hi.6 Amah in mite a uk dingin galkap mangte seh a, khuapi kongpi mai-a tual-awng ah amaute kikhawmsakin hanthawn a: 7 "Hat unla hang un. Assyria kumpipa le ama ompih galkap honpi sangin eite hong ompihpa vanglianzaw ahi manin kihta kei unla lungkia kei un. 8 Amah a ompih ci-le-sa galhiam hi beka ei hong ompih ahileh eite hong huh i galte hong dosak ding TOPA eite Pasian ahi hi," ci-in thu a gen hi. Tuateh Judah kumpipa Hezekiah gennasa panin mite a lungmuang uh hi.
9 Tua khit Assyria kumpipa le a galkapte khempeuh in Lachish a umcih uh ciangin Jerusalem ah a uliante sawl-a, Judah kumpipa Hezekiah le tua lai-a om Judah mi khempeuh adingin hih thu khak a:
10 "Assyria kumpipa Sennacherib gen hih ahi hi: A ki-umcih Jerusalem ah na om uh bang bulphuha kimuang na hi uh hiam? 11 Hezekiah in, ‘Assyria kumpipa khut panin TOPA eite Pasian in eite hong hon ding hi,’ ci-in hong makaih khial-a, gilkial dangtakin hong sisak ding ahi hi. 12 Hezekiah mahmah in pasiante munsangte le biakna-taute phiatkhia in Judah le Jerusalem tungah, ‘Note in biakna-tau khat mai-ah bia-in tua tungah biaknate na hal pelmawh ding uh hi,’ ci hi lo ahi hiam?
13 "Kei le ka pate in gamdanga mite khempeuh tungah ka hihsate uh thei lo na hi uh hiam? Tua minamte’ pasiante in kei khut panin a gam uh hukhia thei ngei uh ahi hiam? 14 Ka pa in a siatsaksa hih minamte’ pasiante khempeuh kua pen in kei panin a mite honkhia thei ahi hiam? Kei khut sung panin note Pasian in bangci-in hukhia zo ding hiam? 15 Tu-in hih bangin Hezekiah kikhemsakin kimakaih-khialsak kei un. Amah um kei un, minam ahikeh kumpi-gam khat pasian khatpeuh in a mite kei khut panin ahi-a, ka pate khut panin ahi zongin a hukhia thei kei uh hi. Na pasian un kei khut panin note hong hu zo ngel ve!"a cisak hi.
16 Sennacherib uliante in TOPA Pasian le a nasem Hezekiah langkhatah a uangzaw thamin kam a pau uh hi. 17 Kumpipa in TOPA Israel Pasian engkona laikhakte zong gelh a, ama langkhatah: "Adang gammite pasiante in ka khut panin amau mite a hutzawh loh bang tektekin Hezekiah pasian in zong a mite kei khut panin a hukhia zo kei ding hi," a ci hi. 18 Tua ciangin amaute lau uh a, khuapi a lak theih nadingun amaute a linglawngsak dingin kulh tunga om Jerusalem mite tungah Hebrew pau-in nakpi in a genkhia uh hi. 19 Amaute in amau bawltawm - mihingte khuta kibawl leitung midangte pasiante thu bang lelin Jerusalem a Pasian thu a gen uh hi.
20 Hih thu tawh kisai-in Kumpi Hezekiah le Amoz tapa kamsangpa Isaiah thungenin van tungah a kiko uh hi. 21 Tuateh TOPA in Assyria kumpipa giahphual-a om galkapte le makaite le uliante khempeuh a susiamang ding vansawltak khat a sawl hi. Tua ciangin amah lungkia-in a gamah a nungkik ta hi. Tuateh ama pasian biakinn sungah a pai ciangin a tapate pawlkhat in namsau-in amah a thatlum uh hi.
22 Tuaci-in Assyria kumpipa Sennacherib khut pan le a dangte khempeuh khut panin TOPA in Hezekiah le Jerusalem mite a honkhia hi. Amah in amaute ac mun citeng panin a don hi. 23 Mi tampi in Jerusalem ah TOPA adingin biaknate puak uh a, Judah kumpipa Hezekiah adingin letsong manphate a puak uh hi. Tua huna kipan minamte khempeuh in amah a sangmuh mahmah uh hi.
Hezekiah’ Kiphatsakna, Matutna le Sihna
24 Tua hun lai-in Hezekiah a ci na-in a si dektak hi. Amah in TOPA tungah thu ngen-a, amah in dawngin lim piandang khat a lak hi. 25 Ahi hangin Hezekiah lungtang kiphasak a, amah a kilak migitna a dawng nuam kei hi; tua ahi ciangin TOPA thangpaihna ama tung le Judah tung le Jerusalem tungah a tu hi. 26 Tua ciangin Hezekiah in a lungsim kiphatsakna kisik-a, Jerusalem mite zong a kisik uh hi; tua ahi ciangin Hezekiah a nuntak sungin TOPA thangpaihna amaute tungah a tung kei hi.
27 Hezekiah hau mahmah in kipahtawi mahmah a, a ngun a kham le a suangmanphate, gimnamtuite, lumte le van manpha namkim koih nading vankholnate a bawl hi. 28 Amah in an, zu thak le sathau khol nading innte zong a lam hi; tuateh ganhon namkim khum nadingin ganbuk bawl a, tuuhonte adingin tuubukte a lam hi. 29 Pasian in hauhna tampitak pia ahi manin amah in khuaneute lam a tuuhonte le ganhonte tampitak a ngah hi.
30 Gihon tuinak tungnung khaktan in khekhia a, hawkguam to-in David Khuapi nitumna lamah a luangsakpa Hezekiah mah ahi hi. Amah in a nasepna khempeuh a zo hi. 31 Ahi hangin a gamsungua piang lim piandang thu a dong dingin Babylon gam-ukte in palai a sawl uh ciangin, ama lungsim-a om khempeuh a theih nadingin a zia-etna-in Pasian in amah a nusia hi.
32 Hezekiah uk sunga a sepsa dangte le a ki-ap zawhna dangte Judah le Israel kumpite laibu sunga Amoz tapa kamsangpa Isaiah mangmuhna sungah kigelh hi. 33 Hezekiah a pate tawh tawlnga khawm a David suante han omna mualtung ah a kivui hi. Amah a sih ciangin Judah khempeuh le Jerusalem a mite in a pahtawi uh hi. Tuateh a tapa Manasseh in a kumpi za luaha kumpi a suak hi.