Shishak in Jerusalem Sim
12
1 Rehoboam dinmun kumpi-in a kip khit nungin amah thahat a, ama ompih Israel ba in TOPA thukham a nusia uh hi. 2 Amaute TOPA tungah a muanhuai lohna hangin Egypt kumpipa Shishak in Rehoboam a kumpi suah zawh a kum ngana kumin Jerusalem a sim hi. 3 Sakolleng tul le zanih le sakol tungtuang tulsawmguk le Libya-te, Sukki-te le Cush-te cb galkap sim zawh loh tawh Egypt panin kuankhia uh a, 4 kulha ki-um Judah khuapite la-in Jerusalem dong a tung uh hi.5 Tua ciangin Shishak kihta in Jerusalem a kikhawm Rehoboam le Judah makaite kiangah kamsangpa Shemaiah pai-in amaute kiangah, "TOPA gen hih ahi hi: ‘Note in kei nong nusia uh hi, tua ahi ciangin tu-in note Shishak tungah kong nusia hi,’ ci hi," a ci hi.
6 Israel makaite le kumpipa kiniamkhiat uh a, "TOPA a thutang ahi hi," a ci uh hi.
7 Amaute a kiniamkhiat lam uh TOPA in a muh ciangin Shemaiah tungah hih TOPA thu a tung hi: "Amaute a kiniamkhiat nungsangun, amaute ka susia kei dinga manlangin ka hukhia ding hi. Shishak tawnin Jerusalem tungah ka thangpaihna ka sungkhia kei ding hi. 8 Amaute in keima nasemte le gamdangte kumpite nasemte a kilamdanna a theih nadingun bangbang ahi zongin ama nasem a suak ding uh hi," a ci hi.
9 Egypt kumpipa Shishak in Jerusalem a sim ciangin TOPA biakinnpi le kumpi inn-a om goute a puakhia hi. Ama lak goute khempeuh lakah Solomon in kham tawh a bawl lumte zong kihel hi. 10 Tua ciangin Rehoboam in tuate tang dingin sumngo lumte bawl a, kumpipa inn lutna cingte a ukte a ap hi. 11 TOPA biakinnpi ah kumpipa a pai peuhpeuh ciangin a cingte in amah zui-in lumte keng uh a, tua khit ciangin a kicing inndei ah tuate a ap kik zel uh hi.
12 Rehoboam a kiniamkhiatna hangin ama tung pan TOPA hehna kihei a, amah a susia khin kiuhkeuh kei hi. Hitakpi hi, Judah khua sungah a hoih pawlkhat a om hi.
13 Kumpi Rehoboam amah le amah Jerusalem ah khotakin kikipsak a kumpi a semsuak hi. Amah kumpi a suahin kum sawmli le khat hi-a, Israel behte khempeuh lak panin TOPA in a Min koih nadingin a teelsa khuapi Jerusalem ah kum sawm le sagih sung a uk hi. A nu min Naamah hi a; Ammon-te ahi hi. 14 Amah in TOPA zon ding a lungsim ah nahvawh kha lo ahi manin a sia-in a gamta hi.
15 Rehoboam in a uk sunga a sepsate a kipatna panin a tawpna dong kamsangpa Shemaiah le thumupa Iddo ciamtehnate sungah khangthute tawh kigelhkhawm lo ding ahi hiam? Rehoboam le Jeroboam kikal ah kidona a om den hi. 16 Rehoboam a pate tawh tawlnga ta a, David Khuapi-ah a kivui hi. Tuateh a tapa Abijah in a kumpi za a luah hi.