11
1 Jerusalem ah Rehoboam a tun ciangin Judah le Benjamin innkuante panin - Israel a sim ding le Rehoboam kumpi-gam a la kik dingin - galdo ding pasal tul za le tul sawm giat a kikhawm uh hi.2 Ahi hangin Pasian mi Shemaiah tungah hih TOPA thu a tung hi: 3 "Judah kumpipa Solomon tapa Rehoboam tung le Judah le Benjamin-a om Israel-te khempeuh tungah, 4 ‘TOPA gen hih ahi hi: Na sanggamte uh sim dingin kuanto kei un. Note na inn ciat uah ciah un, hih in keima sep ahi hi, ci hi,’ ci-in gen in," a ci hi. Tua ciangin amaute in TOPA thu mang uh a, Jeroboam sim dinga kuan kimlai a ciah kik uh hi.
Rehoboam in Judah Um
5 Jerusalem ah Rehoboam tenga, a kihut nadingin Judah khuapite a lam hi. Tuate in: 6 Bethlehem, Etam, Tekoa, 7 Beth Zur, Soco, Adullam, 8 Gath, Mareshah, Ziph, 9 Adoraim, Lachish, Azekah, 10 Zorah, Aijalon le Hebron ahi hi. Hihte in Judah le Benjamin ah kulha ki-um khuapite ahi hi. 11 Amah in galdalnate khauhsak zaw in amaute sungah a ukte koih a, an le olive thau le lenggah zu a koih hi. 12 Amah in khuapi tengah lumte le teipite koih a, amaute a thakhauhsak mahmah hi. Tua hi-a Judah le Benjamin ama aa ahi hi.
13 Amau gam sung tenga siampite le Levi-te in amah a panpih uh hi. 14 Levi-te in amau lonona mun le a vante nangawn uh nusia in Judah le Jerusalem ah a pai uh hi, bang hang hiam cih leh Jeroboam le a tapate in TOPA siampi dingin amaute a nial uh hi. 15 Tuateh munsang le ama bawlsa keel le bawngno lim ah ama neihsa siampite sehin a semsak hi. 16 Israel beh ciat panin TOPA Israel Pasian zong dingin a lungsim a kipsaksate in TOPA amau pate Pasian tungah biakna pia dingin Jerusalem ah Levi-te a zui uh hi. 17 Amaute in Judah kumpi-gam thakhauhsak uh a kum thum sung Solomon tapa Rehoboam panpih in hih hun sung David le Solomon kalsuan bangin a kalsuan uh hi.
Rehoboam Innkuante
18 Rehoboam in Mahalath a tenpih hi, tuanu pen David tapa Jerimoth tanu hi in, a nu Jesse tapa Eliab tanu Abihail ahi hi. 19 Tuanu in tapa nei a: Jeush, Shemariah le Zaham ahi hi. 20 Tua ciangin amah in Absalom tanu Maacah tenpih a tuanu tawh Abijah, Attai, Ziza le Shelomith a nei uh hi. 21 Rehoboam in a zi dangte le a zino dangte khatpeuh sangin Absalom tanu Maacah a itzaw hi. Amah in a neih vekpi zipi sawm le giat le zino sawmguk, tapa sawmnih le giat le tanu sawmguk a nei hi.
22 Rehoboam in a sanggamte lak pan amah kumpi a suahsak theih nadingin Maacah tapa Abijah uliante ukpipa in a koih hi. 23 Amah in piltakin sema, Judah le Benjamin gamkhente a kulha ki-um khuapite khempeuh ah a tapate pawlkhat a khenthang hi. Amaute annek ding tampitak pia-in a zi ding uh tampi a laksak hi.