Sheba Kumpinu Solomon kiangah Hawh
9
1 Sheba kumpinu in Solomon minliatna a zak ciangin thudot-na haksa kengin amah zia-et dingin Jerusalem ah a pai hi. Khualzin mi tampitak - gimnamtuite, kham tampi le suangmanpha a pua kala-ohte tawh Solomon kiangah pai-a a lungsim sunga a ngaihsut khempeuh tawh Solomon a hopih hi. 2 A dot khempeuh Solomon in dawnga; tuanu tungah a gentel ding a haksa lua khat beek a om kei hi. 3 Sheba kumpinu in Solomon pilna, a lamsa a kumpi inn 4 a sabuai tunga a annek, uliante tutna, nasemte puansilh, a haitawite puansilh le TOPA biakinnpi sunga meihal biakna-a a piakte aa a muh ciangin a cih nading a thei kei hi.5 Tuanu in kumpipa kiangah, "Ka gam pana ka zak na nasepte le na pilna in thumaan ahi hi. 6 Ahi hangin hong pai-a ka mit mahmah tawh ka muh matengin amaute gen ka um kei hi. Maan takpi hi, na pilna a liatzia a lang zong hong kigen nai lo hi a; ka zakzah sangin na pilzaw tham hi. 7 Na mite nak lungdam na’n cia! Na mai-a ding den na pilna a za na uliante nak lungdam si un cia! 8 Nang tungah lungkim-a, TOPA na Pasian adingin a uk dinga kumpi in hong koih a, ama kumpi tokhom tunga hong tusak TOPA na Pasian kiphat hen. Na Pasian in Israel a it man le a kip den ding a deih manin thumaan le thutangin vaihawma, amaute a uk dingin nang kumpi a hong koih ahi hi," a ci hi.
9 Tua ciangin amah in kham talent bb 120, gimnamtui tampitak le suangmanphate kumpipa a pia hi. Sheba kumpinu in Kumpi Solomon a piakzah gimnamtui a om ngei kei hi.
10 (Hiram mite le Solomon mite in Ophir panin kham a pua uh hi; amaute in cingsing cc le suang manpha zong a pua uh hi. 11 Kumpipa in cingsingte TOPA biakinnpi le kumpi inn kahlei ding le lasate ading harp-te le lyre-te bawl nadingin a zang hi. (Judah gamah tuate tawh a kibang khatbeek a mu ngei kei hi.)
12 Kumpi Solomon in Sheba kumpinu a deih khempeuh le a nget khempeuh pia a; amah a puak zah sanga tamzaw a pia hi. Tua ciangin amah nusia-in a nungzuite tawh ama gamah a ciah hi.
Solomon’ Thupina
13 Solomon in kumsima a ngah kham talent dd 666 hi-a 14 tuate sumbukte le sumbawlte puak siahte a kihel lo ahi hi. Arabia kumpite le gam sunga ukpite khempeuh in Solomon tungah ngun le kham a puak uh hi.
15 Solomon in sek tawh a kiseek kham-a kibawl lum lianpi zanih bawl a; lum khat bawl nadingin seka kiseek kham bekas ee zaguk a bei hi. 16 Amah in sek-a kiseek kham-a kibawl lum neu zathum zong bawl a; lum khat ah kham bekas ff zathum a bei hi. Kumpipa in tuate Lebanon Tulak kumpi inn ah a koih hi.
17 Tua ciangin kumpipa in saiha tawh kumpi tokhom lian khat bawl a, kham citakin a luan hi. 18 Kumpi tokhom in kahlei cial guk nei-a kham tawh kibawl a khengakna tutphah a tungah a thuah hi. Tutna pang tuakah ban ngakna om a, tuate pang tuakah humpinelkai khat tuak a ding hi. 19 Kahlei gukte tungah humpinelkai sawm le nih dinga kahlei mong tuakah khatta a ding hi. Kumpi-gam khatpeuh ah tua bang a kibawl ngei kei hi. 20 Solomon zat haite khempeuh kham hi-in Lebanon Tulak Kumpi inn a inn vanzatte khempeuh kham citak vive ahi hi. Solomon hunin ngun kineu ngaihsut ahi manin ngun tawh bangmah a kibawl kei hi. 21 Kumpipa in Hiram gg mite hawlpih sumbawl tembawpi hh honkhat a nei hi. Tuate kum thumin khatvei ciah uh a, kham ngun le saiha le zawngmaw le guldu a pua uh hi.
22 Leitung kumpi dangte khempeuh sangin Solomon hauzaw in a pilzaw hi. 23 Pasian in Solomon lungsima a guat pilna ngai dingin leitunga kumpi khempeuh in a zuan ciat uh hi. 24 Kum khat khit kum khat a kianga pai peuhmah in letsongin - ngun le kham tawh kibawl vanzatte, le puante, galhiamte le gimnamtuite, le sakolte le laate a puak uh hi.
25 Solomon in sakolte le sakol-lengte kholna buk tul li le sakol ii tul sawm le tul nih nei-in, tuate sakol-leng khuapi ah koih a, ama omna Jerusalem ah zong a kem hi. 26 Amah in Gunpi jj panin Philistia-te gam dong Egypt gamgi ciang kumpi khempeuh a uk hi. 27 Kumpipa in Jerusalem ah suang zatin ngun zanga, mualbula theiba kungte zahin tamtaksing a tamsak hi. 28 Solomon’ sakolte Egypt kk pan le gamdangte aa pana kila ahi hi.
Solomon Sihna
29 Solomon a man lai-a a nasep dangte a kipatna pan a tawp dong, kamsangpa Nathan ciamtehnate sung, Shihon-te Ahijah genkholhna sung, le Nebat tapa Jeroboam tawh kisai thumupa Iddo mangmuhna sungah kigelh hi lo ahi hiam? 30 Solomon in Israel khempeuh ukin kum sawmli sung Jerusalem ah a mang hi. 31 Tua ciangin a pate tawh amah tawlnga khawm-a a pa David khuapi sungah kivui hi. Tuateh a tapa Rehoboam in a za luah a kumpi a suak hi.