Kongpi-cingte
26
1 Kongpi-cingte kisehkhenna:Korah-te panin: Asaph tapate khat Kore tapa Meshelemiah.
2 Meshelemiah neih tapate:
Zechariah a suak masa,
Jediael a nihna,
Zebadiah a thumna,
Jathniel a lina,
3 Elam a ngana,
Jehohanan a gukna,
le Eliehoenai a sagihna ahi hi.
4 Obed-Edom in zong a neih tapate:
Shemaiah a suak masa,
Jehozabad a nihna,
Joah a thumna,
Sacar a lina,
Nethanel a ngana,
5 Ammiel a gukna,
Issachar a sagihna,
le Peullethai a giatna ahi hi.
(Ahang in Pasian in Obed-Edom thupha a pia hi)
6 Ama tapa Shemai-ah in zong tapa nei a, amaute mi belcing ahi manun a pate innkuan sungah makai ahi uh hi. 7 Shemaiah tapate: Othni, Rephael, Obed le Elzabad; a tanaute Elihu le Semakiah-te zong mi kician ahi uh hi. 8 Hihte khempeuh Obed-Edom suante hi uh a; amaute le a tapate le a tanaute mi belcing nasep hatte hi-in - Obed-Edom suante a vekun 62 ahi uh hi.
9 Meshelemiah in mi kician tapate le tanaute nei a - a vekin 18 ahi hi.
10 Merari-te Hosah neih tapate: Shimri a khatna (amah a suak masapen ahi loh hangin a pa in a masapenin a koih hi), 11 Hilkiah a nihna, Tabaliah a thumna, le Zechariah a lina ahi hi. Hosah tapate le a tanaute a vekin 13 ahi hi.
12 Hih kongpi cinga kiseh khente amaute makai a hi uh hangin amau tanaute hih bang tektekin TOPA biakinnpi sungah biakna nasep tavuan a nei uh hi. 13 Amau innkuante tawh kizui-in a moi a ham a kibangin kongpi simin ai a kilawn hi.
14 Nisuahna kongpi ai Shelemiah aa tungah a tu hi. Tua ciangin ama tapa Zechariah thukuppih pil khat, adingin ai kilawna, Leilu Kongpi ai ama tungah a tu hi. 15 Leitaw Kongpi ai Obed-Edom tungah tu a, vankholna inn ai a tapa tungah a tu hi. 16 Nitumna Kongpi le lampi tungnung a Shelleketh Kongpi ai Shuppim le Hosah tungah a tu hi.
A vil le a vil kimaituah uh a: 17 Ni khatin nisuahna lamah Levi-te guk, ni khatin leilu lamah li, ni khatin leitaw lamah li, le vankholna inn ah hun khatin nih a om uh hi. 18 Nitumna-lam tuala lampi ah li om uh a, a tual ah nih a om uh hi.
19 Hihte in Korah le Merari suan kongpi cingte sehkhennate ahi hi.
Goukemte le Adang Uliante
20 Amau lawm Levi-te bb in Pasian inn a goukholna le a ki-ap nate kholnate uk uh hi.
21 Ladan suante, Ladan tungtawna Gershon-mi a suakte le Gershon-te Ladan tawh kisai-a innkuan lutangte in Jehieli, 22 Jehieli tapate, Zetham le a sanggampa Joel ahi hi. Amaute TOPA biakinnpi a gou kholnate uk ahi uh hi.
23 Amram-te, Izhar-te, Hebron-te le Uzziel-te panin:
24 Moses tapa Gershom suante khat Shubael, in gou-manphate uk ulianpa ahi hi. 25 Eliezer tungtawna ama tanaute: a tapa Rehabiah, a tapa Jeshaiah, a tapa Joram, a tapa Zicri, le a tapa Shelomith ahi hi. 26 Shelomith le amau tanaute in, kumpipa David le a tulte le a zate a uk innkuan lutangte le galkap mang dangte in a apsa nate koihna goukholnate khempeuh a uk uh hi. 27 Amaute in gal sunga a lak uh vante pawlkhat TOPA biakinnpi puah nadingin a ap uh hi. 28 Tuateh thumupa Samuel le Kish tapa Saul le Ner tapa Abner le Zeruiah tapa Joab-te in a ap uh na khempeuh le a ki-ap nadang khempeuh Shelomith le a tanaute in a kem uh hi.
29 Izhar-te panin: Kenaniah le a tapate, biakinnpi tavuante banah Israel tunga ulian le thukhente dingin a kiseh hi.
30 Hebron-te panin: Hashabiah le a tanaute - siamna nei tulkhat le zasagihte in Jordan nitumna Israel sungah TOPA nasepna le kumpi nasepna khempeuh ah tavuan a la uh hi. 31 Hebron-te adingin amau innkuante khangthu ciamtehna tawh kizui-in amaute ukpa Jeriah ahi hi. David uk a kum sawmlina-in ciamtehna kizong a, Hebron-te lakah Gilead a Jazer ah siamna a nei mi a kimu hi. 32 Jeriah in siamna a nei mi innkuan lutang tulnih le zasagih nei a, Kumpi David in amaute Reuben-te, Gad-te, Manasseh beh alangte uk ding le Pasian tawh kisai thu khempeuh le kumpipa vaite ah a uk dingin a koih hi.