David in Galkapte Sim
21
1 Israel langkhatah Satan dinga Israel mi phazah sim dingin David a holhthawh hi. 2 David in Joab le a galkap mang teng tungah, "Pai unla Beersheba pan Dan dong Israel mite sim dih un. Tua khit ciangin bangzah pha hiam cih ka theih nadingin kei tungah hong gen kik un," a ci hi.3 Ahi hangin Joab in, "TOPA in ama galkapte a zah zakhat sangin tamzawsak ta hen. Ka topa kumpipa aw, amaute khempeuh na nasem hi lo uh ahi hiam? Bang hangin ka topa in hih sem nuam se na hi hiam? Bang hang amah in Israel mawh khusak ding ahi hiam?" ci-in a dawng hi.
4 Ahi zongin kumpipa thugen in Joab thuzawhin, Joab kuankhia-a Israel gambup ah pai-in Jerusalem ah a ciah kik hi. 5 Joab in David kiangah galkap thei mi phazah a zasak hi. Israel namsau tawi thei peuhmah Judah a tul sawmli le tul sagih tawh kigawmin tul zasawm le tul khat a pha hi.
6 Ahi hangin Joab in Levi le Benjamin a sim kei hi, bang hang hiam cih leh kumpipa thupiakna zak thadahhuai a sa hi. 7 Pasian muhna-ah zong hoih lo a; amah in Israel dan a tuaksak hi.
8 Tua ciangin David in Pasian tungah, "Hih ka sep manin ka khial mahmah hi. Tu-in kong thum hi, na nasempa khialhna hong maisak in. A haivai mahmah na khat ka sem khin hi," a ci hi.
9 Tua ciangin TOPA in David thumupa Gad kiangah, 10 "Pai inla David kiangah, ‘TOPA gen hih ahi hi: Keimah in na teel ding thum kong pia ding hi. Nang tunga ka tunsak dingin khat teel in,’ ci hi," a ci hi.
11 Tua ciangin David kiangah Gad pai a, "TOPA gen hih ahi hi: 12 ‘Kum thum sung kialpi tun ding, galte in hong zo-in namsau tawh hong delhmangin aa kha thum sung galtaina ahikeh Israel a munmun ah TOPA vansawltakte in luhgawp a pulpitunna - TOPA namsau nithum sung, na deih pen teel in,’ ci hi. Tu-in kei hong sawlpa ka dawn nading khat khensat in," a ci hi.
13 David in Gad kiangah, "Ka lungdong mahmah hi. Ama lainatna lian mahmah ahi manin mihing khutah puk loin TOPA khutah hong puksak zaw hen," a ci hi.
14 Tua ciangin TOPA in Israel tungah pulpi tungsaka, Israel mite tul sawmsagih a si uh hi. 15 Tuateh Pasian in Jerusalem susia ding vansawltak khat a sawl hi. Ahi hangin vansawltakin a suksiat ciangin TOPA in mu-in, tua gim thuakna hangin daha, mite a susia vansawltak kiangah, "Pha zo. Na khut dok kik in," a ci hi. Tua ciangin Jebus-te Araunah bb ancilna ah TOPA vansawltak a ding hi.
16 David khuadak to-a van le lei kikal ah, namsau dawhsa tawi-a Jerusalem tungah a khut a zan tua TOPA’ vansawltak a en hi. Tua ciangin David le upate in ippi puan silhin a khupbawh uh hi.
17 David in Pasian kiangah, "Galsim thei mi a sim dinga sawl keimah hi lo ka hi hiam? Khialhna bawla a mawh keimah ka hi hi. Hihte tuu ahi uh hi. Amaute in bang hih uh ahi hiam? TOPA keima Pasian aw, kei le ka innkuan tungah na khut hong tusak inla na mite tungah hih pulpi tungsak nawn kei in," a ci hi.
18 Tua ciangin TOPA vansawltak in, David pai to a Jebus-te Araunah ancilna munah TOPA adingin biakna-tau khat a dawh ding Gad in a gen dingin thu a pia hi. 19 Tua ciangin TOPA mina Gad thugen a mang dingin David a paito hi.
20 Araunah in mangbuh a cil laitak hi-a a kihei leh vansawltak a mu hi; ama ompih a tapa lite a bu uh hi. 21 Tua ciangin David in ama lam manawh a, Araunah in en-a amah a muh ciangin ancilna nusia in David mai ah leilam nga-in a kunsuk hi.
22 David in ama kiangah, "Pulpi a ven nadingin TOPA biakna-tau ding ka dawh nadingin na ancilna mun kei hong pia in. Na sak zahzah in hong zuak in," a ci hi.
23 Araunah in David kiangah, "Tang in! Ka topa in na lungkimna bangin hih in. En in, na meihal biakna dingin bawngtalte kong pia dinga, a sing dingin ancilna vante le an-a biakna dingin mangbuh kong pia ding hi. Hihte khempeuh kong pia khin ding hi," a ci hi.
24 Ahi hangin Kumpi David in Araunah kiangah, "Hi lo hi, na sak zahzah kong pia ding hi. TOPA adingin nang neihsa kong laksak kei ding hi, kei aa bangmah bei loin meihal biakna zong ka pia kei ding hi," a ci hi.
25 David in Araunah mun man in kham shekel cc zaguk a pia hi. 26 David in TOPA adingin tualai ah biakna-tau khat dawh a, meihal biakna le kilawmtakna biakna dd a pia hi. Amah in TOPA sama, TOPA in vantung panin biakna-tau tungah meihal biakna-ah meikuangin a dawng hi.
27 Tua ciangin TOPA in vansawltak hopih a, amah in a namsau a paii-ah a siat hi. 28 Tua hunin Jebus-te Araunah ancilna munah TOPA in a dawn lam a muh ciangin David in tua lai-ah biakna a pia hi. 29 Moses in sehnel gama a lam TOPA biakbuk le meihal biakna-tau, tua hunin Gibeon munsang tungah a omlai hi. 30 Ahi hangin David in TOPA vansawltak namsau kihta ahi manin Pasian dong dingin tua mai-ah a pai ngam kei hi.