Naaman Phakna Dam
5
1 Tu-in Aram kumpipa’ galkap mangpa Naaman ahi hi. Amah a pu mitmuhna ah mi lianpi hi-a, a kisang koih mahmah hi, bang hang hiam cih leh TOPA in ama tungtawnin Aram a gualzosak hi. Amah galkap hang khat hi napi a phak aa hi.2 Tu-in Aram pan mi pawlkhat kuankhia in Israel pan numeino khat sal-in kai uh a tuanu in Naaman zi’ na a sem hi. 3 Tuanu in a pi tungah, "Ka pu le Samaria a kamsangpa kimu thei leh pawh! Amah in a phak natna damsak thei ngel in teh!" a ci hi.
4 Naaman a pu kiangah pai-a Israel pana numeino thugen a va ko hi. 5 Aram kumpipa in, "Bangbang ahi zongin va pai ve, Israel kumpipa lai kong khaksak kei ding hiam,’ ci-in a dawng hi. Tua ciangin Naaman kuankhia-a, ngun talent sawm bb, kham shekel tul guk cc le puansilh kop sawm a keng hi. 6 Israel kumpipa a puaksak laikhak ah: "Ka nasempa Naaman hih laikhak tawh a phak natna nadamsak dingin kong sawl hi," ci-in a gelh hi.
7 Israel kumpipa in laikhak a sim khit phetin a puante balkekin, "Kei Pasian maw? Thatlumin nungtasak thei ka hi hiam? Bang hangin hih mipa in phak natna damsak dingin mikhat kei hong puak ahi hiam? En in, amah kei tawh kitot nading a zong hi bek hi!" a ci hi.
8 Israel kumpipa in a puan a balkek lam Pasian mipa Elisha in a zak ciangin thu zasak a, "Bang hangin na puante balkek na hi hiam? Tua mipa kei kiangah hong paisak lecin amah in Israel ah kamsang a om lam a thei ding hi," a ci hi. 9 Tua ciangin Naaman a sakolte le a sakollengte tawh pai-a, Elisha inn kongah a khawl hi. 10 Elisha in ama kiangah kamtai khat paisak a, "Pai inla Jordan ah sagih vei kisil in, tuateh na sa angei bang dinga na siang ding hi," ci-in a gensak hi.
11 Ahi hangin Naaman paikhia-a heh in, "Ke’n amah hong paikhia tektek dinga kei kiangah dingin a Pasian TOPA min lo in, natna omna tung tengah a khut vanin ka phak natna a damsak dingin ka ngaihsun hi. 12 Damascus gunte, Abana le Pharpa-te Israel tuite sangin hoihzaw lo ahi hiam? Tuate ah kisil in siang thei lo ding ka hi hiam?" a ci hi. Tua ciangin amah kihei-a hehsa in a paikhia hi.
13 Naaman’ nasemte a kiangah pai uh a, "Ka pa aw, kamsangpa in na lianpi hong sawl leh zong hih lo ding na hi hiam? Amah in, ‘Kisil inla siang in!’ hong cih hih zawk ding hi lo hiam?" a ci uh hi. 14 Tua ciangin amah paisuk a Pasian mipa gen bangin Jordan ah sagih vei kipap-a a sa angei bangin tangvalno bangin a siang hi.
15 Tua ciangin Naaman le a nasemte Pasian mipa kiangah a pai kik uh hi. Amah a mai-ah dinga, "Tu-in Israel sung longal leitung buppi ah Pasian om lo cih ka thei hi. Nong hehpihna-in na nasempa letsong hong sang in," a ci hi.
16 Kamsangpa in, "A na ka sep TOPA nuntakna ka lo hi, na khat zong kong sang kei ding hi," ci-in a dawng hi. Naaman in kun tentan taleh a nial teitei hi.
17 Naaman in, "Nong san kei ding leh na nasempa in TOPA tung longal pasian dangte tungah meihal biakna le biak piakna ka piak nawn loh nadingin laa kop khat puak khop leitang hong pia in. 18 Ahi zongin TOPA in hih na khatah na nasempa hong maisak hen: Rimmon biakinn ah ka pu tumin ka ban tungah kingamin a kun ciangin kei zong ka kun hi - Rimmon biakinn ah kei zong ka kun ciangin TOPA in hih thu hangin na nasempa hong maisak hen," a ci hi.
19 Elisha in, "lungnuamtakin pai in," a ci hi.
Naaman gamla khop a tun ciangin, 20 Elisha nasempa Gehazi in, "Hih Aram pa Naaman tungah ka pu in bangmah a san loh ka pu migi lualiang hi. TOPA nuntakna ka lo hi, amah nungdelhin ama tung pan na khatpeuh ka ngah ding hi," a kici hi.
21 Tua ciangin Gehazi in Naaman a nungdelh pah hi. Naaman in ama lam manawh a mitai a muh ciangin amah tawh kimu dingin a sakolleng panin a kum hi. Amah in, "Thu hoih hi buang inteh maw?" ci-in a dong hi.
22 Gehazi in, ‘Thu khempeuh hoih hi, ka pu in, Ephraim mualtung gam panin kamsang hon laka tangval nih tu mahmah in hong pai hi. Hehpihna-in tuate ngun talent khat dd le puansilh kop nih pia hen,’ a ci dingin kei hong sawl hi," ci-in a dawng hi.
23 Naaman in, "Bangbang ahi zongin talent nih hong sang hoh in," a ci hi. Amah in Gehazi tuate pia teitei a, amah in ngun talent nih le puansilh kop nih ip nih sungah a gak khawm hi. Amah in a nasemte nih tungah pia-a amaute in Gehazi mai-ah tuate a puak uh hi. 24 Mual ah Gehazi a tun ciangin nasemte tung pan tua nate la-a, inn sungah a koih hi. Tua mite ciahsaka, amaute a paikhia uh hi. 25 Tua ciangin amah sungtuma a pu Elisha mai-ah a ding hi.
Elisha in, "Gehazi, kaw’h pai na hia?" ci-in a dong hi.
Gehazi in, "Na nasempa koimah ah ka pai kei hi," ci-in a dawng hi.
26 Ahi hangin Elisha in ama kiangah, "Mipa nang tawh kituak dingin sakolleng pan a kumin ka kha nang tawh om hi lo a hi hiam? Tu hun pen sum lak hun, ahikeh puansilhte, olive lote, lenggui lote, tuuhonte, bawnghonte ahikeh nasem pasal, nasem numeite san hun sa na hi hiam? 27 Naaman phakna nang le nangma suante tungah a belh den ding hi," a ci hi. Tua ciangin Elisha omna panin Gehazi paikhia a, amah phak in vuk bangin a pak hi.