Solomon Kiangah Sheba Kumpinu Hawh
10
1 Sheba kumpinu in Solomon minliatna le TOPA min tawh a kizopna a zak ciangin thudotna haksate tawh a zia-et dingin a kuan hi. 2 Jerusalem ah tungin khualzin mi tampite tawh - gimnamtuite, kham le suangmanpha tampitak a pua kala-ohte - tawh Solomon kiangah pai-a, a lungsima a ngaihsut khempeuh a kuppih hi. 3 Solomon in a thudot khempeuh dawng hi; kumpipa in tuanu tungah a gen kik ding thuhaksalua khat beek a om kei hi. 4 Sheba kumpinu in Solomon pilna, le a lamsa a kumpi-inn, 5 a sabuai tunga annek, a uliante tutna, a nasemte puansilh, a haitawite le TOPA biakinnpi-a meihal biaknate ba a muh ciangin a cih nading a thei kei hi.6 Tuanu in kumpipa kiangah, "Na nasepsate le na pilna ka gam pana ka zakna thuman ahi hi. 7 Ahi zongin hong pai-in ka mit-a ka muh mateng ka um kei hi. Man takpi hi, kei tungah alang zong hong kigen nai lo hi-a, hong kigen ka zaksate na pilna le na neihsa in a khumkhelh mang hi. 8 Na mite lungdam si in cia! Na pilna a za na mai-a ding den na uliante lungdam si in cia! 9 Nang tungah lungkima Israel kumpi tokhoma hong tusak TOPA na Pasian kiphat ta hen. TOPA in Israel a tawntunga a itna hangin thumaan le thutang a nasem dingin nang kumpi hong suaksak ahi hi," a ci hi.
10 Tua ciangin amah in kumpipa kham talent 120 cb le gimnamtui tampitak le suang manphate a pia hi. Sheba kumpinu in Solomon a piak zaha tam gimnamtui a kipuak ngei nawn kei hi.
11 (Hiram tembawpite in Ophir panin kham puak hi; tua panin cingsing dc tampitak le suangmanpha a puak uh hi. 12 Kumpipa in cingsingte TOPA biakinnpi le kumpi-inn kipsak nading le harp le lyre tumtheihte bawlna-in a zang hi. Tuni dong tua zaha tam cingsing gam sungah tum ngei loin zong a kimu ngei nawn kei hi.
13 Kumpi Solomon in Sheba kumpinu a deih khempeuh le a nget teng pia-a, tua banah ama kumpi neihsate a piak beh lai hi. Tua ciangin a tonpihte tawh a gamah a ciah uh hi.
Solomon’ Thupina
14 Solomon in kum sima a ngah kham talent 666 ed hi a, 15 tuate, sumbukte, sumbawlte le Arab kumpite le gam sunga ukpite siah a kihel lo ahi hi.
16 Kumpi Solomon in seka kiseek kham tawh kibawl lum lianpi zanih bawl hi; lum khat bawl nadingin kham bekas zaguk fe a bei hi. 17 Amah in seka kiseek kham lumneu zathum zong bawla, lumneu khatah kham mina thum gf a bei hi. Kumpipa in Lebanon Tulak Kumpi-inn ah tuate a koih hi.
18 Tua ciangin kumpipa in saiha tawh kumpi tokhom lianpi khat bawla kham hoihin a tungah a luan hi. 19 Tokhom in kahlei cial guk nei a, a kingapna dawn a kual hi. Tutna pang tuakah ban ngakna om a, tuate pang tuakah humpinelkai a ding tuak hi. 20 Kahlei geiah humpinelkai sawm le nih dinga, kahlei mong khatah khat ta a om hi. Kumpi gam dang khatpeuh ah tua banga kibawl a om ngei kei hi. 21 Solomon hai zatte khempeuh kham hi a, Lebanon Tulak Kumpi-inn a vanzatte khempeuh kham citak ahi hi. Solomon hun lai-in ngun kineu ngaihsut ahi manin ngunin bangmah kibawl lo hi. 22 Kumpipa in tuipi a Hiram tembawpi tawh a tonkhawm sumbawl tembawpi hg hon khat a nei hi. Tuate kum thumin khatvei ciah uh a, kham, ngun, saiha, le guldu le zawngmaw-te a pua uh hi.
23 Leitung kumpi khempeuh sangin hauhna le pilna-in Solomon a thupizaw hi. 24 Pasian in Solomon lungsima a guat pilna ngai dingin leitung buppi in amah a zuan ciat uh hi. 25 Kum simin a kianga paite khempeuh in letsong puak ciat uh a, - ngun le kham vanzatte, puante, galhiamte le gimnamtuite le sakolte le laate a puak uh hi.
26 Solomon lengte le sakolte khangkhang hi; amah in sakolleng tul le zali le sakol ih tul sawm le tul nih nei hi; tuate sakolleng koihna khuapi le ama omna Jerusalem ah a kem hi. 27 Kumpipa in Jerusalem ah suang bangin ngun zanga, mualbulte a theiba kung zahin tamtak sing a tamsak hi. 28 Solomon sakolte Egypt ji pan le Kue kj pana kila hi a - kumpipa sumbawlte in Kue pana a lei uh ahi hi. 29 Amaute in Egypt panin sakolleng khat ngun shekel zaguk lk pia uh a sakol khat za le sawmnga ml a pia uh hi. Amaute in Hit-te le Aram kumpite tungah zong a zuakkhia sawn uh hi.