Zebah le Zalmunna
8
1 Tua ciangin Ephraim-te in Gideon kiangah, "Bang hangin ko hong hici bawl na hi hiam? Midian-te do dinga na kuanun ko hong zawn lo na hi hiam?" ci-in a dong uh hi. Amaute in a nak mawhsak mahmah uh hi.2 Ahi hangin Gideon in, "No tawh tehin ken’ bang hih zo ngap ka hi hiam? Abiezer lenggah lak buppi sangin Ephraim lenggah lawh hoih zaw hi lo hiam? 3 Pasian in Midian-te makai Oreb le Zeeb no khut sungah hong pia hi. No aa tawh tehin ken bang sem zo ka hi hiam?" ci-in a dawng hi. Hih thu a gen ciangin a tunga a hehna uh a dai hi.
4 Gideon le a mi zathumte gim khin mahmah napi delhdelh lai uh a, Jordan tungin a galkah uh hi. 5 Succoth mite kiangah, "Ka galkapte gim lua hi, anlum tawmkha hong piaksak un, kei lah Midian kumpite Zebah le Zalmunna delh kimlai ka hi hi," a ci hi.
6 Ahi hangin Succoth uliante in, "Zebah le Zalmunna-te khut no aa suak khin nai ahi hiam? Bang hangin na galkapte anlum pia ding ka hi uh hiam?" a ci uh hi.
7 Tua ciangin Gideon in, "Na takpi uh maw, TOPA in Zebah le Zalmunna ka khutah hong piak ciangin sehnel-gam lingte le lingkungte in na sa uh ka kuikek ding hi," ci-in a dawng hi.
8 Tua lai panin Peniel a ah paito-a, a nget ngei bangin a nget hangin amaute in Succoth-te dawn bangin a na dawng uh hi. 9 Tua ciangin Peniel in mite kiangah, "Gual zo-a kong ciah ciangin hih tausang ka balkhia ding hi," a ci hi.
10 Tu-in nisuahna-lam galkap khempeuh pana a omlai mi tul sawm le tulnga bang tawh Zebah le Zalmunna Karkor ah om uh a; namsau tawi tulza le tul sawmnih a si khin uh hi. 11 Nobah le Jogbehah nisuahna-lama, a lal kawikawite lampi zui-in Gideon pai to a galkapte a bingphawn hi. 12 Midian-te kumpi nihte, Zebah le Zalmunna a tai uh hi; ahi hangin amah in galkap honpi delhkekin amaute gel nungdelha, a man hi.
13 Tua ciangin Joash’ tapa Gideon a galsimna pan Heres Ciangka tawnin a ciah kik hi. 14 Amah in Succoth-te tangvalno khat manin thu donga, tuapa in Succoth ulian sawm sagih le sagihte le tua khuapi sunga upate min a gelhsak hi. 15 Tua ciangin Gideon pai-in Succoth mite kiangah, "Note in kei kiangah, ‘Zebah le Zalmunna-te khut no aa suak khin nai ahi hiam? Bang hangin na mi thabeite anlum pia ding ka hi uh hiam?’ ci-a nong selnoh uh Zebah le Zalmunna hih lai-ah a om hi," a ci hi. 16 Khuapi upate samin, amaute sehnel-gam ling le lingkungte tawh dan pia-in Succoth mite a thuhilh hi. 17 Peniel-te tausang zong kaipukin khua sung mite a that hi.
18 Tua ciangin Zebah le Zalmunna kiangah, "Tabor a na thahte uh a koici mi hiam?" ci-in a dong hi.
Amaute in, "Nang tawh kibangin kumpi tapa meel a pua uh hi," ci-in a dawng uh hi.
19 Gideon in, "Tuate ka nu’ tapa keima sanggamte ahi hi. TOPA nuntakna-in ka kiciam hi, amaute na hinkhawi le uh cin kong that kei ding hi," a ci hi. 20 A tapa upa pen Jether lamah kihei-in, "Amaute that in!" a ci hi. Ahi hangin Jether naupangno hi-a lau ahi manin a namsau a dok kei hi.
21 Zebah le Zalmunna in, "Nang mahmah hong pai inla hih in. "‘Pisal in pisal tha mah paai hi,’ kici hi," a ci uh hi. Tua ciangin Gideon dingto-a amaute thatin a kala-oh ngawng zepnate uh a la hi.
Gideon’ Awmtuam
22 Israel-te in Gideon kiangah, "Nang, na tapa le na tupate in - ko hong uk un bang hang hiam cih leh Midian-te khut panin hong honkhia nang na hi hi," a ci uh hi.
23 Ahi hangin Gideon in amaute kiangah, "Ken note kong uk kei dinga, ka tapa in zong hong uk kei ding hi. TOPA in note hong uk ding hi," ci-in a gen hi. 24 Tuateh amah in, "Kong nget nop khat om hi, vanlakte na tanh lak panun bilbah khat ciat hong pia un," a ci hi. (Ismael-te in kham bilbah a bat uh a ngeina uh ahi hi.)
25 Amaute in, "Hong pia mahmah nung," ci-in a dawng uh hi. Tua ciangin amaute in puan khat phah uh a, a van lakte uh panin kual khat ciat a lot uh hi. 26 Ama nget kham kualte - kizepna, awh theih le Midian kumpite silh a dupsante le a kala-oh ngawng-ua khainiangte simlohin kham shekel b tul khat le zasagih a khai hi. 27 Gideon in tua khamte awmtuam in bawla, ama khuapi Ophrah ah a koih hi. Israel-te khempeuh tua bia-in paktat uh a, Gideon le a innkuanpihte adingin thang khat a suak hi.
Gideon sihna
28 Tua bangin Israel-te mai ah Midian guallel-a, a lu a phong kik zo nawn kei hi. Gideon nuntak kum sawmli sung tua gam lungmuang in a nuamsa hi.
29 Joash’ tapa Jerub-Baal inn-a teng dingin a ciah hi. 30 Zi tampi nei ahi manin tapa sawm sagih a nei hi. 31 Shechem-a teng a zino in zong amah tawh tapa khat nei a amin Abimelech a phuak hi. 32 Joash’ tapa Gideon tekkuutin si-a Abiezeri-te neihsa Ophrah-a, a pa Joash’ hanah kivui hi.
33 Gideon a sih zawh sawt loin Israel-te Baal tawh va paktat kik leuleu uh hi. 34 Amaute in a pasian dingun Baal-Berith koih uh a, a munmunah a galte khempeuh uh pana a hukhia TOPA a Pasian uh a phawk nawn kei uh hi. 35 Jerub-Baal (Gideon cihna) in amaute adingin na hoih a sepsakte hangin a innkuanpihte tungah lungdam a thuh ding uh zong a don nawn kei uh hi.