Kikhopna pan Puasehna
23
1 Mi khat a cil kisuzan ahikeh ki-atkhia-a, a kigetsa mi khatpeuh TOPA mipi kikhopna ah a lut thei kei ding hi.2 A kikham kitenna da pana piang ta peuhmah le ama suan khangsawm ciang dong nangawn TOPA mipi kikhopna ah a lut thei kei ding hi.
3 Amon-te ahi-a, Moab-te ahi zongin amau suante kuamah khang sawmna dong nangawn TOPA mipi kikhopna ah a lut thei kei ding hi. 4 Ahang in, note Egypt pan na paikhiat lai-un lampi ah anlum le tui in hong dawn lo uh a, Aram Naharaim eb a Pether panin Beor’ tapa Balaam cialin note hong hamsiatsak uh hi. 5 Ahi zongin TOPA note Pasian in Balaam thu ngai lo-a, hong hamsiatna uh no tungah thupha in hong heisak hi; bang hang hiam cih leh TOPA note Pasian in note hong it hi. 6 Na nuntak sungun amaute tawh kilem nading le kipawlkhawm nading zong kei un.
7 Edom-te mudah kei un, bang hang hiam cih leh na sanggam uh ahi hi. Egypt-te hua kei un, ahang in amau gamah pemta in na tung ngei uh hi. 8 Amaute sung pana suak a tate uh khang thumna panin TOPA mipite lakah a lut thei ding uh hi.
Giahphuala Sianlohna
9 Na galte uh langkhatah giahphual na sat uh ciangin a siang lo na peuhmah hemkhia un. 10 Zan ciangin a baw teh a om leh a siang lo ahi manin giahphual pua-ah paikhia-in tua lai ah a om ding hi. 11 Ahi hangin nitaklam ciangin amah kisil dinga, nitum ciangin giahphualah ciah thei ding hi.
12 Giahphual pualam mun khatah awnghawh nading mun khat na sehtuam ding uh hi. 13 Na vanzatte uh lakah lei tawhna khat na nei ding uh a, awng na hawh uh ciangin a khuk to-in na thak khiat pen na vuk kik ding uh hi. 14 Ahang in, TOPA note Pasian note hong dal dingin na giahphualuah hong vakin na galte uh no tungah hong pia ding hi. No lakah a kilawm lo khatpeuh mu-in hong kiheimang san loh nadingin na giahphual sung uh a siangtho pelmawh ding hi.
Thukham Tuamtuam
15 Sila khat no kiangah hong buk leh a pu kiangah puak kik kei un. 16 Note laka a utna mun peuhpeuh le ama teelna khuapi peuhpeuh ah tengsak un. Amah nuainet kei un.
17 Israel-te kuamah numei pasal kizuakin biakbukno ah a om kei ding hi. 18 Numei kizuak man ahi-a, pasal kizuak man ac ahi zongin kiciamna khatpeuhpeuh mante TOPA note Pasian innah na tun peuhmah kei ding uh hi; a nihin TOPA note Pasian in a kihkhawm hi.
19 Na sanggampa tungah sum tung ahi-a, an tung ahi-a, a met thei khatpeuh tung ahi zongin a met la kei in. 20 Gamdang mite tungah a met na la thei dinga, ahi hangin TOPA note Pasian in, luta na neih nading uh gamah na khutua na sep peuhpeuh uh thupha hong piaksak nadingin na sanggampa Israel-te tungah a met la kei in.
21 TOPA note Pasian tungah na kiciam leh ziakai loin pia in, ahang in, TOPA note Pasian in hong kalin a mawh a khialin hong sim teitei ding hi. 22 Kiciamna khatpeuh na bawl loh nadingin kikem in, nang hong kimawhsak kei ding hi. 23 Na kama na genkhiat peuhmah pel loin sem in, bang hang hiam cih leh nangma utthu-in TOPA note Pasian tungah na kama na ciam ahi hi.