A That Kitheilo Misi Thu Thoihdamna
21
1 TOPA note Pasian in na neih dingun hong piak nading gamah, lopaang ah mi sisa kimu in a that a kitheih kei leh, 2 na upate uh le thukhente kuankhia-in a luang omna le a kianga khuate kikal teh ding uh hi. 3 Tua ciangin a luang tawh a kinai penpen khua upate in na a sem nai lo, kol a kivawh nai lo bawngla khat la-in, 4 a kikho nai lo, bangmah a kisuan nai lo lui luanna khatah paipihsuk ding uh hi. Kuam sung tua lai-ah bawngla’ ngawng tan ding uh hi. 5 TOPA note Pasian in amaute biakna na semin TOPA minin thupha pia-a, kitotna le kilaina khempeuh a vengsak dingin a teelsa ahi manin Levi tapa siampite a mai-ah madawk tuam ding uh hi. 6 Tua ciangin siluang tawh a kinai penpen khua upate khempeuh in kuam sunga a ngawng kitansa bawngla tungah a khut uh sil ding uh a, 7 amaute in: "Ka khutun hih sisan luangsak loin a kihih lam ka mit un zong a mu kei hi, 8 TOPA aw, na tatsa Israel-te mawh thoihdamna hong sang inla mawhpeng khat sisan hangin na mite mawh hong khusak kei in," cikhia ding uh hi. Tuateh sisan luansakna a siang ding hi. 9 TOPAmuhna ah a maana na sep khit nungsangun, mawhpeng sisan luansakna pan tua bangin no le no na kisiangsak ding uh hi.Galmat Numei Tenpihna
10 Note galsim dingin kuana TOPA note Pasian in na khut sunguah amaute hong piaka galmatin mi na mat uh ciangin 11 tua galmatte lakah numei melhoih om-a, tuanu na iplah leh na zi dingin na la thei hi. 12 Na inn ah ciahpih inla a sam metsak-in, a cinte tansak inla 13 na mat laitakua a silh puante suahkhiasak in. Amah na innah kha khat bup omin a nu le a pa hangin thum ding hi; tua ciangin a kiangah pai-in a pasal na suak thei dinga, amah na zi ahi ding hi. 14 Ama tungah na lungkim kei leh a utna peuhpeuh ah paisak in. Ama tungah thutak zolo na hi manin amah zuakin sila bangin na bawl peuhmah kei ding hi.
Tacil Thuneihna
15 Mi khat in zi nih nei-in a khat itin, a khat a it kei-a, a nih in lah tapa a neih tuak uh a, a it loh nu tapa a suah masak zawk leh 16 a tapate tungah neihsa gou a hawmsak ciangin a itloh nu tapa sangin a it nu tapa a deihsak zawkna hangin a it nu tapa tungah tacil thuneihna a pia thei peuhmah kei ding hi. 17 Amah in a it loh a zi’ tapa, tacila a sanna-in a neihsa khempeuh tanh nih a pia ding hi. Tua tapa in a pa’ thahatna lim masa hi a; tacil thuneihna ama aa ahi hi.
A Lehdo Tapa
18 Mi khat in a lungkhauh a lehdo thei tapa nei-in, amah a sek uh ciangin ngai nuam lo-a, a nu a pa thu a man nop kei leh 19 a nu le a pa in amah lencipin amau khua kongpi-a upate kiangah a puak ding uh hi. 20 Amaute in upate kiangah, "Hih ka tapa uh lungkhauhin hong lehdo thei hi. Ka thu uh hong mang nuam lo hi. Gamtatsia in zu kham hi," ci ding uh hi. 21 Tua ciangin amah khua sunga mi khempeuh in suangin a denglum ding uh hi. Note lak panin gitlohna ma maimangsak pelmawh ding uh hi. Israel khempeuh in za ding uh a, a lau ding uh hi.
Thukham Tuamtuam
22 Mi khatin sihna thuak nading zahin mawhna bawlin kithat-a, a luang singtungah a kikhai leh 23 zan tawntung a luang singtungah na omsak peuhmah kei ding uh hi. A ni mahin na vuipah ding uh hi, banghang hiam cih leh sing tunga kikhaipa Pasian hamsiatna thuak ahi hi. TOPA note Pasian in na luah dingua hong piak ding gam na buahsak peuhmah kei ding uh hi.