Paisan
16
1 Abib kha tang unla TOPA note Pasian hong paisanna pawi bawl un, bang hang hiam cih leh amah in Abib kha sungin Egypt pan zanin hong paikhiatpih hi. 2 Tuuhon pan ahi a bawnghon pan ahi zongin TOPA in a Min ten nadinga a teel nading munah Pasian biakna-in TOPA note Pasian tungah na pia ding uh hi. 3 Silngo kisawh anlum tawh na meh kei ding uh a, ahi hangin, hingimna anlum ahi - silngo sawh loh anlum nisagih sung na ne ding uh hi, bang hang hiam cih leh Egypt pana na paikhiat uh, na khantawntungun na phawk theih nadingun - kinawhsa-in Egypt na nusia uh hi. 4 Na gam sung khempeuh uah ni sagih sung na neihsate uh lakah silngo kimu kei hen. Ani masa ni nitak-a biakpiakna sa khatpeuh a zingsang dong omsak kei un.5 TOPA note Pasian in note hong piak khua khatpeuh ah a Min ten nadinga a teel nading mun 6 longal mundang ah Paisan biakpiakna na bawl kei ding uh hi. Tua lai-ah Egypt pana na paikhiat ni uh phawkna-in aa Paisan biakpiakna na bawl uh ciangin nitak nitum khit hi pelmawh ding hi. 7 TOPA note Pasian teel nading munah hangkeu unla ne un. Zingsang ciangin na puanbukuah ciah kik un. 8 Niguk sung silngo sawh loh anlum ne unla a ni sagihna ni-in TOPA note Pasian kiangah mipi kikhawm unla na sem kei un.
Nipikal Pawite
9 Ankung ah phiaukawi na tah ni-ua kipan nipikal sagih sim to un. 10 Tua ciangin TOPA note Pasian hong piaksa thupha tawh kizui-a na piak ding zah uh utthu-a biakna tawh TOPA note Pasian’ Nipikal Pawite bawl un. 11 Tuateh ama Min ten nadinga a teel nading mun TOPA note Pasian mai-ah - nang, na tanu na tapate, na nasemnu na nasempate, no khua sunga om Levi-te le no laka teng pemtate, pa nei lote le meigongte in nuamsa un. 12 Egypt ah sila-a na om lam uh phawk unla hih thukipte limtakin zui un.
Biakbuk Pawite
13 Na ancilna uh le na lengtui-sukna panun a piang teng na kaihkhop khit uh ciangin ni sagih sung Biakbuk Pawi bawl un. 14 Pawi na bawl uh ciangin - nang, na tanute na tapate, na nasemnute na nasempate le no khua sunga teng Levi-te, pemtate, pa nei lote le meigongte tawh nuamsa un. 15 TOPA in a teel nading munah ni sagih sung TOPA note Pasian Pawi na bawl ding uh hi. TOPA note Pasian in na khawhsa khempeuh uh le na khutua na sepsa khempeuh uh thupha hong pia dinga, na nuamna uh a kim ding hi.
16 TOPA note Pasian in a teel nading mun ama mai-ah: Silngo-sawhloh Anlum Pawi, Nipikal Pawite le Biakbuk Pawite ah kum simin na mite khempeuh uh pel loin thumvei a kilak ding uh hi. TOPA mai-ah kuamah khutguakin kilak lo dinga; 17 TOPA note Pasian in thupha hong piak zah tawh kizui-in piak ding na keng ciat ding uh hi.
Thukhente
18 TOPA note Pasian in hong piak ding khua simah na beh kimun thukhente le uliante na seh ding uh a, amaute in mite thu siangtakin a khen ding uh hi. 19 Thutang kawikaih loin gup le paih zong a nei kei ding uh hi. Golhsum in mipilte mit tawsak a, thumaan kawnghek ahi manin, golhsum sang kei un. 20 TOPA note Pasian in hong piak ding gam ah tengin na luah theih nadingun thutang bekbek zui un.
Pasian Dangte Biakna