Bashan Kumpipa Og Kizawhna
3
1 Tua zomin eite kihei-in Bashan zuatna lampi dung zuanin i pai to a, Edrei ah eite do dingin Bashan kumpipa Og, a galkap buppi tawh hong kuankhia hi. 2 TOPA in kei tungah, "Amah le a galkap buppi le a gam, nang tungah hong pia khin ka hi manin amah kihta kei in. Heshbon ah kumpi-a om Amor mi kumpipa Sihon na hih bangin ama tungah hih in," hong ci hi.3 Tua bangin TOPA eite Pasian in eite khut sungah Bashan kumpipa Og le a galkapte khempeuh hong pia hi. Amaute hingkhawi nei loin i satlum khin hi. 4 Tua hunin ama khuapi khempeuh i la khin hi. Argob kual bup, Bashan a Og kumpi gam buppi a - khuapi sawm gukte i lak loh om lo hi. 5 Hih khuapite khempeuh kulh sangpi in ki-um a, kongpite le a kalhna zawlpite nei in, kulha ki-um lo khuata lian tampi zong a om hi. 6 Heshbon kumpipa Sihon i bawl bangin amaute i susia ca kiuhkeuh a - nupi, papi, naupang le khuapi peuhmah i susia db hi. 7 Ahi hangin a ganhing khempeuh uh le a khuapite uh pana i laksak vante ei adingin i puakhia hi.
8 Tuateh tua hunin Jordan nisuahna lama om Amor-te kumpipa tung panin Arnon Guam a kipan Hermon Vum ciang dong i la hi. 9 (Sidon-te in Hermon pen Sirion ci uh a, Amor-te in Senir ci uh hi.) 10 Mualtung zanglei-a om khuapi khempeuh i la-a, Gilead gam khempeuh, Bashan gam khempeuh Salecah le Edrei ciang dong Bashan a om Og kumpi gama khuapite khempeuh i la hi. 11 (Rephraim mite panin a baanglai Bashan kumpipa Og bek ahi hi. A lupna ec sik-a kibawl hi-a, pi sawm le thum val sau a, pi guk a zai fd hi. Ammon-te khua Rabbah tua ah om lai hi.)
Gam Khenna
12 Tua huna i lak gam sung panin Aroer leilu-lam Arnon Guam ciang Gilead mualtung gam alang a khuapite tawh Reuben-te le Gad-te tungah ka pia hi. 13 Gilead gam a om lai teng le Og kumpi gam ahi Bashan gam khempeuh Manasseh beh a langte tungah ka pia hi. (Bashan gam sunga Argob kual buppi, Rephaim-te leitang hi, kici hi. 14 Manasseh suan Jair in, Argob kual buppi Geshur-te le Maacath-te gamgi dong la-a, ama min tamsakin tu hun ciang dong Bashan pen Havvoth Jair ae kici hi. 15 Tuateh Makir tungah Gilead ka pia hi. 16 Ahi hangin Reuben-te le Gad-te tungah Gilead panin a kikhungsuk Arnon Guam ciang (guam laizangah gamgi pai-in) Ammon-te gamgi ahi Jabbok Gunpi dong ka pia hi. 17 A nitumna lam gamgi in Arabah a Jordan hi-a, Kinnereth panin Pisgah mualdung nuai-a om Arabah Tuipi (Ci Tuipi) bf dong amaute ka pia hi.
18 Tua hunin note thu kong pia-a, "TOPA note Pasian in na neih dingun hih gam hong pia hi. Ahi hangin pasal thahat khempeuh galsim dingin kithawi unla, na sanggam uh Israel-te mai ah masa in na kantan uh kul ding hi. 19 Bangbang ahi zongin na zite uh, na tate uh le na ganhingte uh (ganhing tampitak na neih lam uh ka thei hi) kong piaksa khuapite ah om phot uh henla 20 TOPA in note hong khawlsak bangin na sanggamte un zong TOPA note Pasian in Jordan galkhat a amaute a piaksa gam luah in a khawl mateng uh tuaci om phot uh hen. Tua khit ciangin note kong piaksa gam ciat ah na ciah kik thei ding uh hi," kong ci hi.
Moses Jordan Kantansak Lo
21 Tua hunin Joshua thu ka pia a: "TOPA note Pasian in hih kumpi nihte tunga a hihsa na mit mahmah a na muhsa ahi hi. Na pai lai nading kumpi gam khempeuh ah TOPA in a kibangin hih ding hi. 22 Amaute kihta kei in; TOPA na Pasian mahmah in hong dosak ding hi," ka ci hi.
23 Tua hunin TOPA tungah ka thum a: 24 Thuneipen TOPA aw, na nasempa tungah na liatna le na khut thahatna na laklak khin hi. Vantung ah ahi a leitungah ahi zongin nang hih bangin vangliatna a hih thei bang pasian om ahi hiam? 25 Kei hong paisak-in Jordan gala gam hoih - tua mualtung gam hoih le Lebanon hong musak in," ka ci hi.
26 Ahi zongin note hangin kei tungah TOPA heh a, ka thu hong ngai lo hi. TOPA in, "Pha zo, hih thu ah hong hopih nawn kei in. 27 Pisgah dawn ah kah to inla nitumna-lam, leilu-lam leitaw-lam le nisuahna-lam en in. Hih Jordan kantan lo ding na hih nungsangin na mit beekin tua gam en in. 28 Ahi zongin Joshua thu pia in, amah in gun kantanin hih mite makaih dinga na muhna gam luahsak ding ka hi manin hanthawn inla thakhauhsak in," hong ci hi. 29 Tuaci-in Beth Peor kiang kuam sungah i om hi.