Nisim Biaknate
28
1 TOPA in Moses tungah, 2 "Hih thupiakna Israel pia inla amaute tungah, ‘Keimah biakna-in mei-a kihal an, kei hong lungkimsak gimnamtui, a kiseh huna nong piak ding uh thei un,’ ci in. 3 Amaute tungah, ‘Hih in TOPA tunga na piak ding uh mei-a hal biakna hi ding hi: meihal biakna-in poina a nei lo kum khat a pha tuuno nih, nisimin pia un. 4 Zingsang in tuuno khat bawlin khuamui ciangin a khat na bawl ding uh a, 5 annel limci ephah b khat sehsawm suah sehkhat le olive kigawi thau hin c khat sehli suah sehkhat tawh helin an-a biakna tawh na piakhawm ding uh hi. 6 Hih in lungkimsakna biakna kip khat hi a Sinai Vum-a a hun sima TOPA tunga kipia meihal biakna ahi hi. 7 Dawntheih-a biakna tawh piakkhawm dingin a kibilh zu hin khat sehli suah sehkhat le tuuno khat ciat hi ding hi. Tua dawntheih-a biakna munsiangtho a TOPA tungah sung un. 8 Tuuno a nihna pen khuamui ciangin bawl unla, zingsanga na bawl uh an-a biakna le dawntheih-a biakna zia mah bangin bawl un. Hih in TOPA a lungkimsak mei-a hal gimnamtui biakna khat ahi hi.Sabbath Ni-a Biaknate
9 "‘Sabbath ni-in, poina a nei lo kum khat a pha tuuno nih, dawntheih-a biakna le an-a biakna, sathau tawh a kihel annel limci ephah d khat sehnih suah sehkhat tawh biakna piakhawm un; 10 Hih in a hunhuna meihal biakna le dawntheih-a biaknate banah Sabbath sim-a meihal biaknate ahi hi.
Khasim-a Biaknate
11 "‘Khasim, a ni masa ni-in TOPA tungah meihal biakna-in poina nei lo bawngtalno nih, tuutal khat le kum khat a pha tuuno apa sagih, pia un. 12 Bawngtal khat ah an-a biakna-in sathau helsa annel limci ephah e khat sehsawm suah sehthum tek hi dinga; a tuutal tawh an-a biakna-in sathau helsa annel limci ephah khat sehsawm suah sehnih; 13 le tuuno khat teh an-a biakna-in sathau helsa annel limci ephah khat sehsawm suah sehkhat hi ding hi. Hih in TOPA tungah meihal biakna dingin mei-a hal biakna-a kipia lungkimsakna khat ahi hi. 14 Bawngtal khatah dawntheih-a biakna-in zu hin f lang ta; tuutal tawh hin g khat sehsawm suah sehkhat; le tuuno ah hin khat sehli suah sehkhat ciat hi ding hi. Hih in kum khat sung khathak siala khasim meihal biakna ahi hi. 15 A hunhuna meihal biakna le dawntheih-a biakna banah mawhna hanga biakna-in TOPA tungah keel a pa khat kipia ding hi.
Paisanna
16 "‘A kha masa a ni sawm le li ni-in TOPA Paisanna pawi kibawl ding hi. 17 Hih kha a ni sawm le nga ni-in pawi khat kibawl ding hi; ni sagih sung silngo sawh loh anlum ne un. 18 A ni masa ni-in kikhopna siangtho khat nei unla na nasep maban uh sem kei un. 19 TOPA tungah meihal biakna-in a veka poina a nei lo bawngtalno nih, tuutal khat le kum khat a pha tuuno apa sagih meihal biakna-in pia un. 20 Bawngtal khat ah an-a biakna in sathau helsa annel limci ephah khat sehsawm suah sehthum, tuutal tawh sehsawm suah sehnih; 21 le tuuno sagihte khat tawh sehsawm suah sehkhat ta; an-a biakna-in bawl un. 22 Note ading thoihdamna bawl nadingin mawhna hanga biakna-in keel apa khat tasak un. 23 Zingsang sima meihal biaknate banah hihte bawl un. 24 Hih bang danin mei-a hal biak nadingin an bawl unla, TOPA a lungkimsak gimnamtui-in ni sagih sung nisimin bawl un; tua pen a hunhuna meihal biakna le dawntheih-a biakna banah a kibawlbeh ding hi. 25 A ni sagihna ni-in kikhopna siangtho khat bawl unla na nasep ngeina uh sem kei un.
Nipikal Pawite
26 "‘TOPA tungah biakna-in gahmasa na piak ni uh, Nipikal Pawite sung anthak na ap ni-un kikhopna siangtho khat bawl unla, na nasep ngei uh sem kei un. 27 TOPA a lungkimsak gimnamtui-in bawngtal-no nih, tuutal khat le kum khat a pha tuuno apa sagih meihal biakna-in pia un. 28 Bawngtal khat tawh sathau helsa annel limci ephah khat sehsawm suah sehthum ta, a tuutal tawh, sehsawm suah sehnih; 29 le a tuu sagihte tawh sehsawm suah sehkhat ciat, an-a biakna hi ding hi. 30 No ading thoihdamna bawlna-in keel apa khat tasak un. 31 A hunhuna meihal biakna le an-a biakna banah dawntheih-a biakna tawh hihte bawlkhawm un. A ganhingte poina nei lo a hih ding thei ta un.