24
1 Balaam in Israel-te thupha a piak TOPA lungkim hi cih a theih ciangin a hun dangte bangin aisaan dingin a kuan nawn kei hi. Ahi hangin sehnel gam lam a maingat hi. 2 Balaam khuadak a, Israel-te a behbeh in giahphual sata om a muh ciangin ama tungah Pasian Kha tungin, 3 ama thusuak pulak a:"Beor tapa Balaam thusuak,
siangtaka a mit tawh a mupa thusuak,
4 Pasian kammal a zapa khat thusuak,
Thahatpa b pan-a mangmupa,
lum ditdiat napi-a mit-hakpa pan:
5 "Jacob aw, na puanbukte,
Israel aw, na tenna munte kilawm nah e!
6 "Mualkuam bangin kiphalh a,
gungei-a huante bangin
TOPA suansa mualheuhpak banga
tuigei-a tamtak kung tawh kibang hi.
7 Amaute beelkhai panin tui luang dinga
amau khaicite in tui a kicingin a ngah ding uh hi.
"Amaute kumpipa Agag sangin lianzaw ding uh hi;
amaute kumpi-gam a kitawisang ding hi.
8 "Pasian in Egypt panin paikhiatpih a;
gam bawngtal bangin a hat uh hi.
Amaute in amau gal minamte netum ding uh a,
a guhte uh suzan ding uh hi;
a thaltang uh tawh amaute kaplet ding uh hi.
9 Amaute humpinelkai bangin thamvakin bok uh a,
humpinelkai pi bang uh hi - amaute kua in phawng ngam ding ahi hiam?
"No thupha hong piate in thupha ngah uh henla,
no hong hamsiatte kihamsiat hen!" a ci hi.
10 Tua khit ciangin Balaam tungah Balak a heh lua mahmah hi. Amah in a khut le a khut tumin a kiangah, "Ka galte hamsiat dingin nang kong samsak hi. Ahi hangin thumvei tak thupha na pia hi! 11 Tu-in ciah meng in! A kilawm zah pahtakman kong pia ding hi kong ci hi, ahi hangin TOPA in na pahtakman hong khaktansak hi," a ci hi.
12 Balaam in Balak kiangah, "Ka kiangah nong sawl kamtaipa tungah, 13 "Balak in a kumpi inn dim ngun le kham hong piak hangin a sia ahi a, a pha ahi zongin TOPA hong thupiak zah val kei thu-in bangmah ka hih kei hi - TOPA gensa bek ka gen kul hi," ci hi lo ka hi hiam? 14 Tu-in ka mite kiangah ka ciah ding hi, ahi hangin hong pai dih in, mailam hunah hih mite in na mite bang cih ding hiam kong hilhkhol ding hi," ci-in a dawng hi.
Balaam Thusuak Lina
15 Tua ciangin ama thusuak pulak a:
"Beor tapa Balaam thusuak,
siangtaka a mit tawh a mupa thusuak,
16 Pasian kammal a zapa khat thusuak,
Sangpen Pa pana theihna,
Thahatpa pana mangmupa,
lum ditdiat napi a hakpa pan:
17 "Amah ka mu a, ahi hangin tuhun a hipah kei hi;
amah ka en hi, ahi hangin nai pak nai lo hi.
Jacob pana aksi khat hong suakkhia ding hi;
Israel panin sik ciangkhut khat hong khang ding hi.
Amah in Moab-te taltang
Seth a tapate b lutang guh c khempeuh a satkham ding hi.
18 Edom kizo ding hi;
ama gal Seir kizo dinga,
ahi hangin Israel a thakhauh lai ding hi.
19 Jacob panin ukpa khat hong piang dinga,
khuapi pan-a suakte a susia ding hi," a ci hi.
Balaam’ Thusuak Nunungpente
20 Tua ciangin Balaam in Amalek mu a, a thusuak gen in:
"Minamte lakah Amalek a masapen hi-a,
ahi hangin a tawpna ah a kisusia ding hi," a ci hi.
21 Tua ciangin Ken-te mu-a, a thusuak genin:
"Na tenna uh mun kho hi-a,
suangpi sungah na bu uh kitom hi;
22 tua hi napi no Ken-te,
Asshur in galmatin note hong lak ciangin na kisia ding uh hi," a ci hi.
23 Tua ciangin ama thusuak gen a:
"Kalasai, Pasian in hih a sep ciangin kua nungta zo ding hiam? d
24 Kittim gun gei panin tembawpite hong pai-in;
tuate in Asshur le Eber thazawh ding uh a,
ahi hangin tuate zong a kisia ding uh hi," a ci hi.
25 Tua khit ciangin Balaam dingkhia-a innah ciah in Balak ama ciah nading ah a ciah hi.