Sianna Tui
19
1 TOPA in Moses le Aaron tungah: 2 "Hih in TOPA hong thupiaksa a kisam thukham ahi hi. Israel-te kiangah poina ahikeh sitbaanna a nei lo na a kisemsak nai lo bawngla asan khat hong paipih nadingun gen in. 3 Tua pen siampi Eleazar tungah pia in; tua pen giahphual pua ah kipaipih dinga, ama omna munah a kigo ding hi. 4 Tua ciangin siampi Eleazar in a khutme in a sisan pawlkhat la dinga, Kikhopna Puanbuk mailam pang sagih vei a theh ding hi. 5 Ama muh sung mahin bawngla - a vun, a sa, a sisan le a ek kihal ding hi. 6 Siampipa in tamtak sing pawlkhat, puknah le sawnsan la dinga, a kihal bawngla tungah a lawn ding hi. 7 Tua khit ciangin siampipa in a puansilhte sawp dinga tui-in a kipumsil ding hi. Tua ciangin amah giahphual sungah lut thei dinga ahi hangin nitak mateng a sianglo ahi ding hi. 8 Tua a hal mipa in zong a puansilhte sawpin tui tawh kipumsil dinga amah zong nitak mateng a sianglo hi ding hi.9 "A siang mi khat in bawngla vuute khawmin giahphual pua a siangtho-a kisehna mun khatah a koih ding hi. Israel mipite in sianna tui-a a zat dingun tuate a kem ding uh hi; tua pen mawhna pana sian nading ahi hi. 10 Bawngla’ vuu a khawmpa in zong a puansilhte sawp pelmawh dinga, amah zong nitak mateng a sianglo hi ding hi. Hih in Israel-te le amaute laka teng pemtate adingin tawntung thuzek khat hikhawm ding hi.
11 "Misi luang khatpeuh a lawng peuhmah ni sagih sung a sianglo suak ding hi. 12 A ni thum ni le a ni sagih ni-in amah le amah tua tui-in kisiangsak dinga, tua ciangin a siang ding hi. Ahi hangin a ni thum ni le a ni sagih ni-in a kisiansak kei leh asiang suak lo ding hi. 13 Misi luang khat peuhpeuh lawnga amah le amah a kisiangsak lo peuhmah in TOPA biakna-tau buahsak ahi hi. Tua mipa Israel panin kikhenkhia pelmawh ding hi. Bang hang hiam cih leh ama tungah sianna tui kitheh nai lo ahi manin amah a sianglo ahi hi; ama sianlohna a tungah baang lai hi.
14 "Puanbuk sungah mi khat a sih ciangin zat ding thukham hih ahi hi: Puanbuk sungah a lut peuhmah le puanbuk sunga om peuhmah ni sagih sung a sianglo hi dinga, 15 a sin kisincip lo na koihna khempeuh a sianglo hi ding hi.
16 "Gam sunga namsau tawh a kithat mi ahi a, sih ngeina-a si ahi a, misi guh ahikeh han a lawng peuhmah ni sagih sung a sianglo hi ding hi.
17 "A sianglo mi adingin, siantho nadinga kihal biakna vuu pawlkhat bel sungah koihin a tungah tui siangtho sung in. 18 Tua ciangin a sianga kiseh mipa in puknah pawlkhat la dinga, tui sungah diahin puanbuk le na zatte khempeuh le tua lai-a om miteng a theh ding hi. Amah in, misi guh ahikeh han ahikeh a kithatsa mi khatpeuh ahikeh sih ngeina-a si mi khatpeuh a lawngkhate pel loin a theh ding hi. 19 A ni thum ni le a ni sagih ni-in a siang mipa in a sianglo mipa theh dinga a ni sagih ni-in amah in siangsak ding hi. A kisiangsak mipa in a puansilhte sawpin tui-in kipumsil dinga tua nitak ciangin amah a siang hi ding hi. 20 Ahi hangin a sianglo mipa amah le amah a kisiansuah kei leh amah in TOPA munsiangtho buahsak ahi manin mipite panin a kihemkhia pelmawh ding hi. Sianna tui ama tungah kitheh nai lo a; amah a siang nai lo ahi hi. 21 Hih in amaute adingin tawntung thuzek khat hi ding hi.