Aaron’ Ciangkhut Sel
17
1 TOPA in Moses kiangah, 2 "Israel-te hopih inla a pupa behte uh zui-in makai khat in ciangkhut khat, ciangkhut sawm le nih lasak in. A ciangkhut tungah a neipa min gelh in. 3 Pupa beh lutang khatah ciangkhut khat hi pelmawh ding ahi manin Levi ciangkhut tungah Aaron min gelh in. 4 Kikhopna Puanbuk sung nang tawh i kituahna mun Tecipanna mai-ah tuate koih in. 5 Ka teel mipa ciangkhut na sel dinga kei mahmah in hih panin Israel-te hong phunsanna ka beisak ding hi," a ci hi.6 Tua ciangin Moses in Israel-te hopih a, amaute makaite in ciangkhut sawm le nih - a pupa behte makai khat panin khat ciat pia uh a, Aaron aa zong tuate lakah a om hi. 7 Moses in tua ciangkhutte, Tecipanna biakbuk-a TOPA mai-ah a koih hi.
8 A zing ciangin Tecipanna Puanbuk sungah Moses lut a, amah in Levi innkuan aitang dingin Aaron ciangkhut sel bek loin palh a, pakin almond a gah a mu hi. 9 Tua ciangin Moses in TOPA omna Israel-te kiangah ciangkhutte khempeuh a lakhia hi. Amaute in tuate en uh a, amau ciangkhut ciat a la kik tek uh hi.
10 TOPA in Moses tungah, "A lehdo mite tungah lim a hiden dingin Tecipanna mai-ah Aaron ciangkhut koih kik in. Amaute a sih loh nadingun hih in amaute hong phunsanna a beisak ding hi," a ci hi. 11 Moses in TOPA thupiak bang tektekin a hih hi.