Biakbuk Apna-a Biaknate
7
1 Moses in biakbuk lam a zawh ciangin biakbuk le a nazatte khempeuh sathau nilhin a ap hi. Amah in biakna-tau le a um a beelte khempeuh zong sathau nilhin a ap hi. 2 Tua ciangin Israel makaite, a kisimte a uk minam makai ahi tua innkuan lutangte in biaknate a pia uh hi. 3 Amaute in TOPA mai-ah letsongin, tungkhuh nei leng guk le bawngtal sawm le nih - makai khat in bawngtal khat ciat le makai nih ciangin leng khat ciat a pia uh hi. Amaute in hihte biakbuk mai-ah a pia uh hi.4 TOPA in Moses tungah, 5 "Kikhopna Puanbuk-a zat dingin amau tung pan tuate sang in. Mihing khat kisapna zui-in tuate Levi-te pia in," a ci hi.
6 Tua ciangin Moses in lengte le bawngtalte la a, Levi-te tungah a pia hi. 7 Amah in Gershon-te tungah amau nasepna-a kisam bangin leng nih le bawngtal li pia a, 8 Merari -te tungah amau nasepna-a kisam bangin leng li le bawngtal giat a pia hi. Amaute khempeuh siampi Aaron tapa Ithamar ukna nuai-ah a om uh hi. 9 Ahi hangin Moses in Kohath mite bangmah a pia kei hi, bang hang hiam cih leh amaute tavuan dinga kipia a siangtho nate a liangko un a pua ding uh hi.
10 Biakna-tau sathau a kinilh ciangin tua ki-ap nading makaite in amau biakna puak ciat uh a, biakna-tau mai-ah a pia uh hi. 11 Ahang in, TOPA in Moses tungah, "Biakna-tau ap nadingin nisimin makai khat in ama biakna tek a puak ding uh hi," a ci hi.
12 A ni masa ni-a ama biakna hong puakpa, Judah beh a Amminadab tapa Nashon ahi hi.
13 Ama biakna munsiangtho shekel tawh kizui-in shelkel a zakhat le sawmthum a khai ngun kuangdai khat, shekel b sawm sagih a khai thehna kuangkum khat, an-a biakna-in sathau helsa annel limci adim tuak; 14 shekel c sawm a khai kham sikkeu kum khat, gimnamtui adim tawh; 15 meihal biakna dingin bawngtalno khat, tuutal khat le kum khat a pha tuuno apa khat; 16 mawhna hanga biakna dingin keel apa khat; 17 le kilawmtakna biakna d- a piak dingin bawngtal nih, tuutal nga, keel apa nga le kum khat a pha tuuno apa nga ahi hi. Hih in Amminadab tapa Nahshon in biakna-a a piak ahi hi.
18 A ninih ni-in Issachar mite makaipa Zuar tapa Nethanel in ama biakna a puak hi.
19 Ama puak biakna munsiangtho shekel tawh kizui-a kiteh shekel zakhat le sawm thum khai ngun kuangdai khat, shekel sawmsagih a khai thehna ngun kuangkum khat, an-a biakna-in sathau helsa annel limci adim tuak 20 shekel sawm khai kham sikkeu-kum khat, gimnamtui adim tawh; 21 meihal biakna dingin bawngtalno khat, tuutal khat le kum khat a pha tuuno apa khat; 22 mawhna hanga biakna dingin keel apa khat; 23 le kilawm-takna biakna-a piak dingin bawngtal nih, tuutal nga, keel apa nga le kum khat a pha tuuno apa nga ahi hi. Hih in Zuar tapa Nethanel in biakna-a a piak ahi hi.
24 A nithum ni-in, Zebulun mite makaipa, Helon tapa Eliab in ama biakna a puak hi.
25 Ama biakna, munsiangtho shekel tawh kizui-a kiteh shekel zakhat le sawmthum khai ngun kuangdai khat, le shekel sawmsagih khai thehna ngun kuangkum khat, an-a biakna-in sathau helsa annel limci adim tuak; 26 shekel sawm a gik kham sikkeu-kum khat gimnamtui adim tawh; 27 meihal biakna dingin bawngtalno khat, tuutal khat le kum khat a pha tuuno apa khat; 28 mawhna hanga biakna dingin keel apa khat; 29 le kilawmtakna biakna-a piak dingin bawngtal nih, tuutal nga, keel apa nga le kum khat a pha tuuno apa nga ahi hi. Hih in Helon tapa Eliab in biakna-a a piak ahi hi.
30 A nili ni-in Reuben mite makaipa Shedeur tapa Elizur in ama biakna a puak hi.
31 Ama biakna, munsiangtho shekel tawh kizui-a kiteh shekel zakhat le sawmthum khai ngun kuangdai khat, le shekel sawmsagih khai sisan thehna ngun kuangkum khat, an-a biakna sathau helsa annel limci adim tuak; 32 shekel sawm a gik kham sikkeu-kum khat gimnamtui adim tawh; 33 meihal biakna ding bawng talno khat, tuutal khat le kum khat a pha tuuno apa khat; 34 mawhna hanga biak nading keel apa khat, 35 le kilawmtakna biakna-a piak dingin bawngtal nih tuutal nga, keel apa nga le kum khat a pha tuuno apa nga ahi hi. Hih in Shedeur tapa Elizur in biakna-a a piak ahi hi.
36 A ninga ni-in, Simeon mite makaipa Zurishaddai tapa Shelumiel in ama biakna a puak hi.
37 Ama biakna, munsiangtho shekel tawh kizui-a kiteh shekel zakhat le sawmthum khai ngun kuangdai khat le shekel sawm sagih khai thehna ngun kuangkum khat, an-a biakna sathau helsa annel limci adim tuak; 38 shekel sawm a khai kham sikkeu kum khat gimnamtui adim tawh; 39 meihal biakna dingin bawngtalno khat, tuutal khat le kum khat apha tuuno khat; 40 mawhna hanga biakna dingin keel apa khat; 41 le kilawmtakna biakna-a piak dingin bawngtal nih, tuutal nga, keel apa nga le kum khat a pha tuuno apa nga ahi hi. Hih in Zurishaddai tapa Shelumiel in biakna-a a piak ahi hi.
42 A niguk ni-in Gad mite makaipa Deuel tapa Eliasaph in ama biakna a puak hi.
43 Ama biakna a nihin munsiangtho shekel tawh kizui-a kiteh shekel zakhat le sawmthum khai ngun kuangdai khat, le shekel sawm sagih khai thehna ngun kuangkum khat, an-a biakna annel limci sathau helsa adim tuak tawh; 44 shekel sawm khai kham sikeu-kum khat, gimnamtui adim tawh; 45 meihal biakna dingin bawngtalno khat, tuutal khat le kum khat a pha tuuno apa khat; 46 mawhna hanga biakna dingin keel apa khat; 47 le kilawmtakna biakna-a piak ding bawngtal nih, tuutal nga, keel apa nga le kum khat a pha tuuno apa nga ahi hi. Hih in Deuel tapa Eliasaph in biakna-a a piak ahi hi.
48 A nisagih ni-in Ephraim mite makaipa Ammihud tapa Elishama in ama biakna a puak hi.
49 Ama biakna a nihin munsiangtho shekel tawh kizui-a kiteh, shekel zakhat le sawmthum khai ngun kuangdai khat le shekel sawm sagih khai thehna ngun kuangkum khat, an-a biakna annel limci sathau helsa adim tuak tawh; 50 shekel sawm khai kham sikkeu kum khat gimnamtui adim tawh; 51 meihal biakna dingin bawngtalno khat, tuutal khat le kum khat a pha tuuno apa khat; 52 mawhna hanga biakna dingin keel apa khat; 53 le kilawmtakna biakna-a piak dingin bawngtal nih, tuutal nga, keel apa nga le kum khat a pha tuuno apa nga ahi hi. Hih in Ammihud tapa Elishama in biakna-a a piak ahi hi.
54 A nigiat ni-in Manasseh mite makaipa Pedahzur tapa Gamaliel in ama biakna a puak hi.
55 Ama biakna a nihin munsiangtho shekel tawh kizui-a kiteh, shekel zakhat le sawmthum a khai ngun kuangdai khat, le shekel sawm sagih khai thehna ngun kuangkum khat, an-a biakna sathau helsa annel limci adim tuak tawh; 56 shekel sawm khai sikkeu-kum khat, gimnamtui adim tawh; 57 meihal biakna dingin bawngtalno khat, tuutal khat le kum khat a pha tuuno apa khat; 58 mawhna hanga biakna dingin keel apa khat; 59 le kilawmtakna biakna-a piak dingin bawngtal nih, tuutal nga, keel apa nga, le kum khat a pha tuuno apa nga ahi hi. Hih in Pedahzur tapa Gamaliel in biakna-a a piak ahi hi.
60 A nikua ni-in Benjamin mite makaipa Gideoni tapa Abidan in ama biakna a puak hi.
61 Ama biakna a nihin mun siangtho shekel tawh kizui-a kiteh, shekel zakhat le sawmthum khai ngun kuangdai khat, le shekel sawm sagih khai thehna ngun kuangkum khat, an-a biakna annel limci sathau helsa adim tuak tawh; 62 shekel sawm a khai kham sikkeu-kum khat gimnamtui adim tawh; 63 meihal biakna ding bawngtalno khat, tuutal khat le kum khat a pha tuuno apa khat; 64 mawhna hanga biakna dingin keel apa khat; 65 le kilawmtakna biakna-a piak ding bawngtal nih, tuutal nga, keel apa nga le kum khat a pha tuuno apa nga ahi hi. Hih in Gideoni tapa Abidan in biakna-a a piak ahi hi.
66 A nisawm ni-in Dan mite makaipa Ammishaddai tapa Ahiezer in ama biakna a puak hi.
67 Ama biakna, a nihin mun siangtho shekel zui-a kiteh, shekel zakhat le sawmthum khai ngun kuangdai khat, le shekel sawm sagih a khai thehna ngun kuangkum khat, an-a biakna annel limci sathau helsa adim tuak tawh; 68 shekel sawm khai kham sikkeu-kum khat, gimnamtui adim tawh; 69 meihal biakna ding bawngtalno khat, tuutal khat le kum khat a pha tuuno apa khat; 70 mawhna hanga biakna ding keel apa khat; 71 le kilawmtakna biakna-a piak ding bawngtal nih, tuutal nga, keel apa nga le kum khat a pha tuuno apa nga ahi hi. Hih pen Ammishaddai tapa Ahiezer in biakna-a a piak ahi hi.
72 A ni sawm-le-khat ni-in Asher mite makaipa Ocran tapa Pagiel in ama biakna a puak hi.
73 Ama biakna a nihin munsiangtho shekel tawh kizui-a kiteh, shekel zakhat le sawmthum khai ngun kuangdai khat, le shekel sawmsagih a khai thehna ngun kuangkum khat, an-a biakna annel limci sathau helsa adim tuak tawh; 74 shekel sawm khai kham sikkeu-kum khat, gimnamtui adim tawh; 75 meihal biakna ding bawngtalno khat, tuutal khat, le kum khat a pha tuuno apa khat; 76 mawhna hanga biakna dingin keel apa khat; 77 le kilawmtakna biakna-a piak dingin bawngtal nih, tuutal nga, keel apa nga le kum khat a pha tuuno apa nga ahi hi. Hih pen Ocran tapa Pagiel in biakna-a a piak ahi hi.
78 A ni sawm-le-nih ni-in Naphtali mite makaipa Enan’ tapa Ahira in ama biakna a puak hi.
79 Ama biakna munsiangtho shekel tawh kizui-a kiteh, shekel zakhat sawmthum khai ngun kuangdai khat, le shekel sawmsagih khai thehna ngun kuangkum khat, an-a biakna annel limci sathau helsa adim tuak tawh; 80 shekel sawm khai kham sikkeu-kum khat, gimnamtui adim tawh; 81 meihal biakna dingin bawngtalno khat, tuutal khat le kum khat a pha tuuno apa khat; 82 mawhna hanga biakna ding keel apa khat; 83 le kilawmtakna biakna-a piak ding bawngtal nih, tuutal nga, keel apa nga le kum khat a pha tuuno apa nga ahi hi. Hih pen Enan’ tapa Ahira in biakna-a a piak ahi hi.
84 Hihte pen Israel makaite in biakna-tau sathau a kinilh cianga a ap nading uh biaknate ahi hi: ngun kuangdai sawm le nih, thehna ngun kuangkum sawm le nih le kham sikkeu-kum sawm le nih ahi hi. 85 Ngun kuangdai khat in shekel zakhat le sawmthum ciat khai-a, thehna kuangdai in shekel sawm sagih ciat a khai hi. Ngun kuang khempeuh in munsiangtho shekel tawh kizui-in shekel a tulnih le zali a khai hi. 86 Gimnamtui adim kham sikkeu-kum sawm le nih in munsiangtho shekel tawh kizui-in shekel sawm ciat a khai hi. Kham sikkeu-kum khempeuh a vekpi in shekel b zakhat le sawmnih a khai hi. 87 Meihal biakna dinga kihawl ganhing khempeuh, bawngtalno sawm-le-nih, tuutal sawm-le-nih le kum khat a pha tuuno apa sawm-le-nih le an-a biakna tawh ahi hi. Mawhna hanga biakna dingin keel apa sawm le nih kizang hi. 88 Kilawmtakna biakna dingin ganhing vekpi gawm, bawngtal sawmnih le li, tuutal sawmguk, keel apa sawmguk le kum khat a pha tuuno apa sawmguk a pha hi. Hihte in biakna-tau sathau a kinilh khita apna-a biakna ahi hi.
89 TOPA tawh kiho dingin Moses Kikhopna Puanbuk sungah a lut ciangin cherub nihte kikal Tecipanna singkuang tunga om thoihdamna sin tungsan teng panin amah a hopih aw khat a za hi. Tua hi-a amah tawh a kiho hi.