Thukham Tuamtuamte
19
1 TOPA in Moses tungah, 2 "Israel mipi khempeuh hopih inla amaute tungah: ‘Keimah TOPA note Pasian siangtho ka hi manin note zong siangtho un.3 "‘Note a kuamahpeuh in na nu na pate uh zahtakin ka Sabbath-te na tang ding uh hi. Keimah TOPA note Pasian ka hi hi.
4 "‘Milimte lamah nga kei un, ahikeh a kisung tawm pasiante bawltawm kei un. Keimah TOPA note Pasian ka hi hi.
5 "‘TOPA tungah kilawmtakna biakna ba na piak uh ciangin note tanga kisang thei dingin hih bang zia-in pia un. 6 Na piak ni uh ahikeh a zing ciangin kine khin ding hi; a ni thum ni dong a val lai a om leh pel loin kihaltum ding hi. 7 A ni thumni-in a kine a om leh a nin hi-a, a kisang kei ding hi. 8 A ne mi peuhmah in ama mawhna a khu ding hi, bang hang hiam cih leh amah in TOPA tungah a siangtho na a buahsak khin hi; tua mipa a mipihte panin a kikhenkhia pelmawh ding hi.
9 "‘Na leitang-uah an na lak uh ciangin lonawl cin dong la tektek kei unla a sangh zong khawm siang kei un. 10 Na lenggah lo ah a sangh khawm kei inla a nuaikiate zong tawm kei in. Mizawngte leh pemtate adingin tuate nusia in. Keimah TOPA note Pasian ka hi hi.
11 "‘Gu kei un.
"‘Zuau gen kei un.
"‘Khat le khat kikhem kei un.
12 "‘Amaan lopi-in kei min lo-in kiciam kei unla; note Pasian min daisak kei un. Keimah TOPA ka hi hi.
13 "‘Na vengte uh niambawlin mawksuh kei un.
"‘Nasem dinga na cialte thaman zan khat zong dekbawl kei un.
14 "‘Mittawte hamsiat kei un, ahikeh mittawpa suih khak dingin na khatpeuh koih kei un, na Pasian uh kihta zaw un. Keimah TOPA ka hi hi.
15 Thutang lehhei kei un; mizawngte khentuam kei un, ahikeh a haute angvan tuam kei un; na vengte uh thu a hoihin khensak zaw un.
16 "‘Na mipihte uh lakah mi gensia-in kawivak kei un.
"‘Na vengte uh nuntakna a beisak thei na bangmah sem kei un. Keimah TOPA ka hi hi.
17 "‘Na lungsim sunguah na sanggampa muhdah kei un. Na vengpa uh khialhna na khialhpih loh nadingun amah kiciantakin tai un.
18 "‘Na mipihte uh khatpeuh tungah phulaknopna ahikeh lungsima langneihna nei kei un, ahi hangin nomau na ki-it bangun na vengte uh it un. Keimah TOPA ka hi hi.
19 "‘Ka thukipte zui in,
"‘Ganhing a nam kibang lote ah bah kei un.
"‘Na lo lai-uah khaici nam nih cingkhawm kei un.
"‘Khau namnih kigankhawm puan silh kei un.
20 "‘Pasal khat in midang khat tawh kiciam khin napi a kitankhia nai loin a suakta nai lo a sila numei khat a luppih leh a kituak zah dan kipia ding hi. Thah ding ahi nai kei hi, bang hang hiam cih leh tuanu a kisuaktasak nai kei hi. 21 Bangbang ahi zongin tuapa in Kikhopna Puanbuk lutna-a TOPA tungah khialhna hanga biak nading tuutal khat a puak pelmawh ding hi. 22 Ama khialhna hanga biakna tuutal tawh a bawlsa a mawhna tangin, siampipa in TOPA mai-ah thoihdamna bawlsak dinga, tua ciangin ama mawhna kimaisak ding hi.
23 "‘Tua gamah lutin sing nam khat peuh na suan uh ciangin agah a kikham ab in ngaihsun un. Kum thum sung a kikham bcin na ngaihsun ding uh hi; tuate a kine peuhmah kei ding hi. 24 A kum lina kumin a siangtho hi dinga, TOPA mai-ah phatna-a biakna khat ahi hi. 25 Ahi hangin a kum ngana kumin a gah na ne thei ding uh hi. Hici bangin na khawhsate uh gah a khang ding hi. Keimah TOPA note Pasian ka hi hi.
26 "‘Sa khatpeuh a sunga sisan omlai pi-in ne kei un.
"‘Aisanna ahikeh bumna nasepin nei kei un.
27 "‘Note in na basam uh met kei un, ahikeh na khamul mongte uh zong na theu kei ding uh hi.
28 "‘Misite hangin na pumpi uh kuikek ahikeh na citung uh gialsak kei un. Keima TOPA ka hi hi.
29 "‘Na tanute uh kizuaksakin a vaang uh kiamsak kei un; tua hi kei leh tua gam kizuakna suak dinga gitlohna tawh a dim ding hi.
30 "‘Ka Sabbatth-te tang unla ka mun siangtho zahtak un. Keimah TOPA ka hi hi.
31 "‘Ai siamte zuan kei un, ahikeh dawi lawm zong kei un, ahang in, tuate-in na kibuahsak kha ding uh hi. Keimah TOPA note Pasian ka hi hi.
32 "‘A teekte mai-ah ding unla, a upazaw peuhmah zahtakna lakin, na Pasian uh zahtak un. Keimah TOPA ka hi hi.
33 "‘Na gamuah pemta khatin nang hong belh ciangin amah bawlsia kei in. 34 No tawh a tengkhawm pemta khat, no tualsuakte khatmah bangin kibawl pelmawh ding hi. Nangmah na ki-it bangin amah it in; ahang in note zong Egypt ah pemta na hi uh hi. Keimah TOPA note Pasian ka hi hi.
35 "‘A sau tehna, a gik khaina ahikeh a lian tehna na teh uh ciangin thumaan loin hih kei un. 36 Amaan-a tehna, a maan-a khaina ephah cd maan le hin de maan zang un. Keimah TOPA note Pasian Egypt pana hong paikhiatpihpa ka hi hi.
37 "‘Ka thukip khempeuh le ka thukham khempeuh zui-in tangun. Keimah TOPA ka hi hi, ci hi,’ ci un," a ci hi.