Mawhna Hanga Biakna
4
1 TOPA in Moses tungah, 2 "Israel tungah: ‘Mi khatpeuh in sawmkhol lopi-in TOPA thupiakte lak pana kikham khatpeuh a khialh khak leh -3 "‘Sathau nilhsa siampipa a mawh a, mipite tungah mawhna a tut leh amah in ama hihsa mawhna hanga biakna dingin a sitbaang lo bawngtalno khat TOPA tungah a puak pelmawh ding hi. 4 Amah in Kikhopna Puanbuk lutna TOPA mai-ah tua bawngtal a pia ding hi. Amah in tua gan lutungah a khut nga dinga TOPA mai-ah a go ding hi. 5 Tua ciangin sathau kinilhsa siampipa in bawngtal sisan pawlkhat la-in Kikhopna Puanbuk sungah a lutpih ding hi. 6 Amah in sisan lakah a khutme diah dinga, mun siangtho puanzak mai, TOPA mai-ah tuate pawlkhat sagih vei a theh ding hi. 7 Tua ciangin siampipa in Kikhopna Puanbuk sunga TOPA mai-a om gimnamtui halna biakna-tau kite tungah tua sisan pawlkhat a nuh ding hi. Tua a om lai bawngtal sisan teng Kikhopna Puanbuk lutna-a meihal biakna-tau bulah a sungkhia ding hi. 8 Amah in mawhna hanga biakna bawngtal panin athau khempeuh hawikhia-in - a sungkuate a tuam athau ahi zongin tuate tawh a kizom, 9 a kawngbom kianga a kalte gel, tuate tunga athau tawh le a kalte tawh a lakkhiat khawm ding a sin tuam tawh - 10 kilawmtakna biakna-a ba a kipia bawngpi cb-a, athau kilakhia bang tektek hi ding hi. Tua ciangin siampipa in meihal biakna-tau tungah tuate a hal ding hi. 11 Ahi hangin bawngtal vun le a sate khempeuh a lu le a khete, a sungkua le a ekte tawh - 12 tuate pen bawngtal sa a om lai teng giahphual pualam, a siangtho-a kisehsa mun khat vut buakna munah paipih dinga, vutte tungah sing tawh mei cihin a haltum ding hi.
13 "‘Israel mihon buppi in sawm khol lopi-in TOPA thupiakte lakpan a kham khatpeuh semin a mawh uh leh mihonpi in tua thu a phawkkha kei uh zongin amaute a khial uh ahi hi. 14 Amaute in a hihsa uh mawhna a phawk uh ciangin tua pawl buppi in Kikhopna Puanbuk mai-ah mawhna hanga biakna-in bawngtalno khat pia ding uh hi. 15 Mihonte upate in TOPA mai-a bawngtal lutungah a khut uh nga ding uh a, TOPA mai-ah bawngtal kigo ding hi. 16 Tua ciangin sathau kinilhsa siampipa in bawngtal sisan pawlkhat la-in Kikhopna Puanbuk sungah lutpih ding hi. 17 Amah in a khutme sisan lakah diahin puanzak maisan-a TOPA mai-ah sagih vei a theh ding hi. 18 Amah in Kikhopna Puanbuk sungah TOPA mai-a biakna-tau kite tungah sisan pawlkhat nuh ding hi. Amah in sisan a om lai teng Kikhopna Puanbuk lutna-a meihal biakna-tau bulah sungkhia ding hi. 19 Amah in athau khempeuh hawikhia dinga biakna-tau tungah halin, 20 mawhna hanga biakna bawngtal ahih bang tektekin a hih ding hi. Hici bangin siampipa in amaute adingin thoihdamna bawl dinga amaute a kimaisak ding hi. 21 Tua ciangin amah in giahphual pua-ah bawngtal lakhia dinga bawngtal masapen a hal bangin a hal ding hi. Hih in mihonpite ading mawhna hanga biakna ahi hi.
22 "‘Makai khat in TOPA ama Pasian thupiakte lakah a kikham khatpeuh sawmkhol lopi-in hih-a, a mawh ciangin a khial ahi hi. 23 Ama hihsa mawhna amah a kiphawksak ciangin amah in biakna-in a sitbaang lo keel apa khat paipih pelmawh ding hi. 24 Amah in keel lutang tungah a khut nga dinga, meihal biaknate kigawhna mun TOPA mai-ah tua a kigo ding hi. Tua in mawhna hanga biakna ahi hi. 25 Tua ciangin siampipa in mawhna hanga biakna gan sisan pawlkhat a khutme-in la dinga meihal biakna-tau kite nuhin sisan a om lai teng biakna-tau bulah a sungkhia ding hi. 26 Amah in kilawmtakna biakna thaute a hal bang tektekin athau khempeuh biakna-tau tungah hal ding hi. Hici bangin siampipa in mipa adingin thoihdamna bawlsak dinga, tua ciangin amah kimaisak ding hi.
27 "‘Mihonpi sunga pawlmi khat in, TOPA thupiakte in a kham khatpeuh sawmkhol lopi-in a hih khak leh amah a khial ahi hi. 28 Ama hihsa mawhna a kiphawksak ciangin a hihsa mawhna hanga biakna dingin a sitbaang lo keel nu khat a paipih pelmawh ding hi. 29 Amah in mawhna hanga biakna gan lutungah a khut nga dinga meihal biakna munah a go ding hi. 30 Tua ciangin siampipa in a khutme tawh a sisan pawlkhat la-in meihal biakna-tau kite nuh dinga, a om lai sisan teng biakna-tau bulah a sungkhia ding hi. 31 Amah in kilawmtakna biakna-a athau a hawikhiat bang tektekin athau khempeuh hawikhia dinga siampipa in TOPA a lungkimsak gimnamtui ahi dingin biakna-tau tungah a hal ding hi. Hici bangin siampipa in ama adingin thoihdamna bawlsak dinga tua ciangin amah kimaisak ding hi.
32 "‘Amah in a mawhna hanga biakna-in tuuno khat a paipih leh a sitbaang lo anu khat a paipih ding hi. 33 Amah in tua gan lutungah a khut nga dinga meihal biakna kigawhna munah mawhna hanga biakna-in a go ding hi. 34 Tua ciangin siampipa in a khutme tawh tua mawhna hanga biakna gan sisan pawlkhat la dinga, meihal biakna-tau kite nuhin sisan a om lai teng biakna-tau bulah a sungkhia ding hi. 35 Amah in kilawmtakna biakna tuuno thau a hawikhiat bang tektekin athau khempeuh hawikhia dinga siampipa in TOPA mai a biakna-tau tunga mei-a hal biakna tung sawnah a hal ding hi. Hici bangin ama hihsa mawhna tang dingin siampipa in ama adingin thoihdamna bawlsak dinga, tua ciangin amah kimaisak ding hi.