Siampi Laibu
Meihal Biakna
1
1 TOPA in Moses samin Kikhopna Puanbuk panin amah hopih a, 2 "Israel-te hopih inla, amaute tungah: ‘Note khatpeuh in TOPA tungah biakna khatpeuh na puak uh ciangin bawnghon lak pan ahikeh keelhon lak panin ganhing khat biakna-in keng uh hen.3 Tua biakna pen bawnghon pana meihal biakna ahileh aa a sitbaang lo a pa-in a bia ding hi. Tua pen TOPA santheih a suah nadingin Kikhopna Puanbuk lutna ah a pia ding hi. 4 Amah in tua meihal biakna ganhing lutungah a khut nga dinga tua pen ama aitangin thoihdamna bawlna-in kisang ding hi. 5 Amah in TOPA mai-ah bawngtalno go dinga, tua ciangin Aaron tapa siampite in a sisan tawi-in Kikhopna Puanbuk lutna-a biakna-tau a pang kimkot a theh ding uh hi. 6 Amah in meihal biakna a vun hawkin a semnen ding hi. 7 Aaron tapa siampite in biakna-tau tungah mei tawhin mei tungah sing a khul ding uh hi. 8 Tua ciangin Aaron tapate siampite in biakna-tau tunga sing kuanglai tungah tua sa semnensate a lu le a thau tawh a gual ding uh hi. 9 Amah in a sungkua teng le a khete tui-in sawp dinga, siampipa in tuate khempeuh biakna-tau tungah a hal ding hi. Tua in meihal biakna, mei tawh a kihal biakna khat hi-in TOPA a lungkimsak gim namtui khat ahi hi.
10 "‘Tua biakna tuuhon pana meihal biakna ahileh, tuute lak pan ahi a, keelte lak pan ahi zongin a sitbaang lo a pa khatin a bia ding hi. 11 Amah in biakna-tau a saklam pang TOPA mai-ah tua go dinga Aaron tapa siampite in tua gan sisan biakna-tau pang khempeuh a theh ding uh hi. 12 Amah in semnen dinga, siampipa in biakna-tau tunga sing kuang lai tungah a lu le a thau tawh tuate a gual ding hi. 13 Amah in a sungkuate le a khete tui-in sawp dinga, siampipa in tuate khempeuh tawi-in biaknatau tungah a hal ding hi. Tua in meihal biakna, mei tawh a kihal biakna khat hi-in, TOPA a lungkimsak gimnamtui khat ahi hi.
14 "‘TOPA tunga biakna, vasate tawh meihal biakna ahileh amah in vakhu ahikeh kawl vakhuno khat a pia ding hi. 15 Siampipa in biakna-tau ah tawi-in a lutang hektan dinga, biakna-tau tungah a hal ding hi; biakna-tau pangah a sisan kitheh-khiasak ding hi. 16 Amah in a tangkhai a sungate bb tawh lakhia-in biakna-tau nisuahna lampang vut omna-ah a lawn ding hi. 17 Amah in a khate in balkham dinga, a balkhiasuak kei ding hi. Tua ciangin siampipa in biakna-tau tunga sing tunga mei tungah a hal ding hi. Tua in meihal biakna, mei tawh a kihal biakna khat hi a, TOPA a lungkimsak gim namtui khat ahi hi.