Siampi Puansilhte
39
1 Amaute in munsiangtho sunga biakna nasep nadingin adum, a dupsan, a-ausan khau tawh kigan puansilhte a khui uh hi. Amaute in, TOPA in Moses a thupiak bang tektekin Aaron adingin puansilh siangthote zong a bawl uh hi.Siampi Puan
2 Amaute fa in kham le adum, a dupsan, a-ausan khau le hoihtak-a kikhuk-a kigan puan tawh siampi puan a bawl uh hi. 3 Amaute in kham a pa dikdekin a pekin sek uh a, adum, adupsan le a-ausan khaute tawh puan hoih-a a gatkhawm dingun - khutsiamte in a zangin a zen uh hi. 4 Amaute in siampi puan liangkaihte bawl uh a, a kikhih theih nadingin a kiu nihte ah a bulh uh hi. 5 TOPA in Moses a thupiak bang tektekin khutsiamtaka kigan kawng-gak zong tua mah bang hi-a - siampi puan tawh sakhatin kibawlin, kham tawh adum, adupsan, a-ausan khau le hoihtaka kikhuk-a kigan puan tawh kibawl hi.
6 Amaute in onyx suangte tatin min gelhna seal bangin Israel tapate minte khuak uh a, kham kuak sungah a suang uh hi. 7 Tua ciangin TOPA in Moses a thupiak bang tektekin amaute in Israel’ tapate phawk nadingin tuate siampi puan-ak liangkaihna tungah a khihkip uh hi.
Awmtuam
8 Amaute in awmtuam zem uh a - khutsiamte sep ahi hi. Amaute in siampi puan-ak bangin: kham tawh, adum, adupsan le a-ausan khau le hoihtak-a kikhuk-a kigan puan tawh a bawl uh hi. 9 Tua pen khap gb khat a sau, khap khat mah a zai - a ningkim - khep nih-a kikhep ahi hi. 10 Tua ciangin amaute in tua tungah suangmanpha gual li-in a suang uh hi. A gual masa pen ah ruby khat, topaz khat le beryl khat; 11 a gual nihna ah turquoise khat, sapphire hc khat, le Emerald khat; 12 a gual thumna ah jacinth khat, agate khat le amethyst khat; 13 a gual lina ah chrysolite khat, onyx khat le jasper id khat ahi hi. Tuate kham kuak sunga kisuang ahi hi. 14 Suang sawm le nih hi-a, khat tungah Israel tapate min khat tek, nam sawm le nihte min khat ciat min gelhna seal banga kikhuak ciat ahi hi.
15 Amaute in awmtuam adingin khau bangin kham citak khainiang a bawl uh hi. 16 Amaute in kham kikuaksak nih le kham kual nih bawl uh a, tua awmtuam kiu nihte ah a kualte a bulh uh hi. 17 Amaute in tua kham khainiang nihte, awmtuam kiu-a kualte ah bulh uh a, 18 tua khainiangte mong langkhat, siampi puan-ak liangkaih puan tung, a mailamah a bulh uh hi. 19 Amaute in kham kual nih bawl uh a, awmtuam kiu langkhat lam siampi puan-ak tawh kizopna a nuai lam mongah a bulh uh hi. 20 Tua ciangin kham kual nih bawl beh lai uh a, siampi puan liangkaih nihte nuai a mailamah kawnggak tung deuh siampi puan-ak pang khuina kiangah a bulh uh hi. 21 Amaute in, TOPA in Moses a thupiak bang tektekin awmtuam sikkualte le siampi puan sikkualte khaudumin khihkhawm uh a, siampi puan panin awmtuam a kiveikhiat loh nadingin a kawnggak tawh a zom uh hi.
Siampi Puansilh Dangte
22 Amaute in siampi puan adum puan bekbek bawl uh a - puangat siamte gat hi-in - 23 puan gawl-an je kihong bangin puantualpi laizang a vang hi; a kikek loh nadingin a vang kimkotah a zimna a om hi. 24 Amaute in adum, adupsan, a-ausan khau le limtaka kikhuk-a kigan puan tawh puantualpi mong kimkotah mang kawlsinggah a bawl uh hi. 25 Tua ciangin amaute in kham citak longte bawl uh a, a mong kimkot-a mang-kawlsing gahte kikalah a thuah uh hi. 26 TOPA in Moses a thupiak bang tektekin biakna nasep cianga silh dingin puantualpi mong a kimkot-a longte le mangkawlsing gahte a kikalhelh dimdiam hi.
27 Aaron le a tapate adingin amaute in puangat siamte gat puan hoih tawh puansungsilh khui uh a - 28 khau hoih kigan dialkhip, khau hoih tawh kigan lugak limtak-a kikhuk-a kigan pheituam sungtente a khui uh hi. 29 TOPA in Moses a thupiak bang tektekin - puan kawnggak pen, hoihtaka kikhuk-a kigan puan le adum, adupsan, a- ausan khau - khutkhui siamte sep ahi hi.
30 Amaute in kham citak tawh a pek khat bawlin a siangtho kumpi lukhu khat bawl uh a, tua tungah min gelhna seal bangin khuak in: TOPA TUNGAH SIANGTHO ci uh hi. 31 Tua ciangin TOPA in Moses a thupiak bang tektekin a amaute in dialkhip tunga a suan nadingin tua tungah khaudum khat a vawh uh hi.
Moses in Biakbuk Vel
32 Tuaci-in biakbuk le Kikhopna Puanbuk kimansiang hi. TOPA in Moses a thupiak bang tektek in Israel-te in na khempeuh a sem khin ta uh hi. 33 Tua ciangin amaute in Moses kiangah biakbuk puak uh a: puanbuk le a sunga vanzatte khempeuh, a mekkilhte, a singpekte, a zawnna zawlte, a khuamte le a bullente; 34 a khuhna asan-a kinim tuutal vunte, tuipi bawngpi af vun-a kibawl khuhnate le a dalna puanzak; 35 Tecipanna singkuang, a zawlte le thoihdamna sin; 36 sabuai, a nazatte khempeuh tawh, le Ompihna anlum; 37 kham citak meivak tunna-a kigual meivakte le a vanzatte, le mei-a kivak ding sathau; 38 kham biakna-tau, nilh sathau, gim namtui, le puanbuk lutna ading puanzak; 39 sumngo biakna-tau le a sumngo siklen, a khuamte le a vanzatte khempeuh; kuangpi a tunna tawh; 40 huang puanzakte a khuamte le a bullen tawh; huangsung lut nadinga puanzak; khauhualte le huang ading puanbuk khetphimte; biakbuk-a vanzat dingte khempeuh, Kikhopna Puanbuk; 41 le munsiangtho sunga biakna nasepna-a silh dinga kigan puansilhte, siampi Aaron le a tapate in siampi na a sep uh ciangin a zat ding uh a siangtho puansilhte ahi hi.