Kham Bawngno
32
1 Mipite in mualtung pan Moses paisuk hak lua sa uh a, Aaron kimkotah kikhawmin, "Hong pai-in ka mai-ua pai ding pasiante ba hong bawlsak in. Egypt pana hong paikhiatpih i lawmpa Moses bang suak ta hiam, ka thei kei uh hi," a ci uh hi.2 Aaron in amaute kiangah, "Na zite, na tanute na tapate uh bah kham bilbahte la unla ka kiangah hong puak un," ci-in a dawng uh hi. 3 Tua ciangin mi khempeuh in a bilbahte uh sutkhia in Aaron kiangah a puak uh hi. 4 Amaute in a khut sunga a piakte uh la-in bawngno lim sunin a sunna zemin a sung hi. Tua ciangin amaute in, "Israel aw, hihte in Egypt pana note hong paikhiatpih na pasiante cb uh ahi hi," a ci uh hi.
5 Aaron in hih a muh ciangin bawngno mai-ah biakna-tau khat dawh a, "Zing ciangin TOPA ading pawi khat a om ding hi," ci-in a zasak hi. 6 A zing ciangin mipite thobaih uh a, meihal biakna pia in, kilawmtakna biaknate dc a pia uh hi. Tua ciangin ne-in dawn uh a gualnuam mahmah uh hi.
7 Tua ciangin TOPA in Moses kiangah, "Paisuk in bang hang hiam cih leh Egypt pana na paikhiatpih, na mite kisiagawp zo uh hi. 8 Amaute ka thupiak pan pial baih mahmah uh hi; amaute in bawngno lim suna kisung lim a bawltawm uh hi. Amaute tua mai-ah kunin kithoihna pia uh a, ‘Israel aw, hihte Egypt pan-a hong paikhiatpih na pasiante uh ahi hi,’ ci uh hi.
9 "TOPA in Moses tungah, "Hih mipite ka mu zo hi; amaute ngawng khauh mite ahi uh hi. 10 Ka hehna amau tungah a kuan nading le amaute ka suksiat nadingin tu-in hong hici omsak hi. Tua ciangin nang minam lian khat kong suaksak ding hi," a ci hi.
11 Ahi hangin Moses in TOPA ama Pasian’ angvanna a zong hi. Amah in, "TOPA aw, vanglianpi le a thahat khut tawh Egypt pana na paikhiatpih na mite tungah bang hangin na hehna kuang ding ahi hiam? 12 Bang hangin Egypt-te in, ‘Amaute mual tunga a thah ding le leitung pana a phiatkhiat mang ding gitloh sawmin amaute a paikhiatpih hi;’ cisak ding na hi hiam? A lauhuai na hehna daisak in; na lungsim hei inla na mite tungah siatna tungsak kei in. 13 Nang mahmah in, ‘Na suan na khakte van-a aksi zahin ka tamsak ding hi, amaute ka khapsa hih gam khempeuh na suan-le-khakte ka pia dinga, amaute in a luah tawntung ding uh hi,’ ci-a na nasem Abraham, Isaac le Israel tunga na kamciamsa phawk in,’ a ci hi. 14 Tua ciangin TOPA in a lungsim hei-a, a mite tunga tunsak ding a cih siatna a tungsak kei hi.
15 Moses kihei-in Tecipanna suangpek nih tawi kawmin mual panin a paisuk hi. Tuate a nung le a mai a langnihin a kigelh hi. 16 Suangpekte Pasian bawlsa ahi hi; a kigelhte suangpekte tunga kikhuak Pasian gelh ahi hi.
17 Joshua in mipite kikona husa a zak ciangin Moses kiangah, "Giahphualah gal kidona aw ging hi," a ci hi.
18 Moses in,
"Tua in zawhna aw lah hi kei,
lelhna aw zong hi kei;
kei zak lasakna aw ahi hi," ci-in a dawng hi.
19 Giahphual ah Moses a tun dektak ciangin bawngno lim le lamna mu-a, a heh suak lua-in mual bulah suangpek lawna, tuate a kitamzan hi. 20 Amaute bawlsa bawngno la-a mei-in a hal hi; tua ciangin gawivui a, tui lakah theh in Israel-te a dawnsak hi.
21 Amah in Aaron kiangah, "Hih zah a mawhna lian bawl dinga na makaih hih mipite in nang tungah bang hong hih uh ahi hiam?" a ci hi.
22 Aaron in, "Ka topa aw, heh kei in. Hih mite gitlohna lam a manlan mahmah uh na thei hi. 23 Amaute in, ‘Kote mai-a pai ding pasiante hong bawlsak in; Egypt pana hong paikhiatpih i lawmpa Moses lah bang suak ta hiam ka thei kei uh hi,’ hong ci uh hi. 24 Tua ciangin amaute kiangah, ‘Kham kizepna a nei peuhmah in sutkhia un,’ ka ci hi. Tua ciangin amaute in kei kham hong pia uh a, mei sungah ka lot leh hih bawngno hong suak hi!" ci-in a dawng hi.
25 Moses in mipite uanglua a, Aaron in kham zo loin hih bangin galte ciamnuihna suak hi, cih a mu hi. 26 Tua ahi cianigin amah giahphual lutna-ah dinga, "TOPA lama pang peuhmah ka kiangah hong pai un," a ci hi. Tua ciangin Levi-te khempeuh ama kiangah a kisutuah kik uh hi.
27 Tua ciangin amah in amaute kiangah, "TOPA, Israel’ Pasian in, ‘Mi khempeuh in a namsau uh a panguah kuah uh hen. Giahphual mong khat pan mong khatah kileh kawikawi-in a sanggampa, a lawmpa, a vengpa that ciat uh hen,’ ci hi," a ci hi. 28 Moses thupiak bangin Levi-te in hih uh a, tua ni-in mi tul thum bang a si hi. 29 Tua ciangin Moses in, "Note, na tapate uh le na sanggamte uh langah pang na hi manun tuni-in TOPA lamah sehtuam na hi uh hi; tuni-in amah in note thupha hong pia zo hi," a ci hi.
30 A zing ciangin Moses in mipite tungah, "Mawhna lianpi na bawl khin zo uh hi. Ahi hangin tu-in TOPA kiangah ka pai to ding hi; na mawhna uh thoihdamna ka bawl thei kha ding hi," a ci hi.
31 Tua ciangin TOPA kiangah Moses pai kika, "Hih mite bawl mawhna lian lua mahmah si! Amaute in kham pasiante a bawl khin uh hi. 32 Ahi hangin tu-in amaute mawhna maisak in - na maisak zawh kei leh na gelhsa laibu panin kei hong phiat in," a ci hi.
33 TOPA in Moses kiangah, "Kei tunga a mawh mi peuhmah ka laibu pan ka phiatkhia ding hi. 34 Tu-in pai inla kong gensa munah mipite makaih in, na mai-ah ka vansawltak a pai ding hi. Ahi ta zongin ka dantat ding hun a tun ciangin amaute mawhna hangin ka dantat ding hi," a ci hi.
35 Tua hi-a Aaron bawlsa bawngno tunga a gamtatnasa uh hangin TOPA in mipite pulpi in a vat hi.