Tacilte Apna
13
1 TOPA in Moses kiangah, 2 "Tacil peuhmah kei tungah hong ap un. Israel-te lakah, naubu sunga piangkhia masa pen peuhmah mihing ahi-a, ganhing ahi zongin kei aa ahi hi," a ci hi.3 Tua ciangin Moses in mite tungah, "Tuni, Egypt pana na paikhiat ni uh, sila suahna gam pana na paikhiat ni uh phawk un; bang hang hiam cih leh TOPA in a thahat khutin tua lai pan hong paikhiatpih hi. Silngo kisawh bangmah ne kei un. 4 Abib kha tuni-in na nusia uh hi. 5 TOPA in Canaan-te, Hit-te, Amor-te, Hiv-te le Jebus mite omna gam -na pute uh tunga, no tunga hong piak dinga a ciamsa gam - bawngnawi le khuaizu luanna hong tut ciangin - hih kha in hih pawi na bawl ding uh hi: 6 Ni sagih sung silngo sawl loh anlum ne unla, a ni sagihna ni-in TOPA tungah pawi bawl un. 7 Tua ni sagih sung teng silngo sawh loh anlum ne un; note lakah silngo kisawh bangmah a kimuh loh banah note omna huam sung mun khat beekah silngo a kimu kei ding hi. 8 Tua ni-in na tapa tungah, ‘Egypt pana kong paikhiatpih lai-in TOPA in kei ading nasem ahi manin hih ka sem hi,’ ci-in gen un. 9 Hih pawibawlna pen, note khut-ah note adingin lim hi henla, na muk-uah TOPA’ thukham hi-in, na taltang-uah phawkkiksakna hi hen. Ahang in, TOPA in a khut thahat tawh Egypt panin hong pikhia hi. 10 Kum khat khit kum khat thuseh hunin hih pawi na bawl tektek ding uh hi.
11 "TOPA in no tung le na pute uh tungah tomlo-a a kiciamsa bangin Canaan mite’ leitangah hong puakin nang hong piak ciangin 12 naubu peuhmah sunga piang masate TOPA tungah na pia ding uh hi. Na ganhingte uh ta apa a suak masa peuhmah TOPA aa ahi hi. 13 Laa a suak masa pen tuuno khatin tan un, ahi zongin na tat kei uh leh a ngawng kuaitan un. Na tapate uh lakah a suak masa peuhmah tan un.
14 "Mailam hunah na tapa in hong dot-a, ‘Hih bang cihnopna hiam?’ hong cihleh ama kiangah, ‘TOPA in khut thahat tawh Egypt-a sila suahna panin hong paikhiatpih hi. 15 Pharaoh in kote paisak ding a nial tentan ciangin TOPA in Egypt a tacil peuhmah mihing ganhing a nihin that khawm hi. Tua hangin naubu peuhmah-a piangkhia masa pasal peuhmah TOPA tungah biakpiakna in kipia ka tapa a suak masa pen ka tan hi,’ ci in. 16 Tua in na khutah lim bang hi henla, na taltang tungah ciamtehna lim hi hen; ahang in, TOPA in a khut thahat tawh Egypt panin hong paikhiatpih hi," a ci hi.
Tuipi Kanna
17 Pharaoh in mipite a paisak ciangin Pasian in, a nai zawk hangin Philistia-te gam lamah amaute a makaih kei hi. Ahang in Pasian in, "Amaute in gal tuak le uh a lungsim uh khel-in Egypt ah ciah kik kha ding uh hi," a ci hi. 18 Tua ahi ciangin Pasian in mite San Tuipi aa lam manawh in sehnel gam lampi tawnin a kual paipih hi. Israel mite galsim dingin Egypt pan kithuamsa-in paikhia to uh hi.
19 Joseph in Israel’ tapate tomlo-in kiciamsak ahi manin Moses in Joseph guhte a pua hi. Amah in, "Pasian in note hong huh pelmawh ding hi, tua ciangin hih mun panin ka guhte na pua pelmawh ding uh hi," bb a ci hi.
20 Succoth a nusiat khit uh ciangin Sehnel-gam nawl Etham ah giahphual a sat uh hi. 21 Amaute sun le zanin a pai theih nadingun sunin TOPA amai-uah meii khuampi-in pai-in makaih a, amaute khuavak dingin zanin mei khuampi sungah amaute a makaih hi. 22 Sun-a meii khuampi, zan-a mei khuampi in mipite mai-a a omna a lawi kei hi.