Sarah Sihna
23
1 Sarah kum za khat le sawm nih le sagih dong nungta hi. 2 Amah Canaan leitang Kiriah Arba (tua pen Hebron) ah si a, Sarah hangin Abraham thumin kap hi.3 Tua ciangin a si a zi kiang pan ding khia a, Hit-te aa a va hopih hi. Amah in, 4 "Note lakah kei pemta khat ka hi hi. Ka misi ka vui theih nadingin a han ding mun khat hong zuak un," a ci hi.
5 Hit-te in Abraham kiangah, 6 "Pu aw, ka thu gen uh na ngai in. Kote lakah nang a thahat ukpa khat na hi hi. Ka hante uh na deihna penpen ah na misi vui in. Na misi na vui nading kuamah in a han nial lo ding hi," ci uh hi.
7 Tua ciangin Abraham dinga tua gam mi, Hit-te mai-ah a kunsuk hi. 8 Amah in amaute kiangah, "Ka misi vui ding phal na hi uh leh ka thu hong ngai un. 9 Zohar’ tapa Ephron tungah, ama neihsa a lonawla Machpelah suanghawm kei hong zuak nadingin hong thumsak un. Note laka han mun na kileina zah uh a cingtaka ka piak dingin kei tangin hong gensak un," ci hi.
10 Ama mipihte laka tu Hit mi Ephron in khuapi kongpi-a hong pai Hit-te khempeuh zakin Abraham dawnga, 11 "Hi lo hi, topa aw, ka thugen na ngai in; ka lo kong pia bb-a, a sunga suanghawm zong kong pia cc hi. Ka mite omin nang kong pia dd hi, na misi vui in," a ci hi.
12 Tua gammite mai-ah Abraham kunsuk kika, 13 amaute zakin Ephron kiangah, "Na ut leh ka thugen na ngai in. Tua lo a man ding kong pia ding hi. Tua lai-ah ka misi ka vui theih nadingin hong sang hoh in," a ci hi.
14 Ephron in Abraham kiangah, 15 "Ka thu hong ngai in topa aw; leitang in ngun shekel ee zali man hi, ahi hangin nang le kei kikalah tua pen bang hi lel hiam? Na misi vui lel in," ci-in dawng hi.
16 Abraham in Ephron a piak ding Hit-te zaka a minvawh khiat zah: sumbukte laka kizangtang tehna tawh kizui-in ngun shekel za li piak ding thukima, a tehkhia hi.
17 Tua ciangin Mamre kianga Machpelah a Ephron’ lo - a lo leh a suanghawm a nih, le a lo kigi huam sunga singkung khempeuh - 18 khuapi kongpi-a hong pai Hit-te khempeuh omin a ngeina om bangin Abraham neihsa in kibawl hi. 19 Tua khit ciangin Abraham in a zi Sarah, Canaan gam Mamre kianga Machpelah (Hebron a om pen) a lo sunga suanghawm ah vui hi. 20 Tua ciangin lo le a sunga suanghawm, Abraham han dingin a ngeina om bangin Hit-te in a bawl uh hi.