Abram tawh Pasian Thukhun
15
1 Hih khit ciangin mangmuhna tawh TOPA kammal Abram tungah tunga,"Abram aw, lau kei in.
Keimah na lum ka hi hi; ea
Na pahtakman a lian mahmah pa ka hi hi," fb ci hi.
2 Ahi hangin Abram in, "Thuneipipen TOPA aw, ta ka nei kei hi, ka neihsate a luah gc ding Damascus a Eliezer ahi manin bang hong pia thei ding na hi hiam?" a ci hi. 3 Abram in, "Ta nong pia kei hi; tua ahi ciangin ka inn sunga nasem khat in ka inn luah ding hi," a ci hi.
4 Tua ciangin ama tungah TOPA kammal tunga: "Hih mipa in na inn a luah kei ding hi. Nangma sung pana suakkhia tapa khat in na gamh a luah ding hi," a ci hi. 5 Amah a pualamah paikhiatpih a, "Vante ento-in na sim zo hiam aksite sim in," ci a, tua ciangin ama kiangah, "Na suan-le-khakte tua bang hi ding hi," ci hi.
6 Abram in TOPA um a, amah in tua pen thumaanna-in simsak hi.
7 Amah in, "Keimah in Chalde-te gama Ur pan hong pikhia a, na neih hih gam hong piapa TOPA ka hi hi," ci hi.
8 Ahi hangin Abram in, "Thunei-pipen TOPA aw, tua ka neih ding ahilam bangci theih ding ka hi hiam?" ci hi.
9 Tua ahi ciangin TOPA in, "Kum thum ciat a pha bawngla khat, keel khat, tuutal khat hong puak inla tuate tawh vakhu khat le kawlvakhu khanglai khat hong puak in," ci hi.
10 Abram in hihte khempeuh amah puaka, tuate phel nih suahin a sate khat le khat a kigalsai dimdiam in a gual hi: vasate pen phel nih a suah kei hi. 11 Tua ciangin sasialne vasate, tua sate tungah tu uh a, ahi hangin Abram in hawlkhia mang hi.
12 Ni tumkuan a, Abram ihcipin a lauhuai khuamial sah mahmah in amah a mialnelh hi. 13 Tua ciangin TOPA in a kiangah "Na suan-le-khakte, amau gam ahi lo gam khatah mikhual hi ding uh a, mi sila suakin kum zali sung kibawlsia ding cih theician in. 14 Ahi hangin a sila suahna uh minam, dan ka pia dinga, tua nung ciangin amaute neihsa tampitak tawh a paikhia ding uh hi. 15 Nang na hileh na pate kiang lungnuamtakin na zuan dinga, tekkut vuaikutin hong kivui ding hi. 16 Amor mite mawhna kicing kim nai lo ahi manin a khang lina ciangin na suan-le-khakte hih lai-ah a pai kik ding uh hi," ci hi.
17 Ni tumin khua a mial khit ciangin meikhu kawma a kuang meibel tang hong kilangin tua sate kikalah a paisuak hi. 18 Tua ni-in TOPA in Abram tawh thukhun bawl a, "Na suante tungah hih leitang, Egypt gun hd panin gunpi lian Euphrates dong - 19 Ken-te, Keniz-te, Kadmon-te, 20 Hit-te, Periz-te, Rephaim-te, 21 Amor-te, Canaan-te, Girgash-te le Jebus-te ka pia hi," ci hi.