Olwaandiko lwa kábili lwa
Yohana
Enyaángalucha
1
1 Iinye omunyaampala we ekelezia, niinkwaandikila iiwe munyaányeenye ogwo otoziibwe na Múungu, hamo na abaana baawe.a Áabo nyeénda omu mazima, na tí iinye nyeénka, náho na abaandi bóona áabo abalikusoombookelwa áago amazima. 2 Nitubeénda habwo kuba íichwe ne íimwe nitusoombookelwa aago amazima agali omuli íichwe, kaandi nago nigazeendelela kwiikala omuli íichwe obucha no buchiile.3 Mbweenu, embabazi, echiganyizi no obuhóolo éebyo ebiluga hali Isiichwe Múungu no Omwaana woómwe Yeézu Kristu, nibiba hamo neechwe omumazima ne engoonzi.
Kweendana Nikwo Okugomokela Ebilagilo Bya Múungu
4 Nkanulilwa bwooli kubona nka nikwo omu baana baawe balimo abalikweékomya amazima, nka nikwo Isiichwe Múungu yaatulagiile. 5 No obu, munyaányeenye, omu lwaandiko óolu, niinkusába nka nikwo oyekomye echilagilo cho kweendana. Echilagilo éechi tí chisha, náho nicho éecho nyini chi twaabele twiinacho kulugiilila ahabubaandizo, nka nikwo tweendane íichwe omuli íichwe nyini.b 6 No kweendana nikwo óoku, tutuule omukugomokela ebilagilo bya Múungu. Eechi nicho echilagilo chi mwaahuliile kulugiilila habubaandizo, mutúule ha kweendana.
Mutaákubaangisa Ababéehi
7 Niimbagaambila ntyo, ha kuba ababéehi béenzi beésululukiize omúunsi, batakwiikililizana nka nikwo Yeézu Kristu akeeza omúunsi yaaba omuuntu.c Omuuntu weéna wéena ogwo alikugaamba aátyo, óogwo niwe omubéehi, na kaandi no omuhakanisa wa Kristu.d 8 Mbweenu, mweétegeeleze, kuba ebikolwa byéenyu bitaákwiiza kufwa busa, náho mubóne kwiinaánkula empeéla yeenyue ekobile kuluga ahali Múungu. 9 Weéna wéena ogwo atakuzeendelela obuteékomya ameégeso ga Kristu, kaandi akoongelaho éebye, óogwo tayina Múungu. Náho, ogwo alikuzeendelela no kweékomya ameégeso ga Kristu, óogwo ayinaze Isiichwe Múungu hamo na Yeézu Kristu. 10 Kabilaaba omuuntu naayiza hali íimwe ogwo atakweégesa áago, mutamwaángisa omumaka gaanyu, na kaandi mutamwaángalucha. 11 Omuuntu ogwo alamwaángalucha, óogwo naába yaakobana náze omu bikolwa byo obuzilwa éebyo alikukola.
Ebigaambo Byo Kulaga
12 Nyina amagaambo meenzi, náho tiínkweenda kugaándika aha lupapula no obwiino. Náho niintegeza kwiiza kubayeélela no kuhooya neemwe butúnu, tweena tubone kunulilwa bwooli.
13 Abaana ba munyaányoko ogwo ayatooziibwe na Múungu,f nibakwaangalucha.