Valooma 3

ɄNgʉlʉve itsiga immʉʉgʉ nʉpwʉ jɨngave ikʉvapa ʉlʉvʉngʉ aVayahudi

1 Lɨno ʉkʉkongana naago, kʉlɨ lʉvʉmbʉlɨlo lʉki ʉkʉva Nʼyahudi? Ndeeti, ʉkʉtahiliwa kʉlɨ nʉ lʉvʉmbʉlɨlo lʉki? 2 Jɨlweli ʉkʉva Nʼyahudi kʉlɨ lʉvʉmbʉlɨlo ʉlʉlɨ mu nzɨla nyongosu. Ɨlitatsi kwago, ʉNgʉlʉve aavapye aVayahudi indagɨlo nʉ lwɨdɨngʼano ʉkʉta valoleelage nʉ kʉkonga mu wʉʉmi wa veene. 3 Lɨno, tsa jɨlweli aVayahudi avange navaale vahʉʉgʉ ʉkʉvomba ɨmbombo ɨjyo. Ndeeti, tʉte avaanu avo ʉwʉ navahʉʉgʉ kwa Ngʉlʉve, vikʉmbɨɨka ʉNgʉlʉve namwene aleke ʉkʉva mmʉʉgʉ pa kʉvomba itsʉ aavahʉʉviitse? 4 Baako, napadebe! ɄNgʉlʉve ikʉvavonia avaanu ʉkʉta ʉmwene itsova itsa jɨlweli nʉ kʉtsivomba nʉpwʉ jɨngave avaanu vooni vitsova ʉvʉnuasi. Lola, ʉVʉvɨge ʉVʉvalatse wiita,

“Ʉngavavʉʉle avaanu vaako imbiivi tsa veene,

amamenyu gaako ga jɨlweli.

Ʉngavahɨge,

ʉvʉhɨgi waako wa vʉgolosu.”

5 Lɨno, avaanu avange viweesa ʉkʉta, imbiivi tsiitu twɨ Vayahudi tsʉ tsivonia ʉkʉta ʉNgʉlʉve ivomba itsa vʉgolosu wʉ ikʉtʉhɨga. Lola, ɨngave imbiivi tsiitu tsʉ tsivonia ɨlyo, pwʉ ʉwe tukʉmbombela vʉnonu. Ndeeti, nawʉ jɨlɨwo? Pwʉ lɨno, ʉNgʉlʉve angatʉpe ʉlʉvʉngʉ, jivoniaga ʉkʉta nanʼgolosu. (Nditsova ewo kɨvʉmuunu.) 6 Baako, napadebe! Lola, jɨngave ndavʉle, pwʉ ʉNgʉlʉve alavahɨga ndeeti avaanu va mu kɨlʉnga kʉ nzɨla jya vʉgolosu? 7 Ikange viweesa ʉkʉta, “Ʉwe tʉngavombe imbiivi, avaanu avange pwʉ jʉvilola pavʉvalasu ʉkʉta ʉNgʉlʉve immʉʉgʉ, naveene jʉvikwongeletsa ʉkʉnʼginia. Pwʉ kɨki tʉtsiige tuhɨgwa nda vagalo?” 8 Ʉkwa kʉhwaniine nʉ kʉta, “Tʉgendelelage ʉkʉvomba imbiivi pakʉta tsiitsage inonu.” Avaanu avange vikʉtʉtekela viita ʉwe najyʉwe tumanyiisa ndavʉle. Lola, avo vooni valavʉngwa ʉkʉkongana ni mbiivi tsa veene.

Nakʉli ʉmuunu ʉnʼgolosu

9 Pwʉ lɨno, tʉte kɨki? Ndeeti, ʉwe twɨ Vayahudi tʉnogye siitso ʉkʉlʉtɨɨlɨla avaanu avange avatava Vayahudi? Baako! Lola, ndʉwʉ ndɨmalile ʉkʉvavonia ʉvʉtulanongwa wa veene, aVayahudi na vatava Vayahudi, vooni vilongotswa ni mbiivi. 10 Ago galɨngʼiine nʉ Vʉvɨge ʉVʉvalatse ʉwiita,

“Nakʉli ʉmuunu ʉvɨ inʼgolosu,

nʉ mpamato.

11 Nakʉli ʉmuunu ʉvaveetsaga ʉvammanyile ʉNgʉlʉve,

ikange nakʉli ʉvɨ ikʉndonda.

12 Avaanu vooni vakʉlekile ʉkʉmpʉlɨka ʉNgʉlʉve,

lola, vooni vavʉla lʉvʉmbʉlɨlo ikange pamiiho ga mwene.

Nakʉli ʉmuunu ʉvivomba ʉwiipa,

nakʉli nʉ mpamato.”

13 “Ɨmilomo gya veene gɨlɨ ndʉ vʉguli ʉwahiime,

indimi tsa veene tsitsova ʉvʉnuasi.”

“Mu milomo gya veene,

gihʉma amamenyu aganya sumu ʉngata sumu jya nzoka.”

14 “Mu kʉtsova kwa veene,

gadɨgile amamenyu ga kʉvakootola avaanu avange nʉ kʉvalematsa inumbula.”

15 “Isilʉnde sya veene silɨ nyango ʉkʉbɨha kwibuda.

16 Wʉ vitaamania na vange,

vikʉvavejanga nʉ kʉvapelela ʉvʉkʉvɨlwa.

17 Aveene navajɨmanyili ɨnzɨla jya kʉtaamania na vange mu lʉnotsehetso.”

18 “Navikʉnʼdwada ʉNgʉlʉve lʉsiku.”

19 Lɨno, twivona ʉkʉta amamenyu agihʉma mu Vʉvɨge ʉVʉvalatse, gangatsove ɨkɨɨnu ɨkɨveetsaga, gikʉvavʉʉla avaanu ʉwʉ vaapeevilwe. Ageene gaavɨɨkilwe pakʉta ʉNgʉlʉve alaava ihɨga ɨkɨlʉnga, avaanu vooni viitse valeke ʉkʉva nʉ wɨɨmɨlo wa kwɨtetela, ikange jɨvonekage pavʉvalasu ʉkʉta vooni vanangi pamiiho ga Ngʉlʉve. 20 Lola, nakʉli ʉmuunu ʉvaveetsaga ʉvɨ ivalɨlwa ʉvʉgolosu pamiiho ga Ngʉlʉve kʉ nzɨla jya kʉkonga ʉmwʉ tsitsovela indagɨlo. Ɨmbombo jya ndagɨlo kwʉ kʉvonia vooni ʉkʉta vavombambiivi.

Ʉmuunu ivalɨlwa ʉvʉgolosu kʉ nzɨla jya kʉmwɨdɨka ʉYɨɨsʉ

21 Napeene, lɨno ʉNgʉlʉve atʉvoniitse ɨnzɨla jya mwene jya kʉtʉvalɨla ʉvʉgolosu, kɨtsila ndagɨlo. Natsyene indagɨlo tsa Moose nʉ vʉvɨge wa vanyamalago sitsova pavʉvalasu ikulongwi tsa nzɨla ɨjyo. 22 Ɨnzɨla ɨjyo kwʉ kʉmwɨdɨka ʉYɨɨsʉ Kɨlɨsiti. ɄNgʉlʉve, kʉ nzɨla ɨjyo, ikʉvavalɨla ʉvʉgolosu avaanu vooni avikʉmwɨdɨka ʉYɨɨsʉ, nitengelela ʉmuunu ʉvaveetsaga. 23 Lola, avaanu vooni vagalwike, ʉlʉgendo lwa veene naluvonia ʉwɨɨmɨkiwa wa Ngʉlʉve. 24 Lɨno, ʉNgʉlʉve kʉ lʉhʉngʉ lwa mwene, ɨdiike avaanu vave nʉ vʉgolosu pamiiho ga mwene kɨtsila ʉmwene kʉhombwa kɨɨnu. Aavombile ewo kʉ nzɨla jya kʉnsuungʼa ʉMesiya ʉYɨɨsʉ ʉvɨ iitsile akahetsa imbiivi tsiitu nʉ kʉtʉgombola. 25 ɄNgʉlʉve aammʉmiitse ʉYɨɨsʉ ave neekelo jya kʉvasajania avaanu nʉ mwene, pakʉta avaanu avikwɨdɨka ʉkʉta aasue kʉ nongwa tsa veene vasyɨkɨlwe imbiivi tsa veene. ɄNgʉlʉve aavombile ndavʉle pa kʉvonia ʉkʉta ʉmwene inʼgolosu, ivʉnga avatulanongwa. Lola, ʉmwene naavavʉnge pa mbiivi tsa veene itsʉ vaagalwike ʉnsɨkɨ gwa kʉnsana. 26 Ikange, aavombile ndavʉle pa kʉvonia ʉkʉta, ʉmwene inʼgolosu mu nsɨkɨ ʉgʉ, wʉ ivʉnga ʉvʉtulanongwa, nʉ wʉ ikʉvavalɨla ʉvʉgolosu avaanu avikʉmwɨdɨka ʉYɨɨsʉ.

27 Pwʉ lɨno, ikulongwi itsi tsikʉtʉsiga lwoni ʉkwɨginia, ʉlwakʉva natuvalɨlwa ʉkʉva vagolosu kʉ nzɨla jya kʉvomba inonu, apeene kʉ nzɨla jya kʉmwɨdɨka ʉYɨɨsʉ kwene. 28 Lɨno, twivona ʉkʉta ʉNgʉlʉve vɨ mwene ikʉmbalɨla ʉmuunu ave inʼgolosu kʉ nzɨla jya kʉmwɨdɨka ʉYɨɨsʉ, najiiva kʉ nzɨla jya kʉkonga ʉmwʉ indagɨlo tsa Moose tsitsovela. 29 Ndeeti, ʉNgʉlʉve avye Ngʉlʉve va Vayahudi veene? Niiva Ngʉlʉve va naveene avatava Vayahudi? Jɨlweli, ʉmwene vɨ Ngʉlʉve va vaanu vooni, 30 ʉlwakʉva kʉlɨ Ngʉlʉve mpamato, ikange kʉlɨ nzɨla mamato jya kʉvavalɨla avaanu ʉvʉgolosu pamiiho ga mwene. Ʉkʉtengʉlɨla kʉ Vayahudi avitahiliwa ʉkʉsikila kʉ vaanu avatava Vayahudi ʉwʉ navitahiliwa, vooni vikwɨdɨkiwa nʉ Ngʉlʉve ʉkʉva vagolosu kʉ nzɨla jya kʉmwɨdɨka ʉYɨɨsʉ kwene. 31 Pwʉ lɨno, wʉ tusimiilitsa ʉkwɨdɨka, nda kwʉ kʉta indagɨlo itsi tsivʉla lʉvʉmbʉlɨlo? Baako! Apeene tʉngave nʉ lwɨdɨko, pwʉ twiva tʉvombile galya gooni ʉgwʉ indagɨlo tsilagye.