Ʉnsuungʼwa ikʉmmʉmya ʉPetulo mu kɨkʉngwa
12
1 Mu sigono isyo,
ʉnkʉlʉdeeva ʉHelode akatengʉla ʉkʉvapelela ʉvʉkʉvɨlwa avaanu vaninie mu mpelela.
2 Akalagɨla ʉkʉta,
vamʼbude nɨ lipanga ʉYakoboa ʉlʉkololwe va Yohana.
3 Wʉ aweene ɨlyo lɨvahowiise aVayahudi,
akalagɨla vamwibate najyʉ Petulo.
Ʉnsɨkɨ ʉgwa gwale gwa sigono sya kyaka kya Mikate Ɨgɨtsila Kɨlʉve.b
4 Vaavye vamwibiite ʉPetulo,
ʉHelode akanʼdɨndɨla mu kɨkʉngwa.
Akambɨɨka mu vʉloleeletsi wa sipʉga sinni sya vasikali vanni vanni,
pakʉta vandoleele vʉnonu.
Aasaagile ʉkʉta jyammɨge ʉPetulo pamiiho ga vaanu wʉ kɨlʉtɨngʼiinie ɨkyaka kya Pasaka.c
5 Mu sigono isyo isyʉ ʉPetulo aakʉngilwe mu kɨkʉngwa,
avampelela vɨɨhʉmiitse,
kʉ maka gooni,
ʉkʉnʼdoovela kwa Ngʉlʉve.
6 Ɨkɨlo jya kʉsisimukila ɨkɨgono ɨkyʉ ʉHelode aasaagile ʉkʉmmɨga ʉPetulo,
ʉPetulo aagonile pagati pa vasikali vavɨlɨ avaandoleelaga.
Kange aakʉngilwe isivoko nɨ minyololo gɨvɨlɨ.
Pa ndyango gwa kɨkʉngwa,
vaalepwo avasikali avange ʉwʉ naveene vaandoleelaga ʉPetulo.
7 Baaho akahʉmɨla ʉnsuungʼwa va Ntwa ʉNgʉlʉve,
akɨɨma ʉpwʉ aale ʉPetulo,
ʉlʉmuli lʉkamulika mu kɨjumba kɨlya.
Ʉnsuungʼwa ʉjwa akamusaania ʉPetulo mu lʉvasu pa vʉsumbe wa kʉnsisimula.
Akambʉʉla akata,
“Sisimuka ngʼaningʼaani!”
Ɨminyololo ɨgyʉ vaankʉngye ʉPetulo mu sivoko gɨkagwa paasi!
8 Pwʉ ʉnsuungʼwa ʉjwa akambʉʉla akata,
“Ɨpinye ʉnkanda gwako,
ʉswale ni silaatu.”
ɄPetulo wʉ amalile ʉkʉvomba ewo,
ʉnsuungʼwa akambʉʉla akata,
“Swala nalɨ likoti lyako,
pwʉ ʉngʼongage!”
9 ɄPetulo akankonga ʉnsuungʼwa,
vakava vihʉma kʉnzi kʉ kɨkʉngwa.
Ʉnsɨkɨ gwoni ʉPetulo naalʉmanye ʉkʉta itso itsʉ ʉnsuungʼwa aavombaga tsyale tsa lweli.
Ʉmwene aasaagaga ʉkʉta,
itso tsyale mbonekelo.
10 ɄPetulo nʉ nsuungʼwa ʉjwa vakalʉtɨngʼania pa vasikali avaaloleelaga ʉndyango ʉgwa kʉgati,
ikange vakalʉtɨngʼania avaaloleelaga ʉndyango ʉgwa pagati.
Kʉmbele,
vakasika kʉ ndyango gwa kyʉma ʉgwa kʉhʉma mu kɨkʉngwa.
Gʉʉgwa ʉgwa gwale gwa kwingilila mu vʉtsenge.
Ʉndyango ʉgwa gʉkadɨndʉka gwene,
vakahʉma kʉnzi.
Wʉ vilʉtɨngʼania mu nsevo mpamato gwa mu vʉtsenge,
ʉnsuungʼwa ʉjwa akajaganika.
11 Pwʉ ʉPetulo akalʉmanya itsʉ tsivombiike,
akata,
“Lɨno,
ndɨlʉmanyile tsa jɨlweli ʉkʉta ʉNtwa ʉNgʉlʉve ansuungʼie ʉnsuungʼwa va mwene,
ʉkʉta ammoke mu sivoko sya Helode,
na mu mbiivi tsyoni itsʉ aVayahudi vakahʉʉvɨlaga ʉkʉta jiikʉmbombela ʉne.”
12 Wʉ alʉmanyile itso,
akalʉta kʉ nyumba jya Maliyamu,
ʉvanyina va Yohana Maliko.
Mu nyumba ɨjyo vaalʉndamiine avaanu vongosu ʉwʉ vaanʼdoovaga ʉNgʉlʉve.
13 ɄPetulo akahodetsa pa ndyango gwa lʉvɨgo lwa nyumba ɨjyo.
Ʉmmɨnza mpamato,
ʉvaale mbombi va nyumba ɨjyo,
ɨlitaawa lya mwene aatambʉlwagwa Loda,
akalʉta pa ndyango pa kʉpʉlɨhɨtsa ʉkʉta vɨ veeni ʉvɨ aahodetsaaga.
14 Wʉ apʉliike ʉkʉta limenyu lya Petulo,
akahovoka siitso,
akanyila kɨtsila kʉnʼdɨndʉlɨla ʉndyango,
akiingila mu nyumba.
Akavavʉʉla avaale mu nyumba ɨjyo akata,
“ɄPetulo ɨmile pa ndyango!”
15 Avaale mu nyumba vakambʉʉla vakata,
“Ʉvye nya lʉkwale!”
Ʉmwene akoongeletsa ʉkʉtsova ʉkʉta jɨlweli apʉliike vɨ Petulo.
Pwʉ vakambʉʉla vakata,
“Ipange ʉjwa insuungʼwa va mwene ʉvikʉndoleela.”
16 Ʉnsɨkɨ ʉgwa,
ʉPetulo aagendelye ʉkʉhodetsa pa ndyango.
Wʉ vadɨndwe ʉndyango vakavona lweli vɨ mwene,
vakakenyemuka.
17 ɄPetulo akahʉʉsa ɨkɨvoko pakʉta vave kɨnuunu,
akavavʉʉla ʉmwʉ ʉNtwa aammʉmiitse mu kɨkʉngwa.
Akavavʉʉla akata,
“Aga ʉgwʉ gavombiike,
mukambʉʉle ʉYakobod na vange avɨɨdɨkivajiitu.”
Pwʉ ʉPetulo akahega palya,
akalʉta apoonu apange.
18 Pavʉsiku wʉ kʉkie,
avasikali avaaloleelaga ɨkɨkʉngwa vakava nʉ lʉdwado siitso,
ʉlwakʉva navaalʉmanye ʉmwajaganikye ʉPetulo.
19 ɄHelode akalagɨla avasikali ʉkʉta vavombe ʉlwʉtsi ʉkʉndonda ʉPetulo.
Wʉ avavʉʉtsiitse siitso,
vakalemwa ɨlya kwanda.
Pwʉ akalagɨla vabudwe.
Kʉmbele,
ʉHelode akahega kʉ Yuuda,
akatsiiva kʉ Kaisaliya kʉ nsɨkɨ nsupi.
Ʉvʉswe wa nkʉlʉdeeva ʉHelode
20 ɄHelode aavaviipye siitso avaanu va kʉ Tilo,
na va kʉ Sidoni.
Pwʉ avaanu va vʉtsenge ʉwa vakatsovana ʉkʉta valʉte vaagane nʉ Helode.
Vakansonga ʉBulasito,
ʉvɨ aale nʼgane ikange ndoleeli va siinu sya nkʉlʉdeeva,
akava ʉlʉvasu lwa veene.
Vakalʉta kʉ nkʉlʉdeeva kudoova ʉkʉta kʉve nʉ lʉnotsehetso,
ʉlwakʉva avaanu va vʉtsenge ʉwa vaahʉʉvɨlaga ɨkyakʉlya ʉkʉhʉma mu kɨlʉnga kya mwene.
21 Wʉ kɨsiike ɨkɨgono ɨkyʉ ʉnkʉlʉdeeva ʉHelode aahalile kɨve kya kwaganila na vaanu avo,
akaswala ɨmisabwa gya mwene gya vʉtwa.
Akataama mu kɨtaamilo kya mwene kya vʉtwa,
akatengʉla ʉkʉtsova pamiiho ga vaanu avo na vange.
22 Pwʉ ɨkɨpʉga ɨkyo kɨkatengʉla ʉkwoveela kɨkata,
“Ɨlɨ nalimenyu lya muunu!
Ɨlyo limenyu lya lingʉlʉve!”
23 Wʉ vanʼginiitse ʉHelode ewo,
ʉmwene pange ampe ʉNgʉlʉve ʉwɨɨmɨkiwa.
Ʉnsɨkɨ gʉʉgwa ʉgwa ʉnsuungʼwa va Ntwa ʉNgʉlʉve akankootola akava nʉ vʉtamu wa kʉlɨɨwa ni sinye,
akaswa.
24 Ɨlimenyu lya Ngʉlʉve lyagendelelaga ʉkʉhamba mu vaanu,
ɨmbalɨlo jya vɨɨdɨki jɨlɨkwongelela siitso.
25 ɄBalinaba nʉ Sauli wʉ vamalile ɨmbombo jya veene,
e vakahega kʉ Yelusalemu paninie nʉ Yohana Maliko,
vakalʉta kʉ Antiokiya.