ɄYɨɨsʉ ikʉnʼdoova ʉNgʉlʉve
17
1 ɄYɨɨsʉ wʉ amalile ʉkʉtsova ago gooni,
akalola kʉkyanya,
akɨsaja akata,
“Gwe Daada,
ʉnsɨkɨ gwango gʉsiike.
Ndidoova ʉvonie kʉ vaanu ʉwɨɨmɨkiwa wango ʉne ndɨ Mwana vaako,
pakʉta najyʉne ndɨvonie kʉ veene ʉwɨɨmɨkiwa waako ʉmwʉ vʉveelye,
2 ndʉwʉ ʉve waamye ʉvʉtavʉlɨlwa wa kʉvalongotsa avaanu vooni,
pakʉta avaanu vooni ʉwʉ ʉʉmye ʉne ndɨvape ʉwʉʉmi wa sikutsooni.
3 Ʉwʉʉmi wa sikutsooni wʉ ʉvʉ:
Avaanu vakʉmanye ʉve,
vɨ Ngʉlʉve va jɨlweli vɨ mwene,
ikange vammanye ʉne ndɨ Yɨɨsʉ Kɨlɨsiti,
ndɨ waansuungʼile kʉ veene.
4 Ʉne ndɨvoniitse ʉwɨɨmɨkiwa waako kʉ vaanu vooni,
kʉ nzɨla jya kʉkwɨtsa ɨmbombo ɨjyʉ waansuungʼile kukʉjɨvomba.
5 Gwe Daada,
ndidoova ʉʉme ikange ʉwɨɨmɨkiwa wango pakʉta ndɨve nawo paninie nʉʉve.
Apo pwʉ jʉndiiva nawo ʉwɨɨmɨkiwa vʉlya ʉwʉ ndyale nawo wʉ ndɨlɨ paninie nʉʉve,
wʉ ʉkaanale ʉkʉpela ɨkɨlʉnga.
ɄYɨɨsʉ ikʉvadoovela avakongi va mwene
6 “Gwe Daada,
waamye avaanu ʉwʉ pa vʉtengʉlɨlo vaale va mu kɨlʉnga ɨkɨ,
ʉne ndɨvavoniitse ʉmwʉ ʉveelye.
Aveene vaale vaako,
pwʉ ʉve ʉkaama ʉne.
Lɨno vikʉlɨkonga ɨlimenyu lyako.
7 Lɨno vasikye ʉkʉlʉmanya ʉkʉta isiinu syoni isyʉ ʉʉmye ʉne,
sihʉmile kwave,
8 ʉlwakʉva ʉne ndɨvavʉʉlile gooni ʉgwʉ waambʉʉlile ʉne.
Aveene vʉpɨlye,
lɨno valʉmanyile ʉkʉta jɨlweli ndɨhʉmile kwave,
ikange vɨɨdɨke ʉkʉta ʉve veeve waansuungʼile ʉne.
9 Ndikʉvadoovela ava ʉlwakʉva vaanu vaako.
Nandikʉvadoovela avaanu vooni,
peene ndikʉvadoovela avaanu ava veene ʉwʉ waamye.
10 Avaanu vango vooni,
vaako ʉve,
ikange avaanu vaako vooni,
wʉ vango najyʉne.
Ava vavoniitse ʉwɨɨmɨkiwa wango.
11 Ʉne ndikwitsa kwave,
lola nandɨkaavemwo ikange mu kɨlʉnga ʉmʉ.
Lɨno aveene vigendelelaga ʉkʉva mu kɨlʉnga ʉmʉ.
Gwe Daada,
ʉve vɨ Mbalatse,
ndikʉkʉdoova ʉvaloleelage kʉ maka ga litaawa lyako ɨlyʉ ʉʉmye,
pakʉta vaveetsage kɨɨnu kɨpamato ndʉwʉ ʉne nʉʉve tʉlɨ kɨɨnu kɨpamato.
12 Ʉnsɨkɨ ʉgwʉ ndɨkaale paninie navo,
ndɨkavaloleelaga kʉ maka ga litaawa lyako ɨlyʉ waamye.
Lola,
ndɨvadɨɨmile vʉnonu,
nandɨnʼjatsiitsi nʉ mpamato,
peene mwene ʉlya ʉvɨ pannogye ʉkwongometswa,
pakʉta gavombeke agaavɨgilwe mu Vʉvɨge ʉVʉvalatse.a
13 “Gwe Daada,
lɨno ndikwitsa kwave.
Ʉne ndikʉvavʉʉla avakongi vango aga gooni wʉ ndɨpitsiige ndɨlɨ mu kɨlʉnga ɨkɨ,
pakʉta vave nʉ lʉhekelo siitso mu numbula tsa veene,
ʉlʉhekelo ʉlwʉ ndɨlɨ nalwo ʉne.
14 Ndɨvapye ɨlimenyu lyako ɨlyʉ waamye ʉne.
Pwʉ ʉkʉhʉmana nɨɨlyo,
avaanu va mu kɨlʉnga ɨkɨ vikʉvasʉʉla,
ʉlwakʉva avakongi vango nava mu kɨlʉnga ʉmʉ,
ndʉwʉ najyʉne nandɨlɨ va mu kɨlʉnga ʉmʉ.
15 “Gwe Daada,
nandidoova ʉkʉta ʉvahetse mu kɨlʉnga ʉmʉ,
apeene ʉkʉta ʉvapoke kʉ ntavangwa ʉSetano.
16 Aveene nava mu kɨlʉnga ʉmʉ ndʉwʉ ʉne nandɨlɨ va mu kɨlʉnga ʉmʉ.
17 Gwe Daada,
ɨlimenyu lyako lya jɨlweli,
pwʉ kʉ nzɨla jya wajɨlweli ʉwa ʉvavalatse ava vave vaako.
18 Ndʉwʉ ʉve waansuungʼile ʉne mu kɨlʉnga,
vʉvʉle vʉle najyʉne ndikʉvasuungʼa ava mu kɨlʉnga.
19 Ndikɨhʉmya kwave ndɨkʉvombelage pa kulongwi tsa veene,
pakʉta naveene vave vaako jɨlweli,
vakʉvombelage.
ɄYɨɨsʉ ikʉvadoovela avaanu avikʉmwɨdɨka
20 “Nandikʉvadoovela vaava veene,
apeene ndikʉvadoovela na vange vooni,
ʉwʉ valannyɨdɨkaga ʉkʉkongana na galya ʉgwʉ avakongi vango valavamanyiisaaga.
21 Ndidoova ʉkʉta avaanu avo vooni vave kɨɨnu kɨpamato ndʉwʉ ʉve,
Daada,
ʉlɨ mu nʼgati mwane,
nʉʉne ndɨlɨ mu nʼgati mwave.
Ikange,
ndidoova ʉkʉta vave mu nʼgati mwawe,
pakʉta avaanu vooni va mu kɨlʉnga vɨɨdɨkage ʉkʉta ʉve veeve waansuungʼile ʉne.
22 Ʉwɨɨmɨkiwa ʉwʉ waamye,
najyʉne ndɨvapye avakongi vango,
pakʉta vave kɨɨnu kɨpamato ndʉwʉ ʉve nʉʉne tʉlɨ kɨɨnu kɨpamato,
23 ʉne ndɨlɨ mu nʼgati mu veene,
ʉve ʉlɨ mu nʼgati mwane.
Ndikʉvanʼdoovela aveene ʉkʉta vaveetsage kɨɨnu kɨpamato jɨlweli.
Kʉ nzɨla ɨjɨ avaanu va mu kɨlʉnga jʉvikʉlʉmanya ʉkʉta ʉve veeve waansuungʼile ʉne,
ikange jʉvikʉlʉmanya ʉkʉta ʉvaganile avakongi vango ndʉwʉ ʉnganile ʉne.
24 “Gwe Daada,
ndinogwa ʉkʉta avaanu ʉwʉ ʉʉmye,
viitse vave paninie nʉʉne ʉpwʉ ndɨlaava.
Apo,
viitse vavʉvone ʉwɨɨmɨkiwa wango ʉwʉ waamye,
manya waanganile ʉne ʉkʉhʉma wʉ ʉkaanale ʉkʉpela ɨkɨlʉnga.
25 Gwe Daada,
ʉve vɨ Nʼgolosu,
avaanu va mu kɨlʉnga ʉmʉ navakʉmanyili.
Apeene ʉne neene ndɨkʉmanyile ʉve,
ikange avakongi vango ava valʉmanyile ʉkʉta ʉve veeve waansuungʼile.
26 Ʉne ndɨvamanyiise vakʉmanye ʉve ʉmwʉ ʉveelye,
ikange ndigendelelaga ʉkʉvomba ɨlyo.
Ndivombaga ewo pakʉta naveene vavaganage avajyavo ndʉwʉ ʉve ʉnganile ʉne,
na pakʉta ʉne ndɨve mu nʼgati mu veene.”